Logotipo CIG Confederación Intersindical Galega - Avantar - A Coruña 18/2/2011
O Deán da catedral recibiu a un membro do Comité de empresa, que lle explicou a situación das empregadas e pediu que medie para que Sogama cumpra cos acordos de recolocación
As traballadoras despedidas de Danigal levan as súas reivindicacións até a catedral de Santiago
Unhas 20 traballadoras despedidas por Danigal na planta de envases lixeiros da Areosa, acompañadas por sindicalistas da CIG e membros do Comité do Complexo Medioambiental, trasladaron esta mañá as súas reivindicacións até o interior da catedral de Santiago. Alí foron atendidas polo deán, a quen solicitaron a súa mediación diante de Sogama para conseguir que se respecte o convenio colectivo e os acordos de recolocación.

11-02-15 Folga Sogama 1

Na quinta xornada da paros no Complexo Medioambiental de Cerceda (CMC), e tras da negativa de Sogama a abrir un proceso de diálogo directo coa representación do persoal, as traballadoras despedidas na planta de envases lixeiros que xestionaba Danigal acordaron recorrer a "instancias superiores” co obxecto de dar un pulo á marcha do conflito e avanzar na consecución de medidas concretas para a súa recolocación.

Así, unhas 20 traballadoras, acompañadas por sindicalistas da CIG e membros do Comité de empresa, trasladáronse na mañá deste venres até Compostela para expor as súas demandas ante o arcebispado. Dende as 10:30 horas, explica Adolfo Naya, da CIG-Servizos, as afectadas instaláronse no interior da catedral, até onde levaron unha faixa informando da súa complicada situación laboral.

O colectivo de afectadas decidiu levantar finalmente a protesta sobre as 17:30 horas, logo de seren atendidas polo deán da catedral, José María Díaz, quen recibiu a un representante do Comité de empresa que lle informou da situación das traballadoras e explicou os motivos que xeraron o actual conflito. Pola súa banda, José María Díaz transmitiu o seu apoio ás mulleres e indicoulles que realizaría todas as xestións que estivesen na súa man para acadar unha solución positiva ao conflito. 

O colectivo de traballadoras quixo agradecer tanto ao deán como aos membros da catedral a atención e o trato recibido durante todo o tempo que permaneceron no histórico edificio.

O obxectivo da protesta realizada hoxe é o mesmo que vén movendo a estas traballadoras dende que a mediados de novembro recibiran as cartas de despedimento: buscar todos os intermediarios posíbeis para conseguir que Sogama asuma o cumprimento dos acordos de recolocación asinados no CMC.  

1