A CIG Ensino denuncia que o servizo de asistencia xurídica do que a Consellaría fixo alarde estes días pasados non só é unha privatización senón tamén unha “burla” ao profesorado ao “ultralimitar” a súa eficacia, impedindo consultas que non lle interesen á Xunta de Galiza. Considera que se vai destinar diñeiro público a un servizo que debería prestar a propia consellaría que “nin nos vai atender entendo a nosa especificidade”. Alén diso, a CIG-Ensino denuncia que na Mesa Sectorial celebrada este xoves constatouse que Educación pretende utilizar dúas ordes relacionadas coa formación do profesorado para reconducila segundo os principios ideolóxicos do PP.

A CIG Ensino denuncia un novo ataque ao noso idioma por parte da Consellaría de Educación. A convocatoria de cursos de lingua galega preparatorios para as probas dos niveis Celga 1, Celga 2, Celga 3 e Celga 4 redúcese drasticamente respecto da convocatoria do pasado ano, deixando a 11 localidades sen garantía de oferta.

A CIG-Ensino considera que é inaceptábel que, “ao servizo da propaganda”, o Secretario Xeral de Política Lingüística dedique os seus esforzos a saír nos medios de comunicación difundindo unha imaxe “falsa” da verdadeira implicación do seu departamento e a Consellaría de Educación, á que pertence, con profesorado que día a día traballa pola normalización do noso idioma.

A plataforma cidadá Queremos Galego, da que forma parte a CIG celebrou esta mañá, diante da institución do Valedor do Pobo, unha concentración para exixir o cesamento inmediato do Valedor do Pobo, Benigno López, e do conselleiro de Educación, Jesús Vázquez, pola censura do libro de texto escolar da materia de Coñecemento do Medio que sinala que o galego é a lingua propia de Galiza, reproducindo literalmente o artigo 5.1 do Estatuto de autonomía. O vindeiro sábado está convocada outra concentración, na Praza do Toural, en Compostela, ás cinco da tarde.

A plataforma cidadá Queremos Galego, integrada por máis de 700 entidades sociais de diferente tipoloxía, entre elas a CIG, convoca para esta quinta feira (xoves) 15 de decembro ás 11.30 da mañá unha concentración diante da sede do Valedor do Pobo, en Santiago de Compostela.

Despois das reiteradas denuncias da CIG-Ensino, a Consellaría de Educación atendeu dúas das demandas realizadas sobre a convocatoria de premios á innovación en dinamización lingüística: que se publicasen no DOG e que se publicasen no inicio do curso escolar. Deste xeito, o pasado 15 de setembro publicábase no DOG a convocatoria para este curso. Porén os prazos marcados recollen que a resolución pode demorarse até o 15 de decembro, o que suporá que se perda o primeiro trimestre para a posta en marcha do proxecto.

A Consellaría de Educación publicou no DOG do pasado venres día 9 unha orde pola que se deixa sen efecto a do 1 de marzo de 2011 que regulaba as bases para a concesión de subvencións para a edición en lingua galega de recursos didácticos curriculares para niveis non universitarios. Segundo se argumenta na propia orde “A política orzamentaria .. exixe nestes momentos efectuar un axuste nos créditos inicialmente asignados …, ante os posibles incumprimentos, por parte do Estado, dos compromisos de achegas de anticipo do fondo …” En definitiva, a Consellaría de Educación aplícalle un novo e importante recorte á lingua galega, mais aproveita para facer política en contra do goberno do Estado, adxudicándolle a “culpa” deste incumprimento institucional.