A federación de Químicas e Enerxía vén de manifestar a súa solidariedade co Sindicato Mexicano de Electricistas (SME), en loita desde hai dous anos tras extinguirse, por decreto presidencial a empresa pública de electricidade “Luz y Fuerza de Centro” e con ela despedir aos 44.000 traballadores/as que desenvolvían a súa actividade na mesma

Coa finalidade de dar unha proxeción internacional á loita do Sindicato Mexicano de Electricistas, e no contexto da preparación das mobilizacións do 16 de marzo, a Federación Sindical Mundial organizou unha Conferencia Internacional de Solidariedade co SME, na que estivo representada a Federación de Químicas e Enerxía da CIG e que aprovou por unanimidade a Resolución que reproducimos a seguir.

Neste 16 de marzo, una ampla coalición de organizacións sindicais, sociais, políticas e cidadás, conformando a Asemblea Nacional da Resistencia Popular (ANRP) e nas que hai que salientar o Sindicato Mexicano de Electricistas, o Sindicato Nacional de Mineiros Metalúrxicos e Similares da República Mexicana e os mestres da Coordenadora Nacional de Traballadores do Ensino chamaron á clase traballadora de México a unha xornada de Folga Nacional Política, de loita e mobilizacións, a colocar milleiros de bandeiras de folga (vermella e negra), nas escolas, bairros populares, comunidades agrarias e centros de traballo para amosar o seu rexeitamento ao peche e privatización da compañía eléctrica Luz y Fuerza, contra as políticas neoliberais, e pola defensa dos dereitos constitucionais violados polo “mal-goberno”.