A CIG participou na concentración convocada en defensa dos dereitos sexuais e reprodutivos da muller ás portas do Parlamento con motivo da presentación dunha Proposición non de Lei rexistrada polo BNG sobre a Contrarreforma da Lei do Aborto. Un debate parlamentar no que o Partido Popular se pronunciou abertamente a favor do Anteproxecto de lei de Modificación da Lei do Aborto impulsado por Gallardón, cos mesmos argumentos que os exhibidos polo movemento Hazte Oír, Derecho a vivir, iniciativas como Borra el aborto e organizacións financiadas con cartos públicos da Xunta de Galiza como é o caso de Red Madre.

A primeiras horas da mañá furgóns policiais rodeaban o Parlamento de Galiza e pechaban ao tráfico as rúas lindeiras provocando o colapso de Compostela. Era o dispositivo preparado polo goberno da Xunta para recibir aos traballadores e traballadoras de Navantia que tiñan convocada unha manifestación, coincidindo co pleno do Parlamento, para denunciar a ausencia dunha partida orzamentaria para a construción do dique flotante e para exixir explicacións do Presidente da Xunta a respecto dos prometidos ‘floteis’ de PEMEX.

Delegados/as de Navantia e traballadores/as da USC concentrábanse diante do Parlamento, coincidindo co debate dos orzamentos de 2013. Os grupos da oposición cursaran convites para que representantes destes colectivos puideran asistir á sesión plenaria. Ante a decisión da presidenta da cámara de prohibirlles a entrada, os deputados/as da oposición plantaron ao PP no debate, saíron a buscar ás persoas convidadas e facilitaron o seu acceso ao pazo do Hórreo. Desde a tribuna de convidados alzaron carteis en demanda de carga de traballo e en defensa dos servizos públicos e de inmediato foron expulsados/as.

A Plataforma en Defensa dos Servizos Públicos reuníase este venres co grupo parlamentario do BNG para expor a situación na que se atopan as empregadas e empregados públicos, por mor dos recortes laborais e salariais aprobados polo PP en Galiza e facerlle entrega do comunicado da convocatoria de mobilizacións previstas para o vindeiro xoves, día 17 de xaneiro en todas as comarcas do país. Na xuntanza, o BNG anunciou que solicitará a supresión de todos os artigos recollidos na Lei de Orzamentos referidos a recortes nas retribucións do persoal da administración.

Traballadores e traballadoras da CRTVG concentrábanse esta mañá diante do Parlamento coincidindo coa votación da Lei dos Medios Públicos, que foi aprobada cos votos a favor do PP e do PSOE e que só tivo os votos en contra do BNG. Denunciaban, como levan facendo desde que se comezou a tramitar o texto, que incrementa o control gobernamental, abre as vías á súa privatización e pon en perigo o emprego.

O Consello Xeral do Poder Xudicial, a raíz dun escrito remitido pola CIG, acordou dirixirse ao Ministerio de Xustiza e Igualdade para instar ao goberno a desenvolver a Lei integral de violencia de xénero e crear, no menor espazo de tempo, as agrupacións de partidos xudiciais nesta materia que permitan dar unha atención axeitada ás vítimas. A dotación de xulgados especializados en cada unha das sete cidades galegas é unha reivindicación que a Federación de Administración Pública vén facendo dende hai anos.

A CIG saíu novamente á rúa para manifestar a súa oposición aos orzamentos que o PP vén de aprobar no Parlamento. Delegados e delegadas das federacións da área pública da central sindical concentráronse, durante o seu debate e votación no Hórreo, para denunciar que se trata dos orzamentos máis restritivos e antisociais que se teñen aprobado en Galiza. Suso Seixo denunciaba, no decurso da mobilización, que a redución dos investimentos nos sectores produtivos povocará un incremento, aínda maior, do desemprego e que a drástica caída das partidas destinadas aos servizos públicos ten como obxectivo favorecer a súa progresiva privatización.