Logotipo CIG Confederación Intersindical Galega - Avantar - Vigo 18/7/2012
A Audiencia Provincial de Pontevedra desestimou o recurso presentado pola familia Lago para frear a execución dos préstamos achegados polo Igape
A CIG reclámalle á Xunta que cumpra o seu compromiso e libere os avais que permitirían a venda da conserveira Alfageme
A Audiencia Provincial de Pontevedra vén de desestimar o recurso presentado pola familia Lago, propietaria da conserveira Alfageme, para frear a execución dos avais de 35 millóns de euros que o Igape lle concedera á compañía. Dende a CIG reclámanlle á Consellería de Industria que cumpra o seu compromiso e libere os avais para que a firma poida ser vendida ao Grupo Consorcio, o que permitiría o mantemento da actividade e dos postos de traballo nas plantas de Vilaxoán e Ribadumia.

2011 03 22 protestaAlfagemeXuntaVigo2

A decisión xudicial ratifica o que viña demandando a central nacionalista, polo que agora a Xunta ten que cumprir o seu “compromiso político” e proceder á execución dos avais para posibilitar a cancelación das débedas coas entidades acredoras e permitir a venda da compañía conserveira. “O conselleiro de Industria comprometérase a facelo cando se coñecese o auto, pero atópase de viaxe e non sabemos nada”, indican dende a CIG.

Neste senso, adiantan que lle solicitarán unha xuntanza ao titular do departamento autonómico “porque o proceso non se pode dilatar máis, xa que a administración concursal podería poxar a empresa e non manter os postos de traballo”. Finalmente, expresaron o seu temor a que a Xunta non cumpra o prometido e aseguraron que nese caso non descartan iniciar mobilizacións.

1