Na folga do 8 de maio de 2007 en quenda de mañá mínimos 100, agora 210, en quenda de tarde había 43 e agora 139 e na quenda de noite había 14 e agora 47, Total de 157 pasa agora a 396. A CIG-Saúde de Vigo denuncia que "o SERGAS nun alarde de totalitarismo e imposición enviou un borrador de servizos mínimos para a folga do día 25 de marzo que en Primaria se incrementa en mais do 250% con respecto á última folga convocada".

Pouco despois das oito da tarde foi cando a chuvia deu unha tregua e a manifestación convocada pola Xunta de Persoal do Chuvi podia comezar a súa mobilización. Despois dunha xornada de folga na que conseguiron paralizar a actividade ordinaria dos hospitais do Chuvi, saían ás rúas da cidade olívica para demandar unha sanidade pública e que non se privatice o novo hospital de Vigo.

Segundo os datos recadados por CIG-Saúde a incidencia da folga no CHUVI supera o 75% de participación. Asi, a federación de saúde da central sindical nacionalista considera que estes datos "dan boa mostra da boa resposta das traballadoras e traballadores á convocatoria de paro. Non cabe resaltar incidentes durante o que vai de xornada salvo os normais nestes casos en canto ao cumprimento do traballo ordinario por parte dos servizos mínimos". Ademais realizan un chamamento a participar na manifestación que hoxe 24 de febreiro está convocada en defensa da sanidade pública e contra a privatización que sairá do Hospital Xeral e que rematará fronte á Xunta.

Nova concentración do persoal no H. Meixoeiro o luns 22 de febreiro ás 11h. Con boa participación a pesar do mal tempo, o persoal puido co temporal. No percorrido as traballadoras e traballadores entraron na lavandería "para pasar pola secadora" e continuar ao remollo no exterior.

O mércores 17 de febreiro celebrouse o fin do Entroido co enterro da sanidade pública como protagonista no desfile de comparsas que se celebrou en Vigo. Unha gran participación chea de sentido do humor e reivindicativa percorreron as rúas de Vigo con cánticos e berros en contra da privatización da sanidade pública en Vigo que pretende materializar o Partido Popular dende o seu poder na Xunta de Galiza.

Outro éxito mais de participación na concentración que se celebrou o xoves 4 de febreiro no Hospital do Meixoeiro para protestar contra a privatización do novo hospital de Vigo. Unhas 800 persoas participaron nesta protesta que percorreu os arredores do hospital e que logo se dirixiu cara ás dependencias da dirección do centro.

O pasado luns día 1 de febreiro constituíase a Plataforma contra a Privatización e polo Hospital Único de Pontevedra da que forman parte asociacións de veciños, organizacións sindicais, políticas, concellos e a Asociación Galega en Defensa da Sanidade Pública (AGDSP). Só CCOO decidiu quedar á marxe. A plataforma fará a súa presentación pública no café Moderno o próximo día 11 de febreiro.