Logotipo CIG Confederación Intersindical Galega - Avantar - Compostela 27/2/2009
Será un centro pioneiro na comarca en varias especialidades do sector da construción naval
Inaugurado o Centro de Formación Profesional para o Emprego en Narón
O novo Centro de Formación Profesional para o Emprego en Narón xa é unha realidade. O 26 de febreiro levábase a cabo o acto de inauguración, no que interviñeron Xesús Seixo, Secretario Confederal da CIG, Fernando Sabio Maroño, Secretario de Formación profesional da CIG, Ricardo Varela Sánchez, conselleiro de Traballo, Fernando Blanco, conselleiro de Industria, así como unha representación de institucións locais e do sector naval.
09-03-02 forga ferrol

O novo centro de FORGA ocupa 1.500 metros cadrados e terá como obxectivo a cualificación profesional tanto de traballadores/as ocupados/as como en situación de desemprego, facendo especial incidencia nas especialidades relacionadas co sector naval. Nalgunhas da especialidades que impartirá será un centro pioneiro na comarca, tal é o caso de pintor-chorreador ou habilitación naval, ambas as dúas con importante demanda dentro da construción naval.

Outro dos obxectivos do centro será a intermediación no mercado de traballo, entre ofertantes de emprego e demandantes, para o que se contará cunha bolsa de emprego coas persoas que rematen as accións formativas.

As especialidades nas que está homologado o centro son:

1. Aplicacións Informáticas de Xestión

2. Informática de usuario

3. Celador Sanitario

4. Caldereiro Industrial

5. Axustador Mecánico

6. Técnico Auxiliar en Deseño Gráfico

7. Deseñador Web e Multimedia

8. Electricista Industrial

9. Tubeiro Industrial

10. Monitor Sociocultural.

Á inauguración acudiron, como convidados, Pablo Villamar Díaz (Vicepresidente da Deputación de Coruña), Xosé Manuel Blanco Suárez (Alcalde de Narón), José Domínguez e Tomás Casquero (presidente e xerente de ACLUNAGA, respectivamente). Tamén estiveron presente membros do Padroado da Fundación e da Executiva Nacional da CIG.

1