Logotipo CIG Confederación Intersindical Galega - Avantar - Compostela 20/1/2010
Foi subscrito por xuíces, fiscais, avogados e profesores universitarios
Xuristas de diferentes ámbitos presentan un documento crítico coas bases para a elaboración do decreto do 'plurilingüismo'
O dereito á educación non está suxeito ao voto das familias; o ensino obrigatorio debe garantir un coñecemento igual do galego e do castelán; as linguas estranxeiras non son linguas oficiais; o galego é unha lingua propia do ensino en Galiza e o ensino en galego está amparado polo Dereito Internacional. Estas son algunhas das conclusións máis salientábeis do documento presentado, en rolda de prensa, por un grupo de xuristas tras analizar, do punto de vista xurídico, as “Bases para a elaboración do decreto do plurilingüismo no ensino non universitario de Galicia”.
10-01-20 xuristas decreto
De esquerda a dereita, Luís Villares, Alba Nogueira e Héctor López de Castro

Tras facerse públicas as bases para a elaboración do novo decreto, chamado “do plurilingüismo” polo goberno do PP, a finais de decembro do pasado ano, e diante da polémica suscitada, un grupo de xuristas realizou unha análise, do punto de vista xurídico, sobre os seus contidos.

O documento resultante foi subscrito por un grupo plural e representativo de xuristas galegos de diferentes ámbitos: xuíces, maxistrados e fiscais, entre os que se atopan dous presidentes de sala de audiencias provinciais; avogados, entre os que cómpre salientar aos decanos de Lugo e Vigo; e profesores universitarios, entre eles varios catedráticos.

Na presentación desta análise xurídica, na que participaron Luís Villares, xuíz; Alba Nogueira, profesora de dereito Administrativo da USC; e Héctor López de Castro Ruíz, avogado da CIG, matizouse que, en todo caso, este grupo de xuristas non está enmarcado en ningunha plataforma ou colectivo, nin ten a pretensión de constituírse como tal, senón que se agrupa en torno ao documento presentando e as consideracións xurídicas que contén.

Polo seu interese, reproducimos en pdf. o documento íntegro e as adhesións ao mesmo.

1