Logotipo CIG Confederación Intersindical Galega - Avantar - Vigo 10/3/2009
Novo caso de deslocalización no Telemárketing
Eurocen anuncia o peche dun departamento na Coruña con 450 persoas
O 6 de marzo Eurocen, empresa de telemárketing que ten un centro de traballo na Coruña, fixo público que o vindeiro día 19 de abril rematará a campaña do departamento CRC que dá servizo a Movistar. En total 370 persoas enfróntanse a un posible despedimento. Con incredulidade e enfado recibiu a Sección Sindical da CIG a noticia do suposto fin de obra, pero especialmente a noticia de que durante as últimas semanas COO, UGT, Eurocen e a Consellería de Traballo eran coñecedoras dos despedimentos e estiveron ocultando esta realidade ao persoal, pero tamén ao resto da representación sindical.
Eurocen

Durante estes meses as partes trataron de chegar a un acordo que consistía basicamente en periodificar os despedimentos ao longo deste ano, con falsas expectativas de recolocación, tratando de dividir o colectivo afectado. 

Os escasos traballadores e traballadoras indefinidos, aproximadamente uns 155, serán recolocados no departamento de "Captación" ou "Pemes" con posible redución horaria, o que conleva o despedimento de 70 persoas con contratos de posta a disposición deste departamento. 

"Fin de campaña enganoso"

O resto dos despedimentos, ata os 370, afectarán ao persoal de CRC, alegando a empresa un fin de campaña que a CIG considera enganoso, xa que a carga de traballo estase deslocalizando cara a Málaga e Sudamérica. Dende a Sección Sindical da CIG o teñen claro, "estamos ante un novo caso de deslocalización que foi ocultado co visto bo da Consellería de Traballo durante a campaña electoral". 

Proceso de mobilizacións

A Sección Sindical da CIG en Eurocen, xa anunciou que proporá ao Comité de Empresa comezar cun proceso de mobilizacións e asembleas de traballadores e traballadoras contra os despedimentos e para solicitar un Plan de Futuro para a plataforma da Coruña que ata o de agora daba emprego a 1.100 persoas. 1