A Inspección Provincial de Traballo e S.S. de Ourense vén de pronunciarse, contundentemente, sobre varias accións adoptadas pola Dirección da empresa Vidreira do Atlántico, S.A. que constitúen o núcleo básico do concurso de acredores formulado; rexeitándoas, tipificándoas como graves e, consecuentemente, sancionando a citada patronal.

Un grupo de traballadores de Bunge Ibérica iniciaban pouco despois das dez da mañá do luns un peche nos edificios da Xunta en A Coruña para reclamar ao goberno galego que se implique no conflito e medie diante da empresa. Os delegados non abandonaron o encerro até que foron recibidos polo superdelegado, Diego Calvo, a través do que se puido xestionar unha xuntanza a tres bandas (empresa, administración e traballadores) fixada para o vindeiro mércores 27 de xaneiro, na que se abordarán os despedimentos e o peche ilegal decretados pola multinacional na planta de Culleredo.

A CIG, diante das últimas novas aparecidas nos medios de comunicación nos últimos dias sobre o conflito da Vidreira do Atlántico, emitiu un comunicado da prensa no que sinala que "aínda que, aos traballadores e traballadoras da Vidreira do Atlántico, nos tería gustado ollar unha actitude activa dos Alcaldes da Limia en defensa dos postos de traballo, acompañada da presentación dunha protesta perante o Presidente do Grupo BA, polo tratamento discriminatorio e represaliante que se está a infrinxir á nosa comarca e a este País; o certo é que as noticias publicadas, relativas á reunión mantida o 8 de xaneiro na cidade do Porto entre Alcaldes e Presidente do Grupo BA, veñen confirmar e ratificar todo o que, dende Xaneiro do 2009, denunciamos os traballadores e traballadoras da Vidreira e a CIG".

A CIG-Metal de Vigo denunciou, a través dun comunicado de prensa o martes 25 de agosto, o despido dos máis de 20 traballadores da empresa Correa Montajes e Suministros SL no periodo vacacional. O empresario enviou ás cartas de despido por correo, vendeu a maquinaria e aproveitou o mes de vacacións para pechar a empresa. Existe a sospeita entre o persoal de que o empresario poda ter aberto a mesma firma, auxiliar da automoción, no norte de Portugal. Ademais a dirección da empresa xa adiantou que non pagara as indemnizacións polos despedimentos "por non ter cartos para facer fronte ás mesmas".

A CIG-Construción de Pontevedra denunciou que o dono da empresa Armarios Alonso de Sanxenxo rexeitou a proposta do delegado territorial da Xunta en Pontevedra para manter un encontro cos traballadores e coa presenza da administración autonómica como mediadora.

A folga de 15 días na Vidreira do Atlántico ficou desconvocada o domingo 5 de xullo por parte dos traballadores/as, ao considerar que a decisión da empresa de proceder ao peche de dúas liñas de produción constitúe un pechamento patronal ilegal, que tan só procura frustrar os obxectivos dos folguistas, así como pola reiterada “limitación e violación patronal do exercicio do dereito á folga e á liberdade sindical”.