A CIG-Ensino, en colaboración coa plataforma Queremos Galego, celebrará un encontro que terá lugar o vindeiro día 18 de xuño, ás 18 horas, no Museo do Pobo Galego, en defensa “de podermos continuar a impartir as aulas de Matemáticas, Tecnoloxía e Física e Química en galego e para amosar o rexeitamento a este decreto que procura erradicar o galego como lingua de comunicación científica”. Dende a CIG-Ensino denuncian que o decreto do plurilingüismo pretende marxinar o noso idioma do sistema educativo, impide a normalización lingüística e imposibilita que o alumnado acade a competencia suficiente para que poida usar o galego con toda a normalidade.

A CIG-Ensino vén de denunciar a medida adoptada pola Consellaría de Educación contra a nosa lingua e que, ademais, se traduce no malgasto de diñeiro público. A Consellaría acaba de anunciar na súa web que amplía a axuda para a adquisición de libros para cambiar os textos de matemáticas, física e química e tecnoloxía, cando neste momento os libros destas materias non esgotaron o seu período de vixencia, pois non transcorreron os catros anos estipulados par a súa renovación. Esta cambio suporá un gasto de entre cinco e oito millóns de euros, dependendo das materias en que se cambie o libro.

A CIG-Ensino denuncia que o cuestionario enviado esta semana pola Consellaría de Educación aos centros para a súa distribución entre os pais e nais vai dar lugar ao incumprimento dos dereitos lingüísticos do alumnado, pois pode dar como resultado a falta de contacto coa súa lingua propia, incumprindo así a Declaración Universal dos Dereitos Lingüísticos e procura a desaparición do galego como lingua vehicular na educación infantil.

A CIG-Ensino denuncia que, cando está xa rematando o curso escolar, aínda non foi publicada a Convocatoria da Secretaría Xeral de Política Lingüística e da Dirección Xeral de Educación, Formación Profesional e Innovación Educativa dos premios a proxectos de innovación en normalización lingüística de centros da Consellería de Educación para desenvolver no curso académico 2010-2011.

Unha vez máis o inglés, tal como pretende facer o decreto do plurilingüismo, elimina a nosa lingua das áreas que lle corresponderían, limitando por máis o dereito dos pais e nais de optar ou non a unha aula bilingüe. Así vai ocorrer no Cluny de Compostela, onde pretenden eliminar o galego en áreas como coñecemento do medio. A CIG-Ensino demanda da consellaría de Educación que impida este novo ataque contra a nosa lingua.

O Equipo de Normalización Lingüística do CEIP de Randufe tomou no seu día o acordo de que todos os boletíns do Equipo sexan publicados, entregados a pais e nais e expostos no taboleiro que o Equipo ten a tal fin. Recentemente, e de acordo co funcionamento habitual do Equipo, foi colocado o boletín no taboleiro despois de ser entregado a todos os pais e nais. O boletín reproducía na súa contraportada unha viñeta alusiva ás inclinacións anglófilas do presidente da Xunta publicada nunha revista de humor galega, no contexto do rexeitamento ao novo Decreto de Plurilingüismo. O Equipo de normalización, do que forma parte o Director do centro aprobara o boletín. Despois de distribuído e exposto no taboleiro, o Director, ante a queixa dun só pai e sen sometelo á consideración do Equipo de Normalización ou do Claustro, toma a decisión unilateral de retirar o boletín e posteriormente informa de que o fixo.

A CIG-Ensino vén de anunciar a presentación dun recurso contencioso-administrativo perante o Tribunal Superior de Xustiza de Galiza contra o decreto de Plurilingüismo, que sae publicado este martes, 25 de maio, no Diario Oficial de Galiza. A CIG-Ensino denuncia que a consellaría de Educación impón así un decreto que atenta contra o galego e que suscitou o maior rexeitamento da historia da normalización lingüística.