Logotipo CIG Confederación Intersindical Galega - Avantar - Vigo 2/6/2011
A empresa louseira de Valdeorras terá que repetir as eleccións sindicais despois de que a candidatura da central fose avalada por Traballo
Cafersa segue a impedir que representantes da CIG informen libremente os traballadores e traballadoras
A dirección de Canteras Fernández (Cafersa) volveu impedir que representantes da CIG entraran nas instalacións da empresa para celebrar unha asemblea informativa cos traballadores/as na súa hora de descanso. A Consellería de Traballo validou recentemente a candidatura da CIG ás eleccións sindicais na compañía despois do laudo presentado pola Unión Local de Valdeorras contra a decisión da mesa electoral de deixar fóra a súa lista. A decisión retrotrae o proceso á proclamación das candidaturas.

20100304cafersa

Panfleto que está a ser repartido entre os traballadores e traballadoras de Cafersa:

COMPAÑEIROS E COMPAÑEIRAS

O vindeiro mércores dia 8 de xuño terán lugar as eleccións sindicais para elixir os representantes dos traballadores e traballadoras en Cafersa.

As persoas que nos presentamos pola Confederación Intersindical Galega (CIG) pedímosvos o voso voto. É a primeira vez que nesta empresa se presenta unha candidatura libre e democrática, sen intervención dos patróns.

Lembra que o teu voto e secreto, non te deixes intimidar pola empresa nin por ninguén, vota en conciencia e libremente, recordando sempre que esta candidatura é unha aposta polo noso futuro.

Todos sabemos que a empresa vai facer presións e mesmo chantaxe para intentar que non nos votedes. Non vos dobreguedes. Recordade que o voto é secreto e que temos a obriga de defender a democracia.

XA É HORA DE QUE ENTRE A DEMOCRACIA EN CAFERSA

CHEGOU O TEMPO DA DEMOCRACIA

VOTA A CANDIDATURA DA CIG

1