Logotipo CIG Confederación Intersindical Galega - Avantar - Vigo 20/9/2012
Celebráronse concentracións, sentadas e marchas por distintas rúas do país
Continúan as protestas semanais dos empregados/as públicos contra os recortes do PP
Os empregados/as públicos/as retomaron hoxe as protestas contra as políticas de recortes e o progresivo desmantelamento e privatización do servizos públicos. As mobilizacións desenvolvéronse ao mediodía nos diferentes centros de traballo das administracións publicas no noso país -edificios administrativos, centros de saúde, xulgados, delegacións, concellos, oficinas da Seguridade Social...

2012 09 20 ProtestaEmpregoPublico01

As protestas forman parte do calendario de mobilizacións acordado polas organizacións sindicais para este mes de setembro, no que tamén se incluíu a convocatoria da concorrida manifestación celebrada o pasado sábado en Santiago.

En cada un dos actos fíxose unha chamada á cidadanía para que amose a súa oposición ao progresivo desmantelamento dos servizos públicos, uns servizos que en tempos de crise como actuais deberían ser potenciados como garante da cohesión social.

Os empregados/as das administracións criticaron que tanto o Goberno de Mariano Rajoy como o de Núñez Feijoo aposten por deixar a xestión dos servizos públicos en mans de empresas privadas, mentres “arremeten sen contemplacións contra o persoal do sector público, recortando os seus dereitos laborais e sindicais, destruíndo emprego e intentando socavar a confianza da cidadanía con campañas mediáticas e políticas destinadas a desacreditar a súa imaxe”.

Neste senso, lembraron que nos últimos 15 anos os traballadores/as das administracións viron recortados os seus dereitos laborais e sociais e perderon un 45% dos salarios.

O calendario de mobilizacións continuará o vindeiro xoves cunha nova xornada de protestas nos centros de traballo.

Galería de imaxes das mobilizacións.

1