Arredor duns 50 delegados e delegadas da CIG de Ferrol iniciaron este mediodía un peche na Casa do Concello en protesta polas medidas contra a clase traballadora aplicadas polos gobernos galego e español –nomeadamente á lesiva reforma laboral-, así como demandar actuacións e medidas urxentes de carácter socioeconómico para reactivar os sectores produtivos da comarca e garantir uns servizos públicos gratuítos e de calidade.

A Plataforma SOS Sanidade Pública vén de anunciar o inicio da recollida de sinaturas para presentar unha Iniciativa Lexislativa Popular no Parlamento de Galiza e frear a política de “recortes e privatizacións” do PP. A Plataforma, que terá que xuntar un mínimo de 15.000 sinaturas, quere preservar a xestión pública directa dos centros sanitarios, potenciar a Atención Primaria, a promoción da saúde como alternativa á crise e as áreas sanitarias como espazo para a planificación e a xestión dos recursos.

A CIG-Ensino denunciou este mércores que a Xunta de Galiza vén de iniciar o proceso de privatización das novas escolas de educación infantil “Galiña Azul”, logo de publicar no DOG a licitación do centro de Monteporreiro (Pontevedra), desde a data de apertura, 1 de marzo de 2012, até o 31 de agosto de 2014. En outubro do pasado ano a Federación da CIG xa alertara publicamente de que o Goberno galego tiña a pretensión de privatizar 17 escolas infantís, todas elas de nova apertura.

As federacións da área pública da CIG (Administración, Saúde e Ensino) veñen de anunciar a convocatoria dunha concentración de delegados/as ante o Parlamento de Galiza o vindeiro mércores día 21 de decembro, ás 11:30 horas, para manifestar o seu rexeitamento a uns orzamentos restritivos, que consolidan os recortes de servizos públicos e que afondan na rebaixa das retribucións dos/as traballadores/as do sector público.

CIG-Saúde de Ferrol acaba de denunciar a diminución do cadro de persoal da Área Sanitaria, xa que administración non está a cubrir postos estruturais, mais pola contra está a incrementar o número de contratacións de xornada parcial en vez de cubrir os servizos a tempo completo. Isto supón, matizan, unha precarización das condicións laborais e unha diminución da calidade na prestación dos servizos sanitarios.

A Fesga-Fundación Moncho Reboiras presenta unha reportaxe de 12 minutos de duración na que se abordan as consecuencias da privatización das caixas galegas sobre a economía do noso país. Conta coas entrevistas a Xavier Vence (catedrático de Economía Aplicada na USC), Clodomiro Montero (secretario nacional da CIG-Banca e Aforro) e máis a Carlos Aymerich (portavoz do BNG no Parlamento galego).

A CIG-Administración vén de alertar da intención da Xunta de Galiza de privatizar servizos sociais públicos e de xustificar esa decisión desacreditando o traballo que desenvolven os empregados e empregadas públicos/as. Denuncia ademais que a administración autolimita a súa capacidade de contar con persoal propio fixando unha taxa de reposición de efectivos do 10%, “auto-prohibíndose a través da lei de Orzamentos a posibilidade de contratar persoal interino ou temporal”.