Queremos Galego anuncia mobilizacións xerais no ensino se a Xunta mantén a súa intención de derrogar o decreto 124/07

Organizacións integradas na Plataforma Cidadá ‘Queremos Galego’ do ámbito do ensino, manifestaron en rolda de prensa as súas inquedanzas polo clima de “incerteza” que se vive nas aulas perante a previsíbel derrogación do decreto 124/07 de uso e promoción do galego no ensino. Un decreto que mantén a súa vixencia no presente curso escolar pero que está previsto que sexa substituído por un novo texto. As organizacións participantes denunciaron que ese novo texto, tal e como foi anunciado, “suporía o primeiro retroceso legal en 30 anos de período autonómico e presenza legal do galego no ensino”.

CIG-Ensino, AS-PG, STEG, Comités, iniciativa Estudiantil Galega, Sindicato de Estudantes, A Mesa pola Normalización Lingüística e varias federacións comarcais de asociacións de nais e pais integradas na plataforma ‘Queremos Galego’ coincidiron en sinalar que “non están dispostas a tolerar” ningún retroceso legal” que supoña “unha volta ao pasado” ou “calquera clase de texto legal que supoña unha redución da presenza efectiva do galego nas aulas”.

De feito manifestaron a súa disposición a convocar unha mobilización xeral ou xornada de loita de toda a comunidade educativa, en todas as súas etapas, en canto se faga público o contido do novo decreto co que se pretende substituír o actual.

Porén, malia ser unha convocatoria que teñen que protagonizar as diferentes organizacións do ensino, estas serán vehiculizadas tamén desde a propia estrutura de ‘Queremos Galego’ xa que “a derrogación do actual decreto non constitúe só un ataque ao sistema educativo, senón que afecta a toda a sociedade no seu conxunto”.

Estas organizacións manifestaron tamén a súa preocupación polo que entenden como “un exercicio de total insubmisión” da consellaría de Educación a respecto da súa propia lexislación vixente, asegurando que “non é só que non garantan o pleno cumprimento do decreto 124/07, que é de aplicación durante o presente curso escolar, senón que cada declaración pública acaba por se converter nun convite expreso á desobediencia”.

Alén diso, denunciaron que a situación actual continúa a ser “de xeneralizado incumprimento do decreto en vigor” e que alí onde se aplica é exclusivamente grazas “ao esforzo e compromiso, moitas veces mesmo persoal, da comunidade educativa”. Por iso, reclamaron recursos, recoñecemento e formación axeitados para o profesorado.

Neste sentido, Anxo Louzao, secretario nacional da CIG-Ensino, alertou da posibilidade de que o PP caia na tentación de dalo a coñecer xusto antes da ponte da vindeira semana ou mesmo durante as vacacións do Nadal “co obxectivo de desactiva a resposta social”. Louzao lembrou que esa é a dinámica que vén seguindo o goberno do PP, que fixo algo semellante coas Escolas Oficiais de Idiomas e afirmou que “sería unha boa mostra do talante prepotente e antidemocrático de quen despreza a opinión da comunidade educativa e da sociedade”.