Logotipo CIG Confederación Intersindical Galega - Avantar - Compostela 14/8/2012
Están previstas entre as 10:00 e as 12:00 horas, os días laborábeis do mes de agosto e setembro
Mobilizacións diarias en Hermanos Rodríguez Gómez contra os despedimentos e para reclamar os salarios pendentes
Os 60 traballadores da empresa de maquinaria industrial Hermanos Rodríguez Gómez y Pescatech, ubicada en Bouzas, Vigo, acordaron iniciar, desde este luns, mobilizacións. Dúas horas de folga parcial, entre as 10:00 e as 12:00 horas, todos os días laborábeis durante os meses de agosto e setembro, para denunciar que levan sen cobrar desde o mes de marzo, que o grupo pretende despedir a 40 traballadores sen pagarlles o que lles adebeda e sen indemnizacións e para exixir solucións inmediatas.

12-08-13 Hermanos Rodriguez Gomez 000

Fernando Cabaleiro, representante da CIG no Comité de Empresa, asegura que segue habendo carga de traballo, pero que os provedores xa non subministran por mor das débedas acumuladas con eles. Débedas que tamén son contiosas coa Seguridade Social, con Facenda e coas empresas auxiliares.

Considera que esta situación viu provocada pola mala xestión empresarial e afirma que a pretensión dos propietarios é provocar que sexan os propios operarios quen acaben por deixar o posto de traballo agobiados pola situación económica, para así evitar abonar a correspondente indemnización e os salarios atrasados.

No mes de xuño xa protagonizaron varias xornadas de folga para presionar ao empresario e poder cobrar algo. Daquela aínda non se presentara a proposta de despedimento que anunciaron neste mes. Por iso acordaron convocar, desta volta, mobilizacións continuadas.

A CIG de Vigo denuncia que o cadro de persoal, que ten unha antigüidade media de 30 anos, está en situación de emerxencia, polo deterioro da situación laboral e polo incerto futuro que lles agarda. Serafín Otero, secretario comarcal, demanda solucións inmediatas e alerta da grave situación económica e laboral na que se atopa a comarca de Vigo, con outra empresa rendíbel que se atopa en situación desesperada.

Galería de imaxes

1