As traballadoras e traballadores de Alfageme, tanto na factoría de Vigo como na de Ribadumia, emprenderon mobilizacións desde a primeira semana de abril, e de novo na xornada do luns 12 de abril para demandar implicación das Administracións na solución ao conflito aberto na conserveira.

Milleiros persoas secundaron a manifestación convocada pola Plataforma pola Defensa da Sanidade Pública de Ferrol, da que forma parte a CIG, en contra da privatización da sanidade. A marcha, enmarcada no amplo calendario de mobilizacións que se están a desenvolver por todo o País contra a política privatizadora do goberno do PP, saíu ás doce do mediodía dende a Praza de España e rematou hora e media despois na Praza de Armas, onde se deu lectura ao manifesto da Plataforma.

O Consello da Xunta de Galiza tomou a decisión nesta primeira semana de abril de anular o proxecto industrial do Val de Rábeda, unha medida que recebe as críticas da CIG da comarca de Ourense polo que ten de discriminatoria con esta provincia, asi como polo necesario deste proxecto que xa dera os seus primeiros pasos.

As organizacións sindicais veñen de convocar unha concentración de delegados e delegadas da administración autonómica en contra das intencións da Consellaría de Educación de desmantelar 18 comedores escolares e eliminar 71 postos de traballo relacionados con este servizo público. A protesta terá lugar o venres 9 de abril, ás 11:00 horas, diante do complexo administrativo de San Caetano, e nela participarán os catro Comités da Consellaría.

Tras da publicación dos últimos datos do paro, a CIG de Ourense volve advertir dos “estragos que a crise” está a provocar nas taxas de emprego da provincia, así como do imparábel incremento do número de empresas que presentan expedientes de regulación. Dende a CIG-Ourense insisten na necesidade que a Xunta de Galiza deseñe un plano especial de actuación para esta “zona subdesenvolvida”, pois de seguir así, alertan, “camíñase cara a un pozo sen saída”.

Queremos Galego presentou esta mañá en A Coruña a campaña de difusión social do texto da Iniciativa Lexislativa Popular pola garantía dos dereitos lingüísticos nos ámbitos da administración e do ensino, que a plataforma cidadá vai desenvolver até o vindeiro mes de xuño. A campaña, que xa ten pasado por Ourense, Carballiño ou Noia cun notábel éxito, arrincou hai dúas semanas en Ferrol e chegará a partir do 16 de abril a A Coruña, onde cada venres se instalará unha mesa informativa en distintos barrios da cidade para dar a coñecer o texto da ILP, ademais de realizar toda unha serie de actos lúdicos e festivos durante os vindeiros meses. Así mesmo, está previsto un acto en Carral o vindeiro 24 de abril, coincidindo coas celebracións dos mártires.

A semana próxima as mobilizacións en defensa da sanidade pública galega van continuar nas cidades de Pontevedra e Ferrol. Organizacións sindicais e a Plataforma para a defensa da sanidade da área ferrolá teñen convocadas cadansúa manifestación os días 7 e 11 de abril, respectivamente, en contra das medidas privatizadoras que o goberno galego está a pór en marcha e na defensa dos postos de traballo. A manifestación de Pontevedra sairá dende o CHOP ás 20:30 horas, mentres que a de Ferrol farao dende o Ambulatorio Fontenla Maristany, ás doce do mediodía do domingo.