O Departamento Territorial de A Coruña da Consellaría de Traballo e Benestar resolveu rexeitar a solicitude de ERE presentada pola empresa Neira & Ortegal S.L., que de aprobarse suporía a perda de 19 postos de traballo, ao atoparse múltiples deficiencias na documentación presentada e por considerar que a empresa incorreu en fraude de lei. Dende a CIG-Servizos de Ferrol quixeron subliñaron que a resolución administrativa vén confirmar as denuncias que o Comité fixo públicas sobre as irregularidades que estaba a cometer a empresa e que os levou a convocar unha xornada de folga a primeiros de setembro.

Máis do 95% do persoal da empresa Almacenes Neira & Ortegal, dedicada á compra-venda de materiais de construción e con centros de traballo en Ferrol, Narón, Ortigueira e Viveiro, está secundando a xornada de folga convocada para este xoves, 2 de setembro, en demanda do cobro dos atrasos salariais e contra do ERE de extinción proposto pola compañía.

A asemblea de traballadoras/es de Neira & Ortegal vén de presentar á autoridade laboral o informe no que explican as razóns polas que rexeitan o ERE. Entre outras sinalan que esta actuación non asegura a súa viabilidade, presenta moitas irregularidades e só serve aos intereses da negociación dunha parte do accionariado con Construdeco S.L. Ademais anuncian a convocatoria dunha folga para o 2 de setembro, en todos os centros de traballo, para reclamar o pagamento dos salarios que se lles adebedan.