O Xulgado do Social número 3 de Vigo acordou a suspensión cautelar dos 97 traslados unilaterais a Madrid acordados por Unínoso, por considerar que pode vulnerar o dereito á tutela efectiva toda vez que as situación persoais, nomeadamente das traballadoras, dificultarían os traslados obrigando a estas a optar pola rescisión do contrato, sen que estivera resolto o conflito colectivo.

Arredor de 700 persoas participaron hoxe na manifestación convocada pola CIG para rexeitar os plans de Unísono de deslocalizar 97 empregos de Vigo a Madrid, mobilización coa que se puxo fin á campada iniciada diante da empresa a noite anterior. Ao mesmo tempo, dende a central nacionalista cifran nun 70% o seguimento da xornada de folga convocada na compañía de telemárketing.

A CIG manifesta o seu apoio á mobilización nacional convocada pola Plataforma pola Defensa de Corcoesto, para o vindeiro domingo día 14 de abril. A manifestación, que terá lugar en Carballo baixo o lema “Por un aire puro, sen arsénico nin cianuro. Non á mina de Corcoesto”, sairá ás 12:00 horas do aparcamento do Halley.

Arredor de 8.000 persoas manifestáronse na mañá do domingo 7 de abril polas rúas da Coruña en defensa da continuidade industrial da Fábrica de Armas e de todos os postos de traballo. Dende a Sección Sindical da CIG esixiuse a implicación directa e real da Xunta e do Presidente do Goberno galego para evitar o peche dunha factoría que conta con sete décadas de historia e cuxo cese suporía un novo golpe para o cada vez máis feble tecido industrial da comarca da Coruña.

Os traballadores e traballadoras de Santa Bárbara Systems volverán manifestarse polas rúas da Coruña o sábado 23 de marzo, cunha marcha que partirá da Praza da Palloza ás doce do mediodía e irá até a Delegación do Goberno, onde se vai facer entrega dun escrito dirixido ao Ministerio de Defensa, reclamando a súa implicación a favor da continuidade da factoría e o futuro industrial da comarca.

Os traballadores/as públicos/as dos Xulgados galegos están en pé de guerra contra os plans do Goberno español do PP de privatiza o Rexistro Civil. En Vigo, máis de 200 funcionarios/as manifestáronse para rexeitar a reforma que prepara o ministro de Xustiza. Houbo mobilizacións noutros puntos do país.

Milleiros de persoas percorreron onte as rúas do centro de Vigo nunha nova mobilización en defensa da sanidade pública e contra a privatización do novo hospital convocada pola Plataforma SOS Sanidade Pública e a Xunta de Persoal do Chuvi. Os promotores da protesta, entre os que se atopa a CIG, advirten que se a Xunta segue coa súa política de recortes e privatizacións “aumentarán as demoras, non haberá acceso a medicamentos innovadores e perderanse os niveis de calidade, anos de vida útil, multiplicándose o sufrimento e a ansiedade -como xa é evidente- e perderanse vidas innecesariamente”.