Logotipo CIG Confederación Intersindical Galega - Avantar - A Coruña 20/9/2012
A toma de posesión do persoal que participou no concurso estaba prevista para este mes de setembro
CIG-Administración denuncia que a Xunta paraliza o concurso de traslados de 400 veterinarios/as “por interese electoral”
O Sector de Autonómica da CIG-Administración denunciou publicamente a paralización do concurso de traslados de máis de 400 veterinarios/as para evitar, segundo puido saber a Federación, que se produzan as disfuncións propias neste tipo de procesos (tempo entre o cese e a incorporación, persoal que asume tarefas novas nos matadoiros, lonxas, oficinas agrarias comarcais, etc.) e así non se “empane a campaña electoral do PP no rural”.

08-12-16 San Caetano

O responsábel do sector, Fernando García, sinala que a finais de xuño había constancia de que a  toma de posesión do persoal veterinario que participou nun concurso de traslados sería en setembro. “Porén, agora a Dirección Xeral de Función Pública bota para atrás e retira a publicación que estaba prevista para o día 19 no DOG”, critican.

A respecto dos posíbeis motivos desta decisión, CIG-Autonómica subliña que as disfuncións que se producen tras calquera proceso de mobilidade dopersoal, “van existir antes ou despois das eleccións, agora ou en febreiro. A diferenza é que si se realiza antes do 21 de outubro tal e como estaba previsto o Partido Popular considera que se vai ver afectado e por iso non dubida en hipotecar o dereito á mobilidade de 400 profesionais que levan máis de 20 anos sen poder exercelo”.

Neste senso, destacan que a Administración Pública e o seu funcionamento deben ser neutrais e independentes de calquera decisión electoral e funcionar con obxectividade. Máis tendo en conta que estamos a falar de cuestións referentes á saúde e seguridade alimentaria de todas as galegas e galegos.

1