Logotipo CIG Confederación Intersindical Galega - Avantar - Vigo 12/9/2012
Os empregados/as da empresa con sede en Bouzas realizan quendas de 24 horas para evitar a saída de material
Os traballadores/as de Hermanos Rodríguez cumpren máis dun mes en folga para reclamar o pago dos salarios pendentes
Os traballadores/as da empresa Hermanos Rodríguez Gómez de Vigo levan xa máis dun mes en folga para reclamar o pago dos máis de sete meses de salarios que se lles adebeda. Dende hai varias semanas manteñen vixiadas as instalacións da compañía, no peirao de Bouzas, en quendas de 24 horas para evitar a saída de material, mentres que para o luns teñen convocada unha nova manifestación.

2012 09 12 ProtestaHermanosRodriguezVigo01

Dende o comité de empresa (2 CIG, 2 UGT e 1 independente) explican que adoptaron a decisión despois de que os problemas para cobrar iniciados hai meses se agudizasen nos últimos tempos. A duración dos paros foi inicialmente de dúas horas diarias, mentres que na actualidade esténdense xa a media xornada.

Ao mesmo tempo, un nutrido grupo de traballadores/as concéntrase todos os días fronte á compañía e mantén as instalacións vixiadas en quendas de 24 horas para evitar que o propietario poida sacar maquinaria ou material, como xa intentou con anterioridade.

Os representantes do cadro de persoal, composto por máis de 60 persoas, denuncian tamén que a compañía vén de presentar un ERE extintivo para todos os empregados/as e anuncian que seguirán coas mobilizacións no caso de que a empresa continúe sen abonarlles os soldos. De feito, o vindeiro luns celebrarán unha manifestación que partirá ás 11.00 horas do colexio Santiago Apóstol (Sanjurjo Badía, 79) para rematar fronte á sede de Asime (Doutor Corbal, 21).

1