Logotipo CIG Confederación Intersindical Galega - Avantar - A Coruña 21/9/2012
O persoal esixe o abono inmediato dos soldos e recibir información real sobre o futuro da empresa
As traballadoras da estación de Gedas en Melide levan sen cobrar cinco meses
A CIG-FGAMT denuncia a actitude da empresa GEDAS (Gestión y Desarrollo de Áreas de Servicio, S.A.), que leva sen pagar 5 meses ás súas empregadas e empregados na estación de servizo que ten no concello de Melide. Recentemente a empresa despediu a 5 persoas sen pagarlles nada aínda e sen dar ningún tipo de información de cando se vai poder cobrar as indemnizacións e as cantidades adebedadas tras todos estes meses de atrasos e impagos.

12-09-21 Gedas Melide

O peche unilateral de parte dos servizos realizouse sen ningún tipo de preaviso afectando a todo o persoal da cafetería, ademais da supresión da quenda de noite pasando a ter aberto unicamente de 7h a 23h cando antes abría as 24 horas, o que afectou tamén ao persoal de pista.

Esta empresa conta outros dous centros de traballo en Pontevedra e Salvaterra. Durante os últimos meses o empresario recollía a recadación e a levaba mentres non pagaba os salarios do persoal e mesmo chegou a provocar o desabastecemento de combustíbel en varias ocasións.

As traballadoras despedidas reclaman que se lle paguen as cantidades que se lles deben así como as indemnizacións e o persoal que segue no cadro de persoal exixe cumprida información da situación na que van a desenvolver o seu traballo a partir de agora, xa que a redución de persoal supón traballar mais horas sen cobrar ningún tipo de salario.

Do mesmo xeito, adianta a FGAMT-CIG, o persoal desenvolverá un calendario de  mobilizacións se non se reanuda inmediatamente o abono dos salarios e se da cumprida información de como se vai facer fronte ás débedas, mais da situación real e de futuro deste centro de traballo.

1