Logotipo CIG Confederación Intersindical Galega - Avantar - Compostela 9/10/2012
A CIG denuncia que as traballadoras e traballadores están padecendo represalias por ter participado nas mobilizacións
Reanúdase a folga en Campiñas de Laíño porque continúan os impagos das nóminas
As traballadoras e traballadores de Campiñas de Laíño, Refojo y González e Hipescar acordaron en asemblea reanudar a folga indefinida que, no mes de xuño, se suspendera polo compromiso das empresas de chegar a unha solución pactada. Denuncian que o grupo de empresas incumpriu ese compromiso e que, ademais, a partir dese momento aumentaron as represalias en forma de atrasos nos pagamentos das nóminas daqueles que secundaran a folga, eliminación das dietas por desprazamento aos traballadores de reparto, traslados de postos de traballo e despedimentos.

12-07-05 Campinhas 01

A FGAMT-CIG denuncia que a empresa, en canto tivo coñecemento da nova convocatoria  de folga indefinida despediu a catro novos traballadores, entre eles aos membros do comité de folga designados polos compañeiros e recoñecidos pola consellaría de Traballo.

Ademais nomeou uns servizos mínimos abusivos e ilegais, xa que unha empresa que non presta un servizo básico para a sociedade non pode estabelecer servizos mínimos se non están consensuados cos representantes dos traballadores/as.

A empresa intentou ademais aplicar unha normativa laboral franquista na que era a empresa na que nomeaba unilateralmente tanto os servizos mínimos como ás persoas que os realizarían, cando esta norma está derrogada desde o ano 1981.

Por se isto non fora abondo, esta mañá cando os traballadores se concentraron diante da empresa e o comité de folga intentou acceder ás instalacións para comprobar que non se estaba a suplir ás e aos folguistas con traballadores/as que non estiveran de alta na seguridade social, ou que realizaran outras funcións e os estiveran substituíndo, a empresa denegou a súa entrada, vulnerando así o dereito á folga.

Inácio Pavón, da FGAMT-CIG explica que a garda civil se presentou nas instalacións negándose tanto a facilitar o acceso ao comité de folga como a identificar ás persoas que naquel momento se atopaban traballando para que despois se puidera comprobar que non se cometera unha irregularidade e conculcando o dereito fundamental á folga.

Malia iso as traballadoras e traballadores continuarán exercendo este dereito mentres a empresa non se sente a negociar o pago dos salarios e a readmisión das traballadoras e traballadores despedidos.

1