Logotipo CIG Confederación Intersindical Galega - Avantar - A Coruña 22/10/2012
A empresa aplicou a medida de xeito unilateral, sen previo aviso, e sen que se producise un cambio nas condicións da contrata co Sergas
A concesionaria da limpeza do HULA aplica unha rebaixa salarial de 300 euros coa escusa do recorte aos empregados/as públicos/as
Baixo escusa da rebaixa salarial ao persoal funcionario, a empresa Dokesim, concesionaria do servizo de limpeza do Hospital Lucus Augusti, decidiu de xeito unilateral recortar aos seus empregados/as 300€ da nómina dende agora até decembro (un 30% do salario), sen previo aviso, e sen que se modificaran as condicións económicas en relación ao Sergas.
Limpando o chan

O Comité de Dokesim (no que se atopan representados UGT, CIG e CCOO) xa iniciou as accións legais precisas para defenderse deste atropelo, presentando dous conflitos colectivos. “Á conciliación do primeiro a dita empresa nin se personou”, explica nun comunicado o Comité.

A maiores, as traballadoras e traballadores, en asemblea, decidiron que o Comité enviara escrito de protesta ao Xerente da Empresa e solicitara reunión coa Dirección-Xerencia do HULA para expoñer esta situación e proceder ao inicio de mobilizacións.

O calendario de protestas comezarán coa concentración das traballadoras/es no vestíbulo do HULA á hora do seu descanso nas quendas de mañá e de tarde, ás 9,30hs e ás 18,30hs, os días 23, 25, 30 e 31 de outubro e os días 6 e 8 de novembro.

O persoal acordou convocar estas mobilizacións “co fin de facer pública a súa protesta  polo que consideran un roubo salarial que só serve para enriquecer aos propietarios da marca, e de forzar a presenza da empresa na conciliación que queda pendente”.

1