A Plataforma SOS Sanidade Pública vén de denunciar, fronte as afirmacións da conselleira de sanidade, o incremento significativo da lista de espera cirúrxica da Coruña. Así, apuntan, neste momento hai, en datos recoñecidos pola propia Consellaría de Sanidade, 8.143 persoas en espera de cirurxía: 4.512 que esperan de 0 a 3 meses, 3.226 de 3 a 6 meses, 403 máis de 6 meses e 2 máis de 12 meses.

A Xunta de Persoal da Xerencia de Atención Integrada da Coruña vén de reclamar a cobertura inmediata da praza de xinecoloxía do COF do Ventorrillo, xa que logo de transcorridos tres meses o Sergas continúa sen atender as demandas do persoal sanitario e a cidadanía a este respecto. O Centro de Orientación Familiar permanece sen xinecólogo/a, logo de que o especialista que atendía o servizo se xubilase e o Sergas decidise non cubrir a praza e remitir as usuarias/os á o COF de Orillamar. Medida que suscitou a convocatoria de varias mobilizacións.

A Xunta de Persoal da Área Sanitaria da Mariña expresou o seu enérxico rexeitamento ao nacemento do Decreto de Área Sanitaria da provincia de Lugo publicado polo Goberno de Alberto Núñez Feijoo, e “que sentencia a morte á Sanidade da cidadanía da Mariña”. Unha decisión política que, advirten, centralizará as especialidades en Lugo, provocará o peche de servizos do Hospital da Costa e a destrución de emprego sanitario, "desmantelando pouco a pouco a carteira de servizos e obrigando a cidadanía a desprazarse a 100km para acudir ao/á médico/a especialista e para todas aquelas intervencións cirúrxicas non urxentes".

A CIG-Saúde da  Área de Compostela denuncia a xestión da  Xerencia Integrada  de Santiago  e a política sanitaria da Consellería de Sanidade, que facendo uso do seu plan de austeridade non están a cubrir con substitutos as prazas de médicos que están de baixa por Incapacidade Temporal. Aseguran que a diminución de persoal nos servizos afectados está a provocar unha merma da calidade asistencial, xa que as/os doentes correspondentes a estas/es facultativos téñenos  que asumir  o resto, incrementando o volume  de  pacientes nun  200% en casos como psiquiatría. Denuncian que hai doentes que teñen que ser atendidos/as mesmo por médicos en período de formación.

Miles de persoas manifestáronse este sábado en Monforte en defensa da autonomía e a capacidade de xestión do Hospital Comarcal, xa que a aprobación do Decreto de xestión integrada de ámbito provincial, suporá que os hospitais de Monforte e Burela pasarán a depender da área sanitaria de Lugo, afondando así no desmantelamento destes centros hospitalarios, na perda de servizos e no deterioro da atención prestada á cidadanía destas zonas.

Esta mañá celebrouse, na sede da CIG en Compostela, unha xuntanza entre representantes da Asociación de Hospitais Privados de Galiza (Ahospgal), nomeadamente o seu presidente, Justo Jorge López e o seu secretario, Manuel López-Pardo e en representación da central sindical o secretario xeral, Suso Seixo, a secretaria nacional de CIG-Saúde, María Xosé Abuín.

O persoal do SERGAS desenvolveu nas últimas semanas unha campaña de mobilizacións para denunciar que os recortes previstos nos Orzamentos da Xunta para 2013 provocarán a deterioración da sanidade pública galega e das condicións laborais e salariais do seu persoal. A secretaria nacional de CIG-Saúde, María Xosé Abuín, advirte de que con estas medidas non se trata de paliar a crise, senón de aplicar a folla de ruta que o Partido Popular puxo en marcha desde a súa chegada ao goberno da Xunta e que persegue, tal e como explica nesta entrevista, a súa privatización.