Mobilizacións na xornada de folga no ensino galego

ivan — Tue, 07 May 2013 19:29:53 +0200

A Plataforma Galega en Defensa do Ensino Público convoca manifestacións e concentracións en distintas localidades do país coincidindo coa xornada de folga prevista no ensino para rexeitar a Lomce. As protestas terán lugar a partir das 11.30 horas en:

-Ourense: Xefatura Territorial

-Vigo: Praza dos Cabalos

-Ferrol: Paza de España

-Vilagarcía: Praza de Galiza

-Pontevedra: Praza da Ferrería

-A Coruña: Praza de Vigo

-Lugo: Praza da Horta do Seminario

-Burela: Praza da Mariña

-Santiago: Praza do Toural

-Carballo: Praza do Concello

Asemblea de afiliados/as de Bazán, Astano e Izar prexubilados/as

begonha.carballo — Tue, 07 May 2013 17:41:09 +0200

As Seccións Sindicais da CIG-METAL de Navatia Fene e Ferrol teñen convocado a todas as afiliadas e afiliados que foran prexubiladas/os nos expedientes de Bazán e Astano no 1999 e de Izar no 2004 a unha asemblea, que terá lugar este mércores día 8 ás 11 da mañá, no salón de actos do local da CIG (Eduardo Pondal, 41-43, Esteiro.

Mobilizacións contra o convenio de Grandes Almacéns en distintos puntos de Galiza

ivan — Mon, 04 Mar 2013 18:19:57 +0100

Mobilizacións en distintos puntos de Galiza este martes día 5 para rexeitar o convenio de Grandes Almacéns asinado entre a patronal e os sindicatos Fetico e Fasga, que empeora considerabelmente as condicións económicas e de traballo. No caso de Vigo, as protestas desenvolveranse pola mañá diante da sede de Fetico e Fasga ás 11.00 horas, mentres que pola trade haberá unha concentración no Carrefour do centro comercial Gran Vía ás 18.00 horas. Na Coruña serán diante de El Corte Inglés e da sede de Fetico ás 18.00 horas. E en Lugo diante do Carrefour ás 19.00 horas.

Manifestación até a sede do PP en Vigo este martes para denunciar a privatización dos servizos públicos

ivan — Mon, 04 Mar 2013 17:08:36 +0100

Os traballadores/as da Administración autonómica en Vigo covocan este martes ás 11.00 horas unha manifestación contra a privatización dos servizos públicos que sairá do edificio da Xunta e rematará diante da sede do Partido Popular. A marcha, que forma parte da campaña de mobilizacións que os empregados/as públicos están a desenvolver en todas as comarcas do país, percorrerá as rúas García Barbón, Colón, Canceleiro e Areal para denunciar ademais a perda de dereitos laborais, a eliminación de postos de traballo e os despedimentos, segundo explican dende a CIG-Administración Autonómica.

Manifestación en Marín para protestar pola expulsión dos barcos cefalopodeiros galegos do caladoiro de Mauritania

ivan — Wed, 13 Feb 2013 14:06:09 +0100

Os mariñeiros/as e armadores/as afectados/as pola expulsión da flota cefalopodeira galega do caladoiro mauritano convocan unha manifestación de protesta en Marín este venres día 15. A marcha, coa que reclamarán un novo acordo entre a UE o o país africano que lles permita traballar, partirá da Alameda ás 20.00 horas.

Manifestación contra a precariedade laboral e a perda de calidade asistencial no hospital Povisa de Vigo

ivan — Tue, 12 Feb 2013 13:51:26 +0100

O comité de empresa do hospital Povisa de Vigo convoca unha manifestación contra a precarización do emprego e a perda de calidade asistencial no centro médico. A marcha partirá de Vía Norte este domingo día 17 a partir das 12.00 horas.

Mobilizacións da Plataforma Galega en Defensa dos Servizos Públicos

begonha.carballo — Wed, 06 Feb 2013 18:41:19 +0100

A Plataforma Galega en defensa dos Servizos Públicos ten convocadas mobilizacións para o xoves, día 21 de febreiro, ás 19:00 horas nas sete cidades e unha concentración diante do Parlamento coincidindo coa data na que se voten en pleno os orzamentos de Galiza para o ano 2013. Con estas mobilizacións a Plataforma quere manifestar o seu rexeitamento a uns orzamentos que poñen en perigo os servizos públicos, promoven a supresión e despedimento de persoal e deterioran as súas condicións laborais e económicas.

Xornada de folga nas entidades financeiras nacionalizada

begonha.carballo — Mon, 04 Feb 2013 13:46:44 +0100

O mércores 6 de febreiro, a CIG e o resto de organizacións sindicais con presenza en Novagalicia Banco, teñen convocada unha xornada de folga de 24 horas en Novagalicia Banco e Bankia.

Coincidindo coa xornada de folga están convocadas as seguintes manifestacións, ás 12:00 horas:

- A Coruña: Saída dende a Rúa Nova (OP Novagalicia banco).

- Santiago: Praza de Galicia (OP Novagalicia banco).

- Ourense: Rúa do Paseo (OP Novagalicia banco).

- Lugo: Praza Maior (OP Novagalicia banco).

- Pontevedra: Praza San Xosé.

- Vigo: Urzaiz (Oficina de Bankia).

Comezan as asembleas permanentes e peches na defensa da sanidade pública

begonha.carballo — Wed, 30 Jan 2013 20:09:10 +0100

As organizacións sindicais que conforman a plataforma sanitaria teñen acordado organizar, en todas as áreas de Galiza, o calendario de asembleas informativas, mobilizacións e peches que se desenvolverán ao longo do mes de febreiro.

Estabelecerase un calendario de asembleas permanentes, de 24 horas de duración a partir do que se comezarán a desenvolver os catro peches previstos: o primeiro, o día 5 de febreiro será na Coruña, Ourense e Barbanza.

Manifestación para esixir a retirada do Decreto do Plurilingüísmo

begonha.carballo — Wed, 16 Jan 2013 09:54:00 +0100

Queremos Galego ten convocada unha manifestación nacional o domingo 27 de xaneiro, para esixir a derrogación do Decreto 79/2010 de Plurilingüísimo e a elaboración dunha nova norma que teña como punto de partida o consenso acadado para o Plan de Normalización Lingüística aprobado polo Parlamento no ano 2004. A marcha sairá ás 12:00 horas dende a Alameda de Compostela.

Mobilizacións contra a LOMCE nas sete cidades galegas

begonha.carballo — Wed, 16 Jan 2013 09:50:25 +0100

A Plataforma Galega en Defensa do Ensino Público convca mobilizacións en contra da aprobación da nova Lei de Mellora da Calidade Executiva (LOMCE) e fai un chamamento aos pais e nais, alumnado, profesorado e sociedade no seu conxunto para que participen nas concentracións convocadas de xeito simultáneo para o 31 de Xaneiro nas sete cidades, O Barco, Carballo e Lalín ás 19:30 h.

• A Coruña: Praza de Pontevedra

• Ourense: Xefatura Territorial de Educación

• Lugo: Subdelegación do Goberno

• Vigo: MARCO

• Santiago de Compostela: Praza do Toural

• Pontevedra: Praza da Peregrina

• O Barco de Valdeorras: Praza do Concello

• Ferrol: Edificio Administrativo da Xunta

• Carballo: Praza do Concello

• Lalín: Praza do Aviador

Concentracións contra os recortes laborais e o deterioro dos servizos públicos

begonha.carballo — Wed, 16 Jan 2013 09:48:22 +0100

A Plataforma en Defensa dos Servizos Públicos convoca para o xoves, día 17 de xaneiro, ás 19:00 horas, concentracións en todas as cidades galegas contra as medidas que vén de aprobar a Xunta de Galiza, que empeoran as condicións laborais e salariais das empregadas e empregados públicos e deterioran, aínda máis, os servizos públicos

Protesta pola situación de paro da mocidade galega e a lacra da emigración

ivan — Mon, 14 Jan 2013 13:24:16 +0100

A CIG vén de convocar unha xornada de loita nacional en todas as comarcas do país para denunciar a sangría demográfica que está a sufrir o noso país e que afecta especialmente á mocidade. A situación é de tal gravidade que dos 166.800 postos de traballo destruídos nestes 4 anos, 149.100 estaban ocupados por menores de 35 anos; destes, máis de 77.164 optaron por emigrar, neste período, en busca dunha alternativa laboral que non atoparon en Galiza e o paro medrou case un 123% desde o estoupido da crise entre os menores de 25 anos.

Concentración en defensa dos postos de traballo no museo Marco de Vigo

ivan — Mon, 14 Jan 2013 13:21:41 +0100

A federación de Servizos da CIG de Vigo convoca unha concentración diante do Marco este martes 15 de xaneiro ás 11.00 horas para reclamar o mantemento do emprego no centro. Dende a CIG-Servizos informan que debido á pugna política entre PP e PSOE as achegas económicas ao museo reducíronse por parte do Concello nun 20%, mentres que e a Deputación non aporta nada -segundo palabras de Louzán- mentres Caballero sexa alcalde da cidade. Isto ten como consecuencia recortes en limpeza, atención ao público e mantemento, e a supresión do servizo de seguridade. Ademais, os traballadores/as directos do museo verán reducido o seu salario nun 25%.

Manifestación en Pontevedra contra a represión sindical, as taxas xudiciais e a reforma do Código Penal

ivan — Wed, 12 Dec 2012 14:27:35 +0100

Pontevedra acollerá este sábado día 15 de decembro una manifestación convocada pola CIG para denunciar a represión sindical coa que se busca criminalizar a resposta ás políticas do PP; a reforma do Código Penal que prepara o goberno de Mariano Rajoy e que pretende tipificar como delitos accións que antes non tiñan esa consideración; e a lei de taxas xudiciais que dificulta o acceso ao dereito fundamental á tutela xudicial efectiva. A manifestación sairá ás 11.30 horas da Praza da Ferrería.

Acto público dos mariñeiros/as de Mauritania en Marín para reclamar as axudas pactadas

ivan — Wed, 12 Dec 2012 14:23:21 +0100

Oa mariñeiros/as e armadores/as da flota cefalopodeira galega que faenaba en Mauritania celebrarán un acto público na sala multiusos da Praza de Abastos de Marín este venres ás 20:30 horas para reclamar o cobro das axudas pactadas co Goberno español. Os afectados/as convocaran en principio unha manifestación, que finalmente foi suspendida pola previsión de temporal.

Manifestación dos traballadores/as de Vitrasa para reclamar a negociación do convenio

ivan — Wed, 28 Nov 2012 17:28:53 +0100

O comité de empresa de Vitrasa, a empresa concesionaria dos autobuses urbanos de Vigo, ten convocada unha manifestación polas rúas da cidade para reclamar a negociación do convenio colectivo. A marcha partirá este xoves 29 da rúa Lepanto ás 11.00 horas e rematará no Concello.

Concentración contra o saqueo do pobo en Vigo

ivan — Wed, 17 Oct 2012 21:31:55 +0200

A CIG, CCOO e UGT de Vigo convocan unha concentración este xoves 18 na farola de Urzaiz ás 20.00 horas baixo o lema “Non ao saqueo do pobo. Hai que impedir que nos arruínen” para denunciar o ataque contra a clase traballadora que supoñen as medidas impostas polo neoliberalismo aos gobernos a cambio do rescate á banca.

Manifestación en defensa do futuro da comarca de Ferrolterra

begonha.carballo — Mon, 15 Oct 2012 11:26:07 +0200

As organizacións sindicais CIG, UGT, CCOO e USTG teñen convocada unha gran manifestación este mércores en defensa do futuro da comarca de Ferrolterra e os seus sectores produtivos, nomeadamente a industria naval. A marcha sairá ás 20:00 horas dende o Inferniño e rematará na Praza de Armas.

Concentración de Nunca Máis para esixir que se depuren todas as responsabilidades

begonha.carballo — Mon, 15 Oct 2012 11:21:05 +0200

Coincidindo co inicio do xuízo oral do "Prestige", Nunca Máis ten convocada unha concentración ás 11:00 horas diante de ExpoCoruña para esixir que se depuren todas as responsabilidades pola maré negra que asolou Galiza hai xa dez anos e reclamar melloras na seguridade das nosas costas que impidan que se repita unha catrástofe similar.

Asemblea nacional de delegados/as e manifestación en Compostela

begonha.carballo — Mon, 10 Sep 2012 12:45:32 +0200

A CIG ten convocada asemblea nacional de delegados/as ás 10:00 horas, no Pazo de Congresos de Compostela, para debater e decidir sobre as accións que a central nacionalista vai desenvolver nos vindeiros meses en contra da crise e como resposta ás medidas de recorte aprobadas polos gobernos do PP.

Posteriormente, ás 12:00 horas, realizarase unha manifestación que partirá dende o Pazo de Congresos e rematará diante dos edificios da Xunta de Galiza.

Manifestación dos carteiros/as do centro de Vigo en protesta pola eliminación de 13 postos de traballo

ivan — Mon, 11 Jun 2012 12:43:24 +0200

Os carteiros/as do centro de Vigo convocan unha manifestación para este martes día 12 contra a decisión de Correos de eliminar 13 postos de traballo. A marcha partirá da Praza de Compostela a partir das 20.00 horas.

A CIG de Ferrol convoca unha xornada de loita en toda a comarca

begonha.carballo — Wed, 06 Jun 2012 18:02:59 +0200

A Unión Comarcal da CIG de Ferrol ten convocada para o xoves, 28 de xuño, unha folga xeral parcial entre as 09:00 horas e as 15:00 horas contra a "dramática situación" económica e laboral que padece a bisbarra.

A xornada de loita terá como eixo visíbel central a manifestación convocada para ás 12:30 horas, dende o Inferniño.

Porén, previamente haberá marchas de traballadores e traballadoras dende os principais polígonos industrias e centros de traballo para visibilizar nas rúas as reivindicacións da central sindical e animar a toda a cidadanía á participar da mobilización. Estas marchas están organizadas en tres itinerarios principais que confluíran no Inferniño antes da saída da manifestación:

Itinerario 1:

- 09:30 horas no Concello de Fene (sumaríase a xente procedente de Vilar do Colo).

-10:00 horas paso por San Valentín, diante de Navantia.

-11:00 horas na rotonda do Alcampo. Asemblea.

Itinerario 2:

- 09:30 horas saída do Polígono das Lagoas

- 10:00 horas no Concello de Narón

- 11:00 horas na Rotonda de Alcampo. Asemblea

Itinerario 3:

- 09:15 horas saído do Polígono Río do Pozo.

- 10:00 horas en Leixa (diante da Residencia Arquitecto Marcide). Asemblea.

Protesta contra os recortes nos servizos públicos diante da residencia de maiores do Cornuval, no Carballiño

ivan — Tue, 17 Apr 2012 16:46:08 +0200

O comité de empresa do persoal laboral da Xefatura Territorial da Consellería de Traballo e Benestar de Ourense e os sindicatos que forman parte do mesmo (CIG, CC.OO, UGT e CSIF) convocan unha concentración na residencia do maior do Cornuval no Carballiño para denunciar:

-A amortización de prazas públicas na Residencia do Cornuval e nos demais centros dependentes da Consellería.

-O peche do centro de menores de Montealegre.

-O continuo recorte de servizos públicos, de persoal e de dereitos do persoal da Consellería de Traballo e Benestar na provincia de Ourense.

-A non apertura dun centro, a nova residencia de maiores, que se está deixando abandonar despois de dous anos rematada.

A protesta desenvolverase este mércores 18 de abril a partir das 11.30 horas.

Concentracións nas cidades galegas contra a reforma laboral do PP

ivan — Tue, 10 Apr 2012 18:43:43 +0200

Coincidindo co día no que se referendará no Congreso dos Deputados a reforma laboral, a CIG convoca concentracións en todas as cidades galegas para exixir a súa retirada. A central sindical denuncia que se trata dunha reforma pensada para facilitar o despedimento e favorecer a competitividade, pola vía de reducir salarios e rebaixar as condicións laborais substituíndo emprego fixo por precario e considera que só coa mobilización se poden frear as políticas de recortes de dereitos laborais e sociais que está a impor o Partido Popular.

A CIG demanda do goberno do PP a retirada da reforma laboral, logo do rotundo rexeitamento manifestado polos traballadores e traballadoras que participaron, de forma masiva, na convocatoria de folga xeral e nas multitudinarias mobilizacións convocadas o pasado 29 de marzo.

Por iso convoca, para este xoves, día 12 de abril, concentracións en todas as cidades que terán lugar en:

- Compostela: Praza de Galiza, 20.00 horas.

- A Coruña: Delegación do Goberno, 20.00 horas.

- Vigo: Farola de Príncipe, 20.00 horas.

- Ourense: Subdelegación do Goberno, 20.00 horas.

- Pontevedra: Subdelegación do Goberno, 20.00 horas.

- Lugo: Subdelegación do Goberno, 20.00 horas.

- Ferrol: Praza do Concello, 19.30 horas.