A CIG denuncia que a falta de vontade política da Xunta de Galiza fai practicamente imposíbel o mantemento de 150 empregos nas plantas de Vilaxoán e Ribadumia da conserveira Alfageme. Dende a central nacionalista sosteñen que as traballadoras séntense enganadas polos responsábeis autonómicos despois de que apoiasen publicamente a venta da empresa a un grupo cántabro cando dous días antes o Igape comunicoulle ao xulgado que non se faría cargo do importe dos avais, requisito imprescindíbel para facer posíbel a operación.

Un grupo de traballadoras de Alfageme pechouse esta mañá nas dependencias da Xunta de Galiza en Pontevedra para reclamarlle ao Igape que negocie a liberación dos avais da conserveira para posibilitar a cancelación das débedas coas entidades acredoras. Arredor das 15.00 horas decidían abandonar a protesta despois de que o director do Igape se comprometese a retomar as negociacións cos bancos.

Máis de 400 empregados/as da delegación da Xunta de Galiza en Vigo realizaron este mediodía unha concentración de protesta diante do edificio autonómico para amosar o seu rexeitamento aos recortes laborais propostos polo Goberno galego. O vindeiro xoves levarán a cabo concentracións fronte aos centros de traballo e máis adiante convocarán outro fronte ao Marco.

Máis de 3.000 traballadores e traballadoras do sector público déronse cita esta mañá diante de San Caetano, coincidindo coa celebración do Consello da Xunta. O que inicialmente estaba previsto como unha concentración de delegados e delegadas converteuse finalmente nunha masiva mobilización á que se sumou todo o persoal que por proximidade ou por quendas puido ir a manifestar o seu máis rotundo rexeitamento aos recortes propostos polo goberno do PP. O persoal, que participou masivamente nas asembleas convocadas polas organizacións sindicais, chegou a fletar autobuses desde diversos puntos de Galiza para sumarse a esta mobilización convocada con carácter de urxencia.

A federación de Administración da CIG reclama publicamente a supresión “inmediata e definitiva” do coñecido como plus de altos cargos despois de que o presidente da Xunta de Galiza anunciase a súa suspensión temporal. Dende a central nacionalista cualifican esta medida de demagóxica e critican que se poña á mesma altura un complemento salarial que un por enfermidade ou accidente non laboral.

Un grupo de traballadoras/es de Alfageme concentráronse esta mañá diante da delegación da Xunta de Galiza en Vigo para reclamarlle ao Goberno galego que libere os avais concedidos no seu día á conserveira co obxectivo de que se poida liquidar o proceso concursal e proceder á venta da empresa. Dende a FGAMT-CIG lembraron que unha sentenza recente recoñece que a familia propietaria pretende dilatar o procedemento e anuncian que seguirán coas mobilizacións até que exista un compromiso firme por parte dos responsábeis autonómicos.

O cadro de persoal de Islas Industries, empresa dedicada á instalación de canalizacións navais e industriais con sede no polígono de Vincios, en Gondomar, realizou hoxe unha concentración de protesta fronte ao edificio da Xunta en Vigo para reclamar a denegación do ERE extintivo que afectará ao 80% dos empregados/as. Dende a CIG-Metal sosteñen que a medida non se atopa debidamente xustificada e denuncian que agocha un intento da patronal de “desfacerse dos seus traballadores/as para contratar man de obra barata”.