Ante as declaracións realizadas polo Presidente da Autoridade Portuaria da Coruña, a CIG quere destacar que foi a propia Inspección de Traballo quen constatou que se retomaron os traballos de desmontado da grúa (paralizados logo da morte dun operario) sen a autorización pertinente e que a central sindical tan só expuxo ante a opinión pública esta situación. Así mesmo, a CIG lamenta que o Porto, en lugar de depurar responsabilidades por estes graves feitos, se limite a criticar a CIG e non a investigar e condenar aos culpábeis do accidente e a quen incumpriu o Requirimento da Inspección.

A CIG quere denunciar publicamente o persistente silencio mantido pola Autoridade Portuaria da Coruña quen, a pesar do gravísimo accidente que custou a vida a un traballador de Grúas Usabiaga, once días despois continúa sen convocar a Mesa de Seguridade de Langosteira. Ademais, a Inspección de Traballo ten paralizadas as tarefas de desmontado da grúa na que se produciu o accidente até que non se garantan todas as medidas necesarias para realizar os traballos de xeito seguro.

O 100% do cadro de persoal da UTE-Langosteira está secundando o paro de 24 de horas convocado polo Comité nas obras do Porto Exterior da Coruña en rexeitamento ao accidente que o pasado venres lle custou a vida a un traballador de Grúas Usabiaga, afiliado á CIG. Con este paro o persoal tamén quere trasladar a súa solidariedade á familia do afectado e reclamar a revisión e reforzamento das medidas de seguridade nas obras do porto.

Diante do gravísimo accidente ocorrido esta tarde nas obras do Porto Exterior da Coruña que lle custou á vida a un traballador de Grúas Usabiaga, a CIG esixe á dimisión dos máximos responsábeis da Autoridade Portuaria en materia de seguridade, así como que se depuren as posíbeis responsabilidades penais por este feito.

Tras da xuntanza do Comité de Seguridade e Hixiene mantida na tarde de onte, a CIG e o Comité de empresa lamentan que a día de hoxe, a UTE-Langosteira e a Autoridade Portuaria non estean en condicións de presentar o informe do accidente sucedido o pasado 7 de xuño nas obras do Porto Exterior nin avanzar as posíbeis causas que expliquen a caída doutra grúa este mesmo mércores. A central sindical e o Comité de empresa reclaman ditos informes co único obxectivo de mellorar o plano e a aplicación de medidas de seguridade, que a vista está, resultan insuficientes.

O persoal de Albada realizou unha nova concentración esta mañá ás portas do Concello da Coruña en demanda da negociación dun novo convenio colectivo que recolla melloras salariais e avances en materia de seguridade e saúde laboral. Durante protesta, os traballadores e traballadoras da planta de reciclado de Nostián tamén demandaron a intermediación do Concello neste conflito, pois “esta é unha concesión municipal e o Concello ten moito que dicir”.

A sección sindical da CIG en Alcoa vén de denunciar publicamente que a multinacional incumpre as medidas de seguridade laboral na área de Electrólise por falta de persoal. A central hai tempo que advirte dos problemas derivados de axustar o cadro de traballadores/as ao mínimo. Por iso, pedíronlle ao conxunto dos traballadores e traballadoras da fábrica que extremen as medidas de prevención e reclaman á empresa que cubra todas as necesidades de persoal que existan.