O pasado venres 15 de xullo o DOG publicou a Lei 4/2011 de convivencia e participación da comunidade educativa. Segundo a CIG-Ensino, nos vindeiros meses poderemos comprobar como esta norma foi imposta cos votos do PP no Parlamento galego co único obxectivo de procurar un mecanismo máis para reducir a presenza da nosa lingua no sistema educativo.

A CIG-Ensino denuncia que o Consorcio Galego de Igualdade e Benestar volve dar razón da súa incompetencia xa que sabe desde decembro que non ten xente nas listas de substitucións para cubrir as vacantes do seu persoal das galescolas (agora galiña azul) “pero non abre as listas para contar co persoal necesario para que as poidan funcionar con normalidade durante os meses de verán”.

As traballadoras e traballadores da conserveira Alfageme dos centros de Vilaxoán, O Grove, Ribadumia e Vigo realizaron hoxe unha concentración diante da delegación da Consellería de Industria e do Igape na cidade olívica para denunciar a falta de información e a “nula implicación” da Xunta de Galiza no conflito laboral iniciado pola entrada da compañía na lei concursal. Representantes da CIG e do comité de empresa reclamaron a dimisión do conselleiro Javier Guerra e do presidente do Igape despois de que non lles trasladase os detalles das ofertas de compra existentes durante a xuntanza que tivo lugar onte.

Os membros da Xunta de Persoal do Sergas, representando ás traballadoras e traballadores da Sanidade Pública da área de Vigo, concentráronse esta mañá diante do edificio administrativo da Xunta de Galiza na cidade para rexeitar a licitación do novo hospital, que ao seu xuízo abre a porta á privatización da sanidade pública.

As centrais sindicais CIG, UGT e CCOO compareceron este martes en rolda de prensa para anunciar a convocatoria de mobilizacións e dunha xornada de folga no sector das ambulancias de Galiza en contra do recorte nos servizos que pretende a Xunta, recollido do borrador do novo Decreto do transporte sanitario, así como da rebaixa salarial que a patronal vén de anunciar a través dos medios de comunicación. As centrais sindicais desenvolverán asembleas ao longo desta semana para propor ao conxunto dos traballadores e traballadoras do sector a realización dun calendario de protestas contra este novo ataque aos servizos públicos, que ademais podería desencadear a destrución de máis do 30% dos actuais cadros de persoal.

A CIG-Administración Autonómica presentou unha denuncia contra a Consellería de Traballo na Axencia de Protección de Datos pola cesión de expedientes da Lei de Dependencia sen o consentimento dos interesados á empresa Indra Sistemas. Solicitou tamén unha entrevista coa secretaría xeral de Traballo para frear a privatización dun servizo que a Xunta “está a deixar esmorecer para xustificar unha xestión privada” e obtivo como resposta un escrito “bochornoso” que di que a privatización é unha proposta dos traballadores/as e critica a xestión do bipartito.

A CIG-Autonómica reclama a dimisión do responsábel do distrito forestal de Ourense (Miño-Arnoia), Olivier Reboredo Campos, e do xefe territorial da Consellería de Medio Rural, Ricardo Vecillas, por seren os responsábeis de actuacións “improvisadas e arbitrarias” que poñen en risco vidas durante a extinción de lumes.