Unha vez máis o inglés, tal como pretende facer o decreto do plurilingüismo, elimina a nosa lingua das áreas que lle corresponderían, limitando por máis o dereito dos pais e nais de optar ou non a unha aula bilingüe. Así vai ocorrer no Cluny de Compostela, onde pretenden eliminar o galego en áreas como coñecemento do medio. A CIG-Ensino demanda da consellaría de Educación que impida este novo ataque contra a nosa lingua.

O Equipo de Normalización Lingüística do CEIP de Randufe tomou no seu día o acordo de que todos os boletíns do Equipo sexan publicados, entregados a pais e nais e expostos no taboleiro que o Equipo ten a tal fin. Recentemente, e de acordo co funcionamento habitual do Equipo, foi colocado o boletín no taboleiro despois de ser entregado a todos os pais e nais. O boletín reproducía na súa contraportada unha viñeta alusiva ás inclinacións anglófilas do presidente da Xunta publicada nunha revista de humor galega, no contexto do rexeitamento ao novo Decreto de Plurilingüismo. O Equipo de normalización, do que forma parte o Director do centro aprobara o boletín. Despois de distribuído e exposto no taboleiro, o Director, ante a queixa dun só pai e sen sometelo á consideración do Equipo de Normalización ou do Claustro, toma a decisión unilateral de retirar o boletín e posteriormente informa de que o fixo.

Unha multitudinaria manifestación percorreu as rúas de Compostela convocada pola plataforma cidadá Queremos Galego, baixo o lema “O galego, o noso existir”, para celebrar un histórico e reivindicativo Día das Letras Galegas. Unha xornada na que estivo presente na memoria de todos e todas as asistentes Uxío Novoneyra, ao que se homenaxeaba nesta data, porque o galego, a forza do noso amor, non pode ser inútil, como se lembrou, unha e outra vez nas diferentes intervencións.

A Plataforma Queremos Galego insta a toda a cidadanía galega a participar nunha nova manifestación nacional en defensa da nosa lingua propia o vindeiro luns 17 de maio, Día das Letras Galegas. Baixo o lema “O Galego, o noso existir” a plataforma cidadá agarda que a mobilización “sexa de novo histórica polas súas dimensións” e que se repita a imaxe do pasado 21 de xaneiro cando a Praza do Obradoiro quedou pequena para acoller á multitude que secundou a manifestación contra o decretazo.

A CIG-Ensino esixiu a Consellaría de Educación, en rolda de prensa, que retire o borrador de Decreto de Plurilingüismo, despois de que do ditame do Consello Consultivo o declara ilegal ao afirmar “ que resulta contrario ao ordenamento xurídico” e que contravén a legalidade vixente, nomeadamente a Lei de Normalización Lingüística, o Estatuto de Autonomía, a Carta Europea das Linguas Minorizadas e a propia LOE. Este ditame ven a sumarse ao rexeitamento de diferentes institucións, organizacións e entidades que están reclamando que se retire este proxecto.

Tras percorrer xa 12 vilas e coa vista na última etapa mañá en Vigo, o Correlingua 2010 estase a amosar todo un éxito de participación. Esta mesma mañá desenvolvíase a carreira pola lingua en A Coruña, na que participaron uns 6.000 rapaces e rapazas procedentes de máis de 40 centros da cidade e a súa bisbarra, que percorreron ao berro de “galego, galego” o paseo marítimo entre Riazor e a Torre de Hércules.

A CIG-Ensino denunciou un novo ataque á nosa lingua por parte da Consellaría de Educación, que vén de eliminar o requisito que permitía garantir a adquisición mínima de material en galego para as bibliotecas escolares. Baixo a escusa da multiculturalidade, a Consellaría suprime un espazo para o galego, precisamente cando se constata que nas bibliotecas escolares os libros na nosa lingua non están en situación de equidade respecto dos volumes en español.