Diante das alternativas que se están a barallar por parte dos gobernos central e galego para atallar a crise económica, “a conta dun sacrificio enorme por parte da maioría social, que son os traballadores/as, mentres que aqueles que a provocaron van saír de rositas”, a CIG acordou darlle un carácter máis mobilizador a este 10 de marzo, Día da Clase Obreira Galega. Por iso, este ano convocará manifestacións nas sete cidades do país baixo o lema “O emprego, os salarios e as pensións deféndese loitando”. Ademais, celebrará, por cuarto ano consecutivo, o Premio do Día da Clase Obreira Galega, nun acto que terá lugar, en Compostela, o día 9 de marzo.

Analizar a actual situación de crise económica e as causas que nos levaron a ela, as repercusións que está a ter na economía galega e na súa clase traballadora e pór en común as medidas políticas e sindicais que cada organización entende que se deberían aplicar, fronte ás que está a adoptar o goberno central e a inacción do goberno galego, foron os temas abordados na xuntanza que mantiveron na mañá de onte as executivas da CIG e do BNG.

CCOO, UGT e as patronais CEOE e CEPIME veñen de asinar un preacordo estatal de negociación colectiva cunha vixencia de tres anos que supón, na práctica, a conxelación dos salarios dos traballadores e traballadoras afectados. O preacordo prevé un incremento salarial cun tope do 1% para o 2010, de entre o 1 e o 2% para 2011 e de entre o 1,5 e o 2,5% para 2012, cunha clásula de revisión salarial ao remate do período. A CIG entende que este preacordo é “claramente negativo”, que se impuxeron as teses da patronal e que transcorridos os tres anos tampouco se aplicarán as cláusulas de revisión salarial.

Desde as dez da mañá no Salón de Actos dos Capuchinos na cidade de Vigo tiña lugar a primeira asemblea de delegados e delegadas da Unión Comarcal da CIG de Vigo do ano 2010. Neste encontro analizouse a situación da comarca no actual contexto da crise, asi como se tratou a problemática da fusión das caixas, a tentativa de privatización do novo hospital de Vigo, as accións da asemblea de parados do naval, o conflito do Alcampo polos despedimentos de todos o persoal da limpeza, e a loita de Alfageme polo mantemento dos seus postos de traballo. Ademais Suso Seixo, secretario xeral da CIG, presentou o Documento Confederal de Alternativas para facer fronte á crise.

A Confederación Intersindical Galega vén de presentar o documento “Políticas alternativas fronte a crise”, onde se analiza o actual contexto de crise económica e se apuntan medidas dirixidas non só a enfrontala senón mesmo a camiñar cara un novo modelo económico e produtivo. Suso Seixo, secretario xeral da CIG, adiantou na súa presentación, que estas propostas non quedarán só no papel, senón que o obxectivo é “propiciar un debate para que se tome consciencia da situación” e iniciar mobilizacións para exixir a súa aplicación.

Máis dun milleiro de delegados e delegadas da CIG percorreron as rúas de Compostela en defensa do emprego, da galeguidade e do carácter social das caixas. Antes da manifestación os delegados e delegadas participaron nunha asemblea nacional na que Clodomiro Montero, secretario nacional da federación de Banca e Suso Seixo, secretario xeral da CIG, explicaron a situación na que se atopan as caixas galegas e cal é a alternativa da CIG.