Logotipo CIG Confederación Intersindical Galega - Avantar - Vigo 22/12/2011
Os traballadores/as concentráronse diante da sede da compañía en sinal de protesta
Nova xornada de folga na empresa Establecementos Pérez Leirós do Porriño para esixir o pago dos salarios pendentes
O persoal da empresa Establecementos Pérez Leirós do Porriño convocou recentemente unha nova xornada de folga para protestar contra o crecente deterioro da compañía, que adebeda varias pagas extraordinarias, ademais do salario de setembro a varias persoas, e de outubro en diante a todo o persoal.

2011 12 22FolgaPerezLeiros

Dende a CIG explican que esta emblemática empresa do Porriño está a pasar por unha grave situación froito do abandono que sistematicamente ten sufrido por parte dos propietarios, pertencentes ao grupo Pérez Leirós.

Hai un ano comezou o declive de Castelo e todas as empresas vinculadas ao mesmo sector do cemento, onde ficaron enterrados moitos millóns de euros. Parte dese capital procedía dos Establecementos Pérez Leirós, que nunca recibiu a atención necesaria para adaptarse aos tempos actuais, nun sector tan competitivo como é o do comercio.

Agora, cunha débeda salarial que até o 2010 ía pagándose con compras a quen desexaba facelo, a empresa, símbolo noutros tempos do comercio no Porriño, está nunha situación límite, mentres os seus propietarios ollan para outra parte, como se con eles non fora o asunto.

Non é pouco o que debe ao seu persoal, tendo en conta que no convenio do comercio do metal, polo que se rexen, o salario anual é dividido en 16 pagas (catro extraordinarias). Por iso a débeda das pagas extraordinarias desde outubro 2009 supón o 25% do salario anual, “e nin así se manteñen ao día o salario mensual”.

Os traballadores e traballadoras concentráronse a partir das 9.30 horas fronte á entrada do bazar, fronte ao Concello do Porriño. Despois destas dúas xornadas de protesta (días 14 e 21 de decembro), o persoal debaterá en próximas datas a posibilidade de novas protestas.

1