A sección sindical da CIG na Axencia Tributaria volveu lanzar unha chamada de atención sobre a situación das costas galegas como “porta de entrada” á cocaína en Europa. Dende a central reclámase unha potenciación de medios humanos e materiais do Servizo de Vixilancia Aduaneira, razón pola que a CIG xa se ten dirixido á Dirección Xeral de VA para que dote a Galiza dun Sistema Integrado de Vixilancia Exterior, similar ao que actualmente controla as costas andaluzas e canarias.

A CIG quere denunciar unha vez máis a falta de interese que mostran os responsábeis de Vixilancia Aduaneira na loita contra o narcotráfico en Galiza. A patrulleira de Ribadeo Alcaraván II leva dende o mes de novembro de 2008 parada por reparación nos motores. Recentemente, no medio dos temporais pasados, tivo que trasladarse a de A Coruña a realizar un servizo que en principio tería que facer a de Ribadeo, o que supón que ademais de atrasar e poñer en risco o operativo, arriscase a vida dos funcionarios que teñen que desprazarse moitas millas en condicións meteorolóxicas moi adversas, de alarma vermella.

A CIG vén de presentar ante a Dirección Adxunta de Vixilancia Aduaneira un escrito solicitando  que se inicien os trámites pertinentes para acadar un convenio de colaboración entre o Ministerio de Fomento e Axencia Tributaria, coa fin de que os medios dos que dispón o Centro Zonal de Coordinación de Salvamento en Porto do Son poidan participar tamén na loita contra o narcotráfico nas costas galegas.

A sección sindical da CIG na Axencia Tributaria volveu reiterar as súas denuncias en relación coa escaseza de medios dos que dispón o Servizo de Vixilancia Aduaneira (S.V.A.) en Galiza, logo da aparición duns náufragos a bordo dunha planadora. A falla de medios materias e humanos segue a facer das costas galegas un dos lugares preferidos polos narcotraficantes para as súas operacións.

A sección sindical da CIG na Axencia Tributaria reitera as súas denuncias en relación coa escaseza de medios dos que dispón o Servizo de Vixilancia Aduaneira (S.V.A.) en Galiza. A falta de recursos e as deficiencias nos existentes ocasionan que as costas do noso país volvan ser elixidas polos narcotraficantes como unha das principais vías de acceso de droga a Europa.