Fonte RSS - Todo Avantar - Confederación Intersindical Galega

Miles de persoas maniféstanse polas rúas da Coruña en defensa dos postos de traballo e o futuro das factorías de Alcoa

begonha.carballo — Fri, 03 Feb 2012 21:33:50 +0100

Cun recorte da produción do 50% e unha proposta de ERE de suspensión temporal enriba da mesa para a metade dos 420 operarios/as da factoría da Coruña, o persoal de Alcoa Inespal manifestábase este serán polas rúas da cidade, acompañado por centos de cidadáns/ás e compañeiros/as doutras factorías, para rexeitar as medidas da multinacional do aluminio e contra o desmantelamento industrial da comarca.

Os delegados da CIG na empresa insistiron en que o problema de fondo non é o expediente de regulación, senón a inexistencia dun plan de viabilidade que garanta o futuro das instalacións. Neste senso, teñen reivindicado á dirección que desvele que plans ten para a factoría da Coruña e cal é a viabilidade industrial que terá dentro do propio Grupo. “Se a empresa non responde a estas cuestións entenderemos que Alcoa non ten interese en continuar coa actividade desta planta”, subliñan. “Agora a dirección parece disposta a asumir que o ERE sexa rotativo para o 100% do persoal, pero descoñecemos por completo que vai suceder cando remate a vixencia da regulación”, sinalan.

Dúbidas sobre o futuro da multinacional para as plantas galegas

A este respecto, a sección sindical da CIG volveu advertir que detrás deste recorte da produción e o emprego se agocha a pretensión de Alcoa de deslocalizar a produción a países que teñen unha tarifa enerxética máis barata e un mercado laboral desregulado. Neste senso, apuntan que os problemas da factoría da Coruña comezaron co desmantelamento da liña de produción de fío, deslocalizada hai uns anos á planta de Islandia, e recalcaron que para 2013 está previsto que o consorcio Maaden-Alcoa poña en marcha unha mega fábrica en Arabia Saudita.

No mesmo sentido se manifestaron os compañeiros da Sección Sindical da CIG en Alcoa-San Cibrao, que esta tarde se achegaron até a Coruña para participar da manifestación. A representación da factoría da Mariña tamén se amosou pesimista en canto as expectativas de futuro para as plantas que Alcoa ten na península. De feito, subliñan, a propia dirección se negou a ofrecer garantías sobre a continuidade da actividade nas instalacións de San Cibrao, chegando a ironizar sobre que “para asegurar o futuro xa están Carrefour ou El Corte Inglés”.

“Entre a presentación dos EREs e a predisposición da multinacional a deslocalizar a produción e o traballo (practicamente en San Cibrao todas as tarefas se fan a través das auxiliares) temos moitas sospeitas de que as verdadeiras intencións pasan polo peche das factorías galegas”. Este obxectivo, matizan, explicaría o recente Plano de Evacuación presentado para a planta da Mariña (a pesar de levar 30 anos en funcionamento), a través do que se pretendería evitar calquera reclamación por responsabilidades ambientais unha vez abandonadas as instalacións.

Así mesmo, as Seccións Sindicais da CIG nas dúas factorías matizaron que nos informes económicos anuais, a empresa sempre destacou a rendibilidade das plantas da Coruña, San Cibrao e Avilés. Porén, “de súpeto, A Coruña e Avilés non son competitivas e deciden aplicarlles un recorte da produción e no emprego co obxectivo de reducir custes, pero esta medida vai provocar o efecto contrario xa que o se produza nesas plantas sairá máis caro”, denuncian.

Manifesto dos traballadores/as

Ao remate da marcha, o Presidente do Comité de Alcoa Inespal, deu lectura ao manifesto dos traballadores/as que pasamos a reproducir:

MANIFESTO

Boas tardes/noites:

No nome do Comité de empresa e dos traballadores/as de Alcoa-Inespal de A Grela, recibide un cariñoso saúdo todas e todos os que no día de hoxe nos acompañades (especialmente os compañeiros de Avilés e San Cibrao) por solidarizarse e acompañarnos nesta manifestación reivindicativa polo emprego e contra a deslocalización.

A planta coruñesa de Alcoa leva máis de 50 anos implantada na comarca coruñesa e en toda esta vida industrial coas diferentes denominacións, sendo empresa pública ou privada (Aluminios de Galiza, Inespal, Alcoa), deu a posibilidade de que miles de traballadores/as coruñeses, da comarca e de Galiza, tivesen un traballo para poder sacar adiante dignamente as súas familias ou a súa traxectoria laboral.

Pero hoxe estamos aquí, porque a dirección de Alcoa, o 9 de xaneiro, convocou ao Comité de empresa con carácter de urxencia para informar sobre o recorte de produción do 12% a nivel mundial, debido aos malos resultados económicos no 4º trimestre de 2011.

Segundo a dirección o 7% da redución levaríase a cabo nos EEUU (291.000 toneladas). O restante 5% faríase en Europa mediante o peche da fábrica de Portovesme (Italia) de maneira permanente (155.000 toneladas), e unha redución temporal da produción no estado español de 90.000 toneladas para Alcoa Inespal (fábricas de A Coruña e Avilés), o que suporía unha parada de produción do 50% en cada unha das fábricas. O recorte de produción nas dúas plantas españolas levaría asociado un ERE temporal de un ano para 150 traballadores/as en Avilés e 210 na Coruña.

Alcoa quere xustificar esta medida no estado español baseándose nos altos custes de produción a causa do incremento das materias primas (coque, brea) e do baixo prezo do metal na bolsa de metais de Londres (LME), cunha redución do 27% en 2011. Ademais está o incremento na tarifa eléctrica e a falta dun contrato de enerxía competitivo de longo prazo.

Esta última cuestión, a da enerxía, é o verdadeiro problema que nos trae hoxe aquí, pois non se pode esquecer que case a metade dos custes da produción do aluminio pertencen á electricidade. Se a isto engadimos que o actual contrato coas eléctricas remata en decembro deste ano, máis claro auga.

Por todo iso, Alcoa propón un expediente de regulación de emprego para unha planta emblemática, desmantelando a futuro industrialmente a comarca coruñesa. Isto pon en risco os postos de traballo tanto de Alcoa, como das compañías auxiliares Reymogasa, Masa Galicia, Montajes Dimar, Fremap, Climagal, Segasa, Galman, Montajes Biermar, Traexla, Jofrasa, Cotelsa, etc., que prestan os seus traballos auxiliares, así como a incidencia negativa que pode supor cara o sector das ferroaleacións. En total máis de 1.500 empregos afectados directa ou indirectamente.

O Comité de empresa leva anos insistindo para que Alcoa presente un plan industrial que cubra as esixencias da planta, garantindo a súa viabilidade, e non aplicando parches conxunturais que non supoñen ningunha solución de futuro.

Polo cal, esiximos da dirección de Alcoa, que non é imprescindíbel a aplicación dun expediente de regulación de emprego, que tal e como está proposto pon en risco o futuro da factoría, xa que o que si é necesario é a presentación dun Plan Estratéxico de Futuro que permita que esta actividade siga xerando emprego e riqueza nesta comarca coruñesa que tanto apostou de forma directa e indirecta polo mantemento e a supervivencia destes postos de traballo, tanto para os traballadores/as actuais como para as xeracións vindeiras.

Así mesmo, esiximos aos poderes políticos (Concellos, Deputación, Xunta de Galiza e goberno central) que se involucren nun compromiso político, claro, nidio e necesario para que esta actividade industrial siga tendo futuro e siga sendo un referente na comarca coruñesa. Pois estamos convencidos os sindicatos, traballadores/as e cidadáns/ás, que se non o fan así poderían ser partícipes na defunción industrial dunha actividade que leva máis de cinco décadas e vai a seguir tendo unha demanda de futuro do seu produto independentemente da situación pola que actualmente está pasando.

Grazas de parte dos traballadores/as de Alcoa e dos seus familiares por ter compartido con nós esta xornada reivindicativa e desexarvos aos compañeiros/as de Avilés e San Cibrao un feliz viaxe de regreso.

A FGAMT de Ferrol alerta da situación na que quedan as mariscadoras/es ao eliminarse as axudas para rexeneración da ría

paula.castro — Fri, 03 Feb 2012 19:37:45 +0100

Cerca de 500 mariscadoras e mariscadores adscritos ao plan de dinamización da Ría poden pasar a engrosar, segundo a FGAMT-CIG de Ferrol, as listas do paro. Unha situación que para a federación é inadmisíbel nunha comarca na que, lembran, o desemprego afecta a preto de 20.000.

Esta situación é consecuencia da decisión da consellaría, comunicada este xoves, de suprimir as axudas, de 82 euros diarios, que cobraban as mariscadoras e mariscadores por realizar labores de limpeza e rexeneración da ría. Decisión que a administración xustifica por mor da necesidade de recortar gastos.

Esa cantidade –os 82 €- fora acordada en xaneiro de 2007, cando se puxo en marcha o Plan de Dinamización da ría. Un plan que pretendía paliar a situación mentres non se instalara unha depuradora que garantira a calidade das augas e, en consecuencia a limpeza da ría.

Alexandre Romero, secretario comarcal da FGAMT de Ferrol lembra que xa no ano 2000, a UE decretou que todas as poboacións con máis de 5.000 habitantes tiñan que contar cunha EDAR (estación depuradora). Porén, no caso de Ferrol a súa instalación aínda segue pendente.

A consecuencia disto, a maioría das zonas da ría de Ferrol está categorizadas como zonas C, polo exceso de fecais e teñen vetada a actividade marisqueira. Agora a consellaría propón, como alternativa, pór unha batea para que se depure o marisco só. Esta solución xa foi probada con anterioridade, con escaso éxito porque, segundo explica o secretario comarcal da FGAMT de Ferrol, non se fixeran os estudos pertinentes, de fluxo de correntes e demais.

A decisión da consellaría supón finiquitar o plan de dinamización e abocar ao paro a 500 persoas que dependen desta actividade. Para Romero, agora quen pagan son as mariscadoras e mariscadores, que afirma “non teñen ningunha responsabilidade, porque non foron quen contaminaron a ría”.

Denuncia ademais que a propia consellaría prometeu unha xuntanza multidisciplinar coas entidades implicadas tanto a nivel galego como estatal para achar solucións, definir responsábeis e acordar indemnizacións, non esmolas, para as afectadas e afectados. A este respecto, Romero afirma, con firmeza que “quen contamina, paga”.

Por iso demanda esa xuntanza de forma urxente e a intervención decidida do alcalde da cidade, para que actúe en defensa dos seus administrados.

A CIG potencia a creación de cooperativas de traballo asociado entre a súa afiliación como alternativa ao modelo capitalista

ivan — Fri, 03 Feb 2012 18:25:20 +0100

A CIG, que xa asesorou outras iniciativas de cooperativas, ofrece agora o servizo do Gabinete de Economía Social aos seus afiliados/as. A central nacionalista considera que debe dar este paso novamente, polo que tamén porá os seus locais a disposición dos promotores para que poidan celebrar as reunións de vertebración destas iniciativas cooperativistas. Ao mesmo tempo, e dada a importancia destas iniciativas, a CIG impartirá dentro de todas as accións formativas un módulo informativo sobre cooperativismo e cooperativas de traballo asociado.

As máis diversas correntes do pensamento social, económico e político consideran o cooperativismo como instrumento importante na solución dos problemas económicos e sociais, en canto que pola súa flexibilidade achega respostas diante de necesidades cambiantes da economía e da sociedade. É de xustiza o recoñecemento á presenza do cooperativismo en Galiza, certamente significativa, que se pon de manifesto, entre outros datos, no número de máis de 83.000 socias/os, o que significa a existencia de cooperativistas nun de cada once fogares galegos.

Por outra banda, máis do 2% das ocupadas e ocupados galegos están vinculados ao cooperativismo, cunha contribución cualitativa que se reflicte no maior nivel de estabilidade, de igualdade de xénero e na presenza en actividades vinculadas cos sectores primarios. Ademais, o cooperativismo ofrece valor ao conxunto da economía xa que o seu volume de facturación total achégase aos 2.300 millóns de euros, cun valor engadido bruto total próximo aos 362,1. Por referírmonos ao cooperativismo agrario, é salientábel que ten presenza en 120 concellos, a maior parte dos do medio rural, o que constitúe, sen dúbida, un factor beneficioso para o asentamento da poboación. Amais disto, as cooperativas permiten unha racionalización de custos, a mellor compatibilización da vida profesional e familiar, a formación das socias e dos socios, o acceso a mecanismos de información e presenza nos foros de decisión sectorial que lles afectan.

Por outra parte, estamos diante dunha fórmula de economía social válida como calquera outra das máis usuais, que en moitos casos presenta vantaxes sobre outras modalidades, derivadas da adscrición voluntaria, a comunidade de intereses e a unidade entre as socias e os socios. Isto carrexa un nivel de compromiso coa entidade creada forte en comparación con outro tipo de sociedades. Así, o cooperativismo acredita unha importante capacidade de resistencia ás crises, con comportamentos anticíclicos e de mantemento do emprego en circunstancias adversas. En definitiva, o cooperativismo galego intégrase, para todos os efectos, positivamente no seu contorno natural e ofrece influencias beneficiosas en factores como rendas e emprego, desenvolvemento local, permanencia dos proxectos, formación, educación e benestar.

A CIG Ensino denuncia o atraso do pagamento, por parte da Consellaría, aos colaboradores dos comedores escolares

paula.castro — Fri, 03 Feb 2012 17:40:11 +0100

A CIG-Ensino preguntou por este atraso na pasada Mesa Sectorial sen que a Consellaría se dignase responder e sen que dese a máis mínima mostra de preocupación. As persoas colaboradoras dirixíronse ás Delegacións e non foron debidamente atendidas, recibindo respostas desprezativas que insistían na voluntariedade da súa función.

A Consellaría respondeu na súa web, como é habitual, tamén no mesmo ton desprezativo e escusándose en problemas de fusión entre a Consellaría de Cultura e Educación. Para a CIG-Ensino, é unha explicación “inaceptábel”, pois a realidade é que os atrasos nos pagamentos aos centros públicos, sexa no servizo de comedor, sexa nas convocatorias de axudas ás ANPAS, sexa nas axudas á normalización, estanse a converter nun feito cotiá. Na realidade un elemento máis de ataque ao ensino público, pois situacións como estas soamente conducen ao seu deterioro.

O persoal colaborador dos comedores escolares adoita ser, nais e pais do alumnado que teñen que comprometerse por escrito a desenvolver o seu labor de xeito altruísta. Mais está establecido un pagamento en concepto de compensación, porque moitas destas persoas poden ter gastos derivados desa colaboración, de transporte por exemplo. A cuestión é que os comedores dependentes da Consellaría funcionan grazas ao voluntarismo destes colaboradores e que se determinasen cesar nesa colaboración, os comedores veríanse abocados ao peche ao non contar con persoal que atendese os nenos e nenas.

No seu día, a CIG Ensino defendeu que o Decreto que regula o servizo de comedor recollera que este servizo debería ser atendido con persoal específico, dependente da Consellaría, mediante unha relación contractual. Mais, a Administración non recolleu a nosa proposta e o Decreto establece que o comedor será atendido por persoal colaborador.

Os atrasos nos pagos dos comedores xa afectaron ao servizo no final do curso pasado, pois no mes de xullo moitos centros seguían sen percibir as partidas correspondentes. Isto provocou que moitos centros se atopasen con graves dificultades para poder pagar aos seus provedores. Á maioría dos centros debíaselles entre 10.000 e 20.000 euros e, nalgúns casos, máis de 30.000 euros. Nesta situación, os centros vense moi prexudicados na súa contabilidade e na súa imaxe. Algúns centros buscan a maneira de pagar estas débedas, mais isto pode dar lugar a desfases orzamentarios á hora de pechar as súas contas no fin de curso.

A CIG-Ensino esixe o aboamento inmediato das contías establecidas para o profesorado que coordina o servizo e para o persoal colaborador, do contrario está en perigo o mantemento do servizo.

O persoal da limpeza da USC péchase na Casa da Balconada

paula.castro — Fri, 03 Feb 2012 17:28:33 +0100

Traballadoras e traballadores da concesionaria da limpeza da Universidade de Santiago, Clece, pechábanse a primeira hora da mañá na Casa da Balconada, para manifestar a súa oposición á decisión da Universidade de Santiago de recortar o orzamento da contrata de limpeza un millón de euros.

A Universidade de Santiago anunciou un recorte orzamentario do 3% para o conxunto da entidade, que chega ao 15% no caso desta contrata. A empresa concesionaria, Clece pretende que sexa o persoal quen o pague, na súa totalidade, aplicando un ERE de redución de xornada nun 30%, coa conseguinte redución salarial.

O ERE non foi aínda presentado, pero de facerse efectivo, o Comité calcula que a empresa aforraría 1,2 millóns de euros, obtendo, aínda por riba, beneficios a maiores. Este recorte afectaría a uns 200 traballadores, máis do 90% mulleres.

A diminución de horas afectaría tamén á calidade do servizo, porque obrigaría a reducir a frecuencia das limpezas.

Transcorrida media mañá, as traballadoras e traballadores deron por finalizado o peche no interior do edificio e trasladaron a súa protesta á rúa, onde permaneceron concentrados durante máis de unha hora.

A Área Pública da CIG oponse aos recortes nas condicións laborais e salariais do persoal da administración pública

paula.castro — Fri, 03 Feb 2012 14:43:39 +0100

A conselleira de Facenda anunciou esta mañá aos secretarios nacionais das federacións da Área Pública (Administración, Saúde e Ensino) toda unha serie de medidas que implican recortar as condicións laborais e salariais de todo o persoal de todas as administracións públicas: entes, organismos, consorcios, universidades, Parlamento...

As federacións da Área Pública da CIG denuncian que a Xunta de Galiza pretende que sexan as súas traballadoras e traballadores quen paguen os recortes que a administración vai realizar, segundo a conselleira de Facenda, para cumprir as exixencias de Bruxelas e do estado español.

A secretaria nacional de CIG-Administración, María Carme López Santamariña, como coordinadora das federacións de Área Pública asegura que se trata de medidas “moi agresivas e lesivas” para o persoal. “Isto supón unha regresión canto a dereitos adquiridos, algúns deles consolidados desde os anos 60 e 70 do século pasado, como é eliminar o complemento das baixas por incapacidade, penalizando así ás traballadoras e traballadores polo feito de estaren enfermos”.

A pretensión da administración é rebaixar os salarios en caso de incapacidade temporal (enfermidade común), eliminando o complemento que garantía a remuneración do 100% do salario e só ofrecendo a posibilidade de cobralo a partir do día 21 da IT.

A este respecto, López Santamariña sinala que na propia xuntanza e tal e como a CIG ten manifestado en anteriores ocasións, se lle comunicou aos representantes da consellaría que “se se precisa facer un control das causas das baixas a administración ten mecanismos para realizalos”. Entre outros, a coordinadora de Área Pública, sinalou o cumprimento da Lei de Prevención de Riscos Laborais.

Alén diso, cuestiona que con esta medida, a administración pretenda, unha vez máis, seguir deteriorando a imaxe do seu persoal e, por ende, dos seus servizos públicos.

Facenda propón a redución voluntaria dun máximo dun terzo da xornada laboral para o persoal laboral e funcionario fixo. Redución que pretende que sexa obrigatoria para o persoal interino e contratado. Para a aplicación desta medida, adiantouse que será o Consello da Xunta o encargado de regulala. “Supón un ataque para as condicións laborais e salariais deste persoal, que é xustamente o que ten as peores condicións de traballo e xunto coas taxas de reposición e a non cobertura de vacantes é un ataque aos servizos públicos”.

López Santamariña lembra ademais que este colectivo, a día de hoxe sabe que case é imposíbel acceder ao emprego público, porque xa está anunciado que non haberá oferta pública de emprego.

A Xunta de Galiza tamén pretende reducir tres días de asuntos propios dos nove actuais, mantendo a mesma masa salarial malia incrementarse o número de horas, o que supón unha rebaixa implícita do salario.

Supresión do fondo de acción social

Outra das medidas, especialmente lesiva para o persoal é a retirada do fondo de acción social, agás no caso das axudas por incapacidade. Santamariña aclara que a súa supresión “é inadmisíbel”, dado que a existencia deste fondos naceron como consecuencia de acordos coas organizacións sindicais para, retrotraendo unha pequena porcentaxe do total da masa salarial compensar solidariamente, a aqueles traballadores en peores condicións, en temas como gastos sanitarios non cubertos pola Seguridade Social, atención a menores, dependentes, axudas para estudios...

Respecto do anuncio de regular a xornada para que nunca sexa inferior a 37,5 horas, a CIG xa ten manifestado que este é o tempo de traballo xa establecido na normativa da función pública galega e no convenio do persoal laboral.

Canto á aplicación da xubilación forzosa aos 65 anos e á valoración con revisión anual das solicitudes que se presenten para prolongar a vida laboral, os representantes da área pública da CIG manifestaron, na propia xuntanza, que isto é inadmisíbel e que en moitos sectores non estaba nin regulado, nin negociado, porque é mandato do Estatuto Básico do Emprego/a Público/a. “Desta forma o que fan é pechar as portas a calquera modificación e aplicar a reforma das pensións pura e dura”.

Xunto a isto, e especificamente para o persoal laboral da Xunta de Galiza, ademais de todo o anterior, preténdese modificar o V Convenio Colectivo do Persoal Laboral, concretamente nos seu artigo 19, relativo á compensación en días libres por traballo en festivos e domingos. Neste caso, explican, preténdese anular esa compensación en días libres e pagalos.

Do artigo 29, pretenden eliminar o dereito, recoñecido por convenio, a xantar ou cear naqueles centros que conten con servizo de comedor e tamén pretenden suprimir a Disposición Adicional Terceira dese convenio, que recoñece que en todos aqueles centros que por causa das súas características específicas os traballadores/as viñesen gozando dun período de descanso en Nadal ou Semana Santa o perdan.

Plus de Altos Cargos

A CIG critica que a suspensión do plus dos altos cargos, sexa só provisional, tendo en conta que, no momento no que nos atopamos e coas medidas agresivas que se poñen enriba da mesa para as traballadoras e traballadores públicos era o momento de facer efectiva a súa supresión definitiva. A CIG lembra que, sobre esta cuestión, fixo unha intensa campaña para que isto se lograra e mesmo presentou unha ILP no mesmo sentido, avalada por miles de sinaturas de galegos e galegas que manifestaban así, a súa demanda de que este plus fose eliminado.

Un cento de delegados/as da limpeza da CIG e de ELA concéntranse en Madrid en defensa dos convenios provinciais

ivan — Fri, 03 Feb 2012 14:20:39 +0100

Dende a federación de Servizos da CIG explicaron que durante a xuntanza quedou moi claro que a pretensión da patronal para por centralizar en Madrid a negociación dos convenios colectivos.

“Pretenden limitar as negociacións de ámbito inferior, como os convenios de empresa e os acordos de equiparación, e nós entendemos que a negociación ten que ser a nivel provincial”, indican.

A vindeira xuntanza da comisión negociadora do convenio estatal de limpeza será o próximo 1 de marzo.

O xulgado do Social declara a improcedencia dun dos despedimentos executados pola dirección de Asfedro

begonha.carballo — Fri, 03 Feb 2012 13:29:30 +0100

A continuación reproducimos o comunicado emitido pola CIG-Saúde de Ferrol:

Hai case un mes celebrouse un xuízo por despedimento dunha traballadora de Asfedro; o día 8 de febreiro terá lugar un novo xuízo por despedimento doutro traballador.

O pasado mes denunciamos os despedimentos e hoxe novamente volvemos mobilizarnos en defensa dos dereitos das/os traballadores/as e usuarias/os de Asfedro.

Non se entende que nestes últimos anos se fixeran contratacións a persoas sen ningunha experiencia (mesmo familiares). Estas contratacións realizáronse sen someterse a concurso público nin ter en conta os principios básicos de igualdade, mérito e capacidade que debería ter toda contratación profesional en entidades sen ánimo de lucro e subvencionadas case ao 100% con cartos públicos, como é o Asfedro – ade mais de "privatizar" (por medio da externalización de servizos) a maior parte dos servizos e funcións que viñan desenvolvendo as traballadoras e o traballador despedido, ao longo de máis de vinte anos-.

Damos por feito, que á Xunta Directiva de Asfedro nin lle interesan as causas que xeran esta situación, nin ofrecen máis alternativa que a do despedimento. Mais non se entende a actitude de silencio e pasividade dos delegados/as sindicais, xa que entendemos que estas persoas deben velar polo interese xeral do persoal e da empresa, tratando de dar solución aos problemas das traballadoras e traballadores, tendo como última consideración o despedimento e buscando previamente alternativas, como por exemplo a valoración de revisión da táboa salarial do convenio de persoal de Asfedro, onde a diferenza entre salarios duns profesionais a outros acada os 25.000 euros nalgúns casos.

Unha táboa salarial dun convenio asinado en agosto de 2011, sen asembleas, nin coñecemento das/os traballadoras que tan só fomentou o aumento de desigualdades entre traballadores/as e a falla de transparencia, algo que non parece digno de louvanza en ningunha empresa e moito menos, nunha que xestiona recursos públicos.

Pero mentres a Xunta Directiva argumenta repetidamente tratar de fomentar e potenciar a prevención en drogodependencias, non sabemos que se fixo estes últimos 3 anos, pois estes traballadores/as despedidos non tiveron practicamente ningunha tarefa, sufrindo actos hostís por parte da Xunta Directiva como represalia as súas lexítimas demandas dunha maior transparencia nas contas da entidade, no emprego do diñeiro publico, erespecto dos seus dereitos profesionais e laborais.

Dende o ano 2009 nin sequera se lles pediu a estes traballadores a elaboración de programas, sendo totalmente inexistente a información sobre do que a entidade nestes anos presentou como programación da área de Prevención.

Parece claro, que a Xunta Directiva de Asfedro non está polo labor de corrixir as liñas de actuación que está a desenvolver respecto a estes despedimentos, que non se sustentan no recorte de orzamentos -que curiosamente se veñen comentando nos medios de comunicación-. Así, resulta que un dos despedimentos xa foi declarado improcedente polo Xulgado do Social de Ferrol; as causas económicas non sustentan este despedimento.

Agardamos que esta sentenza provisional faga reflexionar a Xunta Directiva e delegados/as sindicais polo ben dunha entidade punteira na nosa comarca, e non afondar máis a lacra do paro. Esiximos e debemos velar pola transparencia na xestión dunha entidade que presta servizos socio-sanitarios con cartos públicos, que debería cumprir escrupulosamente coas súas propias normas estatutarias, co gallo de democratizar asdecisións da asociación a través da participación asemblear dos seus socios e socias; xestionando as situacións conflitivas e evitando o gasto de cartos públicos, en asesoramento xurídico, para despedimentos que respostan a políticas represivas e non a motivos económicos.

Unha vez máis, pedimos a aclaración destas cuestións esixindo a obrigada transparencia na xestión da entidade a nivel de servizos e investimento de cartos públicos, coa publicidade debida -de unha necesaria Auditoría- aos entes públicos que subvencionan a entidade e a todos os socios e socias da mesma. Ao mesmo tempo que defendemos a declaración de nulidade do despedimento do compañeiro de ASFEDRO por terse realizado con quebra dos dereitos fundamentais do traballador/a .

Os traballadores e traballadoras da Torre trasladan as súas reivindicacións aos representantes dos tres grupos parlamentares

begonha.carballo — Fri, 03 Feb 2012 13:22:23 +0100

Á saída das xuntanzas, que se produciron de xeito consecutivo con cada grupo no propio Pazo do Hórreo, os traballadores/as quixeron agradecer o trato recibido por parte de todos/as os/as representantes políticos que escoitaron con atención as súas peticións e, no caso do BNG e do PSOE, mesmo se comprometeron a tratar o conflito no marco parlamentar.

Dende o colectivo de traballadores/as queren destacar tamén a actitude amosada polos representantes do PPdeG, Natalia Barros e Román Rodríguez, quen en contraposición á indiferenza e pasotismo dos seus compañeiros/as de partido no Goberno da Coruña, se comprometeron a pórse en contacto co Concello, no prazo de unha semana, para mediar e tentar buscar unha solución ao conflito.

Neste senso, o persoal urxe unha solución á súa situación laboral, xa que de momento non poden percibir a prestación por desemprego ao non tratarse dun despedimento.

A CIG-Administración esixe a supresión “inmediata e definitiva” do plus de altos cargos

ivan — Fri, 03 Feb 2012 13:06:32 +0100

Dende o sector de Autonómica da CIG-Administración fixeron fincapé en que o anuncio de Núñez Feijóo non supón que se suprima o plus, senón que só se suspende temporalmente. “Aínda así, é ben posíbel que este complemento, aprobado por lei, poda seguir sendo cobrado polos seus beneficiarios mediante resolución xudicial, dependendo en boa medida da vontade dos seus perceptores”, sosteñen.

Lembraron tamén que a CIG leva dende hai anos rexeitando o plus con manifestacións, concentracións, denuncias públicas e A presentación no Parlamento dunha iniciativa lexislativa popular que foi rexeitada polo PP e PSOE, “polo que non nos parece suficiente a decisión adoptada agora”.

Por todo isto, reclaman a supresión inmediata e definitiva do plus e cualifican de demagóxica a decisión de suspendelo temporalmente. “Consideramos que os verdadeiros problemas son outros e que esta medida só pretende ser unha xustificación moral dos recortes que se lle piden ao colectivo de empregados/as públicos/as”. Finalmente, consideran un insulto que se poña ao mesmo nivel un plus salarial de altos cargos que, por exemplo, a supresión de complemento por enfermidade ou accidente non laboral.

Convocada unha nova concentración en protesta polo acoso de Prosegur a un traballador que ía na candidatura da central

begonha.carballo — Fri, 03 Feb 2012 12:25:26 +0100

O acoso ao traballador comezou tras presentarse ás eleccións sindicais da empresa polo sindicato CIG; a partires dese momento e despois de máis de 10 anos de traballo no mesmo posto, “casualmente”, Prosegur decide trasladalo de centro.

Desde a Federación de Servizos da CIG quixeron deixar ben claro que “non lle imos consentir este tipo de comportamento ás empresas e imos utilizar todos medios ao noso alcance para mudar esta situación”. Así mesmo, trasladaron o apoio e a solidariedade ao compañeiro afectado.

Os delegados/as de persoal da Fundación Semana Verde de Silleda culpan á directora xeral da mala situación económica da entidade

ivan — Thu, 02 Feb 2012 20:22:31 +0100

Os representantes dos empregados/as lembraron que a situación económica da entidade provocou xa o despedimento de nove traballadores/as o pasado mes de outubro e que “a posterior incorporación a un ERE temporal do resto, 18 persoas (do que se autoexcluíu a directora xeral) está a afectar gravemente tanto aos traballadores/as, que se ven abandonados á máis absoluta das incertezas, como á propia Fundación, que se resente na súa actividade diaria poñendo en risco a súa viabilidade futura”.

Todo isto produciuse -sosteñen- nun contexto no que a xestión do ERE levada a cabo pola directora xeral, Paloma Hidalgo, foi “absolutamente arbitraria e ofensiva” para os traballadores/as, que foron ignorados en todo o proceso. “A lista de 18 traballadores/as elaborada pola directora sen criterio de ningún tipo supoñía o desmantelamento de departamentos enteiros indispensábeis para o funcionamento da Fundación”.

Outro dos aspectos que censuran é que a aplicación do ERE temporal fíxose sen negociación algunha cos representantes dos traballadores/as, ocultándose o calendario, “co que non saben que compañeiros/as están a traballar en cada día, evitando calquera posibilidade de coordinación no desempeño das súas tarefas”. Tampouco se está a cumprir por parte da empresa os plans de formación que foron consensuados no acordo coa autoridade laboral.

Tamén criticaron a actitude da directora xeral, “emboscada na escusa da crise, rexeitando calquera responsabilidade propia, debuxando na xustificación do ERE un escenario derrotista na que todos son responsábeis menos ela, dende a propia localización en Silleda da Feira Internacional de Galicia, ata facer predicións inxustificadas sobre a viabilidade das feiras actuais. Iso si, todo moi lonxe do plan de negocio co que se comprometeu cando asumiu o cargo, e sen mencionar a mala xestión destes últimos anos, ou a incapacidade para buscar novas feiras e novas vías de negocio.

Plan de viabilidade

Tal e como explicaron, a Fundación encargou en 2008 un plan de viabilidade a una empresa externa que se completou posteriormente cun plan estratéxico para pórlle freo ao deterioro económico que estaba a padecer. Neste plan concluíase que se debía establecer o equilibrio orzamentario con achegas dos patróns para asegurar a continuidade da actividade feiral mentres se establecían accións estratéxicas pola propia Fundación encamiñadas a mellorar os seus resultados (promoción de novas actividades, incremento da cifra de negocio e a profesionalización da Fundación coa contratación dun xerente e un director comercial). “É precisamente a dirección xeral a encargada de executar o plan estratéxico. Sen embargo, tres anos despois e a pesar de que si se recibiron achegas económicas, os resultados do plan son francamente malos e atopámonos con una situación económica igual de delicada, sen feiras nin novas actividades, e en vez de profesionalización de persoal atopámonos con despidos e un ERE temporal”, lamentan. Diante disto, reclaman a substitución da actual directora xeral.

Finalmente, adiantaron que nos vindeiros días manterán unha xuntanza co presidente da entidade e conselleiro de Presidencia, Alfonso Rueda, e amosaron a súa confianza en que o recurso de alzada presentado contra o ERE temporal lles sexa favorábel.

Os traballadores/as de Alcoa Inespal continúan coas concentracións en contra do ERE e a deslocalización da produción

begonha.carballo — Thu, 02 Feb 2012 14:38:50 +0100

A concentración, que se desenvolveu entre ás 13:00 e as 14:00 horas nas inmediacións das instalacións de Alcoa no Polígono da Grela, precede á gran manifestación que o Comité ten convocada para este venres 3 de febreiro. Na marcha, que sairá ás 20:00 horas da Praza da Palloza, agárdase que tamén participen operarios/as das plantas de Alcoa en San Cibrán e Avilés. Esta última tamén está afectada polo recorte de produción e por un ERE de suspensión temporal para o 41% dos traballadores/as.

Durante a protesta deste xoves, os traballadores e traballadoras conseguiron cortar todos os carrís da estrada en sentido Arteixo durante aproximadamente 15 minutos. Pasado ese tempo, as forzas de seguridade (que despregaron un importante dispositivo no que se incluíron ducias de axentes da policía nacional, e membros da garda civil e policía local, estes dous últimos corpos para regular o tráfico) instaron aos/as manifestantes á deixar un carril libre, xa que a retención de vehículos era considerábel. Pouco antes das dúas da tarde, os operarios/as entraron no recinto da factoría para continuar coa protesta ás portas do edificio de oficinas de Alcoa.

Proceso de deslocalización

As razóns que a empresa alega para estas medidas refírense ao alto custe da enerxía eléctrica no estado, a suba do prezo das materias primas, a caída da cotización do aluminio, así como que os resultados negativos do último trimestre de 2011. Porén, para a Sección Sindical da CIG no Comité detrás deste recorte agóchase a pretensión da multinacional de deslocalizar a produción a outros países, especialmente tendo en conta que a multinacional ten previsto inaugurar unha nova factoría en Arabia Saudita o próximo ano.

Neste senso, os delegados da central nacionalista lembran que no ano 2009 Alcoa realizou un recorte de produción de semellantes dimensións ao que agora pretende, tamén amparándose no contexto de crise económica. Naquela ocasión a medida resultou moito menos traumática xa que a redución da produción se repartiu de xeito equitativo entre todas as plantas do conglomerado empresarial e no caso concreto da Coruña a caída da produción situouse arredor do 30%. Porén neste ano Alcoa concentra este axuste no peche de plantas e na redución drástica da produción nas factorías da Coruña e Avilés.

Condicións equitativas

No marco das negociacións do ERE, os representantes do persoal da CIG tamén teñen reclamado á dirección que as condicións do expediente sexan equitativas e afecten por igual a todo o persoal, xa que a proposta da empresa deixa fóra da regulación aos responsábeis da factoría coruñesa. Neste senso, o comité xa advertiu que non continuará negociando se a compañía non muda nas súas pretensións.

A cifra de desempregados/as alcanza un novo máximo histórico en Galiza, ao situarse nas 271.284 persoas

paula.castro — Thu, 02 Feb 2012 13:59:44 +0100

Xaneiro pechouse en Galiza con 271.284 persoas no paro, o que supón un incremento de 13.050 con respecto ao mes anterior (crece un 5,05%). En termos interanuais, a cifra é aínda moito máis preocupante, xa que amosa un aumento de 25.453 persoas con respecto ao mes de xaneiro de 2011 (un 10,35% máis).

O peor comportamento rexistrouse no sector servizos, onde o paro se incrementou un 6,60% fronte ao 5,07% do resto do Estado español. A continuación situouse a construción, onde aumentou un 4,19 en Galiza e un 2,11 no resto. No sector industrial o incremento foi do 3,07 no noso país e do 2,96 no conxunto do Estado.

Elevada rotación

Con respecto á contratación, destaca o elevado número de contratos subscritos (cerca de 47.500) a pesar da subida experimentada no número de desempregados/as, o que vén a amosar a elevada rotación dos empregados/as temporais e a escasa duración dos contratos (só o 7,8 foron indefinidos). Isto demostra a escasa incidencia do contrato “estrela” da última reforma laboral, o de fomento da contratación indefinida.

Para a CIG, a situación é especialmente grave, toda vez que as políticas que se están a deseñar e as que se veñen aplicando, tanto desde o goberno central como desde a Xunta de Galiza, se demostraron erradas. A central sindical insiste en que as medidas de austeridade e de control do déficit están a provocar unha destrución acelerada do emprego. Por iso, demanda o incremento do investimento público e un apoio decidido aos nosos sectores produtivos, para favorecer a creación de emprego de calidade, no canto de destruílo e de precarizar o existente.

O Tribunal Superior de Xustiza de Galiza anula parcialmente a RPT do concello de Celanova

paula.castro — Thu, 02 Feb 2012 10:35:44 +0100

Con anterioridade, no ano 2009, o Concello de Celanova xa fora condenado a elaborar a RPT para normalizar os postos de traballo, castigando as actitudes autoritarias do alcalde, Antonio Mouriño que, segundo a CIG “sempre considerou a entidade o seu facenda particular”.

A CIG explica que daquela o alcalde non tivo máis remedio que convocar unha mesa de negociación que acabou despachando en dúas sesións o que provocou que a CIG a cualificara de paripé e ao resultado da dita mesa, a RPT, como un exercicio de arbitrariedade e subxectividade onde os complementos se impoñían arbitrariamente; e onde o alcalde do Concello de Celanova, coñecedor das subxectividades e discriminación cometidas, desistiu de arranxalas administrativamente provocando a perpetuación dunha unha situación inxusta nas normas municipais.

Agora o TXSG vén de darlle a razón á CIG anulando parte da RPT por infrinxir o disposto na lexislación e condenando ao Concello de Celanova a modificar o dito aspecto na RPT.

A CIG vén de remitir un escrito ao alcalde no que exixe a convocatoria inmediata dunha mesa xeral na que se aborde tanto o tema da RPT como os demais temas xudicializados: cadrante anual de traballo, negociación de condicións de traballo, produtividades non regulamentadas, etc. e no que o convida a arranxar as cousas na mesa de negociación no canto do xulgado.

Do mesmo xeito fai un chamamento aos veciños a reflexionar sobre o despilfarro de miles de euros en avogados que provoca o alcalde Antonio Mouriño e sobre se é a mellor opción dedicar eses recursos, “tan necesarios nunha época de crise como esta, na defensa da súa testarudez no xulgado no canto de arranxar as cousas falando que, aparte de ser máis civilizado, é de balde”.

O xulgado anula a orde de servizos mínimos decretada pola Consellaría para a folga parcial da limpeza no Hospital de Cee

begonha.carballo — Thu, 02 Feb 2012 10:22:55 +0100

A xustiza subliña que o decreto de servizos mínimos do Sergas vulnera o dereito fundamental á folga, xa que estabelecía unha actividade do 100% nas urxencias, do 70% nas áreas de radioloxía, laboratorio de urxencias e hospitalización e do 50% no resto das áreas. Ademais, o decreto estabelecía un operativo de traballo para os festivos e fins de semanas do 100%.

O fallo do xulgado entende que a motivación da resolución da administración “é escasa e xenérica”, mais tendo en conta que a folga tiña carácter parcial e unicamente afectaba a dúas horas de cada quenda de traballo. Esta circunstancia, subliña o fallo, permitía articular un horario no que o servizo fose atendido de xeito adecuado e ao mesmo tempo permitise o libre exercicio do dereito á folga.

Con esta resolución, a xustiza dá a razón as traballadoras e traballadores do servizo que viron vulnerado o seu dereito á folga tanto na convocatoria do pasado mes de novembro, como no caso da recente convocatoria de folga indefinida, que finalmente foi suspendida xa que os servizos mínimos, impostos de xeito ilegal, na práctica imposibilitaron o desenvolvemento do paro.

Dende a CIG e UGT lembran que o persoal de limpeza do Hospital continúa adiante co seu calendario de mobilizacións en demanda dun convenio de centro que permita a súa equiparación co grupo E do Sergas; un dereito que xa teñen recoñecido a maioría dos traballadores e traballadoras deste servizo no resto dos hospitais galegos. Neste senso, a representación do persoal lanza un novo chamamento á Xerencia e á dirección de Limpisa Grupo Norte para que abran unha mesa de negociación que permita a resolución deste conflito.

Eliminar tres días de asuntos propios ao persoal da administración pública non suporá aforro algún

paula.castro — Wed, 01 Feb 2012 19:39:10 +0100

O sector da Autonómica de CIG-Administración engade a isto, que deixar a porta aberta á revisión do complemento salarial en baixas por enfermidade común é deixar ao traballador á súa sorte nos momentos máis delicados. “Ninguén elixe sufrir un accidente non laboral, ter un cancro ou un embarazo de risco. E cando sucede, de novo, na Administración xeral non se cubren estas baixas salvo casos excepcionais recollidos na Lei de orzamentos”, manifestan.

Ao tempo, cuestionan a imaxe que das traballadoras e traballadores públicos se transmite. “Somos profesionais que prestamos un servizo á cidadanía, non maleantes que non merecen os dereitos que teñen”.

Fronte á insistencia da necesidade de facer recortes orzamentarios e de facerllos pagar precisamente ao persoal, sinalan que “os servizos privatizados ou o traballo feito por asistencias técnicas tamén custan cartos á Xunta de Galiza e nese punto ninguén do Goberno galego pon o grito no ceo”.

Fronte a isto defenden que “unha traballadora ou traballador público menos é un cachiño de servizo público que ou ben desaparece ou ben pasa a ser prestado por persoal privado, moito máis manexable”. E alertan de que se os mepregados e empregadas públicas molestan é porque “somos o último escollo para o asalto á bolsa de negocio dos servizos públicos por parte da empresa privada que, como a cidadanía ben coñece, non se rexe polo servizo senón polo beneficio”.

Como alternativa a este novo recorte de dereitos, propoñen aforrar en salarios do persoal asesor político, dentro ou fóra dos gabinetes, ou na contratación de asistencias técnicas que, din, “asumen inxustificadamente o traballo reservado ás empregadas e empregados públicos”.

Manifestación en defensa do emprego e contra a deslocalización de Alcoa Inespal

begonha.carballo — Wed, 01 Feb 2012 18:38:20 +0100

O Comité de Alcoa Inespal ten convocada unha manifestación este venres 3 de febreiro en contra das pretensións da multinacional de deslocalizar a produción e na defensa dos postos de traballo no noso país. Alcoa vén de anunciar un recorte de produción e un ERE de suspensión temporal (cunha duración de 12 meses) que, no caso de autorizarse, afectaría ao 50% do cadro de persoal da factoría da Coruñ. Para o Comité esta decisión responde á clara intención da empresa de pechar a fábrica herculina e trasladar á produción ás novas instalacións que está a construír en Arabia Saudita.

A marcha sairá ás 20:00 horas da Praza da Palloza e percorrerá as rúas da Coruña até o edificio da Delegación do Goberno baixo a consigna "Non á deslocalización. Por un futuro industrial para o sector do aluminio".

A CIG-Ensino mobilízase contra a decisión de Educación de non convocar oferta pública de Emprego

paula.castro — Wed, 01 Feb 2012 14:22:33 +0100

A conxelación da oferta de emprego terá graves consecuencias para o ensino público. Entre outras, o secretario nacional de CIG-Ensino sinala a redución do profesorado nos centros e a supresión de unidades; a imposibilidade de reducir rateos e a consecuente masificación das aulas; o incremento da impartición de afíns e as itinerancias; o incremento de profesorado interino en condicións máis precarias e centros con cadros de persoal inestábeis e insuficientes para aplicar a redución horaria aos maiores de 55 anos.

Por iso, valora esta decisión como “moi grave” e lembra que no curso no que estamos, foron máis de 1.000 profesores/as os/as que se suprimiron, aos que lle hai que engadir os máis de 500 do curso anterior. “Estamos a falar de máis de 1.500 profesores menos que hai nos centros de ensino público”. Xunto a isto, salienta que o curso pasado houbo 1.400 xubilacións e que para este curso prevense entre 400 e 500. “É polo tanto unha medida que supón unha destrución de emprego importantísima”, afirma.

Alén diso, sinala que xa non houbo oferta pública de emprego en 2009 e que a de 2011 foi só para primaria e “raquítica”. Por iso, asegura que “se esta consellaría tivera un mínimo de estima ao sistema educativo público galego, para mellorar a calidade e para satisfacer as demandas do profesorado, estariamos ante outra actitude, convocando oferta de emprego público”.

A CIG-Ensino discrepa tamén coa xustificación de Educación, segundo a que non se fará a convocatoria porque para tan poucas prazas é demasiado custosa. “É unha argumentación economicista e non atende ás necesidades do sistema público”.

Louzao denuncia que estes mesmos criterios non se teñen en conta para o ensino privado e concertado. “Nun momento de crise como na que estamos, o que se debería estar facendo é reforzando o sistema público porque é a mellor maneira de atacar as desigualdades sociais e que a crise económica non a sufran as clases populares, as clases máis humildes, máis desfavorecidas, porque o sistema público é o único que garante igualdade de condicións”.

Reforma do sistema educativo

Ás preguntas dos xornalistas respecto das reformas que o PP pretende introducir no sistema educativo, o secretario nacional de CIG-Ensino denunciou que se trata de medidas “reaccionarias, clasistas e segregacionistas”.

Respecto do anuncio de ampliar un ano máis o bacharelato sinalou que “se agocha que se vai acurtar a escolarización dunha parte importante do alumnado do estado español”.

Segundo Louzao, aos 15 anos o alumnado vai ter que optar entre formación profesional e bacharelato. “Haberá algún que continúe na ESO porque non rematou, pero tamén é verdade que agora hai unha parte importante do alumnado que non segue o ritmo normal de aprendizaxe, que chega até os 16 anos e continúa até os 18 e iso vaise rematar con esta proposta. O debate é que se está retraendo do ensino obrigatorio realmente a unha parte importante”.

Sobre a intención de facer unha avaliación externa centro a centro, explicou que o obxectivo é estabelecer “un ránking de centros segundo o rendemento escolar do alumnado”. E advertiu que non se terá en conta onde está situado o centro, as condicións socioeconómicas do alumnado escolarizado, se hai ou non alumnado de minorías étnicas, inmigrante ou máis ou menos alumnos con necesidades educativas especiais. “Iso non se vai considerar”, dixo, afirmando que “sería totalmente inxusto que se fixese unha clasificación dos centros en base a iso, porque habería centros de primeira e de segunda e como consecuencia diso terán ou non acceso a recursos especiais”.

Respecto da materia de Educación para a Cidadanía sinalou que o debate debería ser se os contidos que recolle esa materia teñen que ser ou non transversais e, polo tanto, trasladar eses contidos a distintas materias do currículo escolar. “O que pretende o PP é cambiar esa materia por outra que nos lembra, aos que a tivemos, aquela de Formación do Espírito Nacional. Vai ser unha materia cun contido centralista, reaccionario e contrario aos valores que deben caracterizar a unha sociedade democrática”.

Para Louzao, a pretensión do PP é trasladar á sociedade uns determinados valores e unha determinada ideoloxía. Neste sentido e respecto dos que cuestionan que se imparta educación sexual nun centro a rapaces de 12 anos afirmou que “as familias teñen os seus dereitos e as súas obrigas pero a educación non lle corresponde unicamente aos pais e as nais, correspóndenos a todos como cidadáns porque o futuro da sociedade vai depender de todos nós. O sistema educativo ten que ser igual para todos, baixo uns principios democráticos, de dereitos humanos e non iuns principios deolóxicos reaccionarios”.

O persoal da Torre de Hércules realizou un peche nas oficinas do Consorcio de Turismo

begonha.carballo — Wed, 01 Feb 2012 12:55:57 +0100

Esta acción enmárcase dentro do calendario de mobilizacións que o persoal está a levar a cabo para demandar do Concello que garanta a continuidade dos seus empregos unha vez reaberta a Torre de Hércules. Para iso, piden que no prego de condicións da nova contrata se inclúa unha cláusula que recoñeza o seu dereito a seren subrogados na empresa que resulte adxudicataria.

Porén, diante do indiferenza amosada polo goberno dende que anunciou o peche do faro romano para executar unhas obras de mantemento, os xa ex empregados/as da Torre acordaron iniciar a ocupación das dependencias do Consorcio de Turismo como medida de presión.

Dende o colectivo de traballadores/as apélase a responsabilidade do Concello para rematar coa situación que están a padecer xa que “ademais de traballadores/as tamén somos cidadáns e cidadás da Coruña e a responsabilidade do equipo de goberno é atendernos”, sinalaron.

No marco das súas críticas pola postura mantida dende o executivo municipal neste conflito, sinalaron novamente á falsidade dos argumentos esgrimidos para xustificar o peche urxente da Torre, xa que dúas semanas despois de clausurar o edificio as obras aínda non deron comezo.

A Sección Sindical da CIG no Concello da Coruña rexeita a privatización do servizo de vixilancia dos centros cívicos

begonha.carballo — Wed, 01 Feb 2012 12:38:28 +0100

Dende a Sección Sindical negan que sexa certo que estas externalizacións abaraten custes, xa que a privatización de traballos ou servizos de carácter permanente acaban sempre causando problemas legais á propia administración municipal, por mor da responsabilidade civil subsidiaria. Así lembran o caso da concesión da vixilancia do cuartel de San Amaro.

Ademais, destacan que este tipo de tarefas de vixilancia “é unha das máis adecuadas que poden desenvolven en postos de segunda actividade a propia policía”. Neste senso, aseguran que estes servizos estarían “moito mellor cubertos pola policía local debido á súa preparación e á súa condición de autoridade”.

Sobre esta cuestión, dende a Sección Sindical da CIG aconsellan ao Concello da Coruña que “a mellor maneira de optimizar e de abaratar custes non pode nin debe ser a de privatizalos a costa da calidade do propio servizo nin a de trasladar gastos dun capítulo a outro dos orzamentos, senón a de optimizar os propios recursos cos que se conta”.

A CIG considera un fracaso a operación de privatización da Caixa de Aforros deseñada por Alberte Nuñez Feijoo

paula.castro — Wed, 01 Feb 2012 09:39:28 +0100

Os acontecementos que rodean estes días a Novagalicia Banco demostran a intención de permitir un desfarelamento da entidade co fin de xustificar a súa entrega a unha das macroentidades españolas a prezo de saldo, (é preciso lembrar que a CAM foi vendida ao Banco Sabadell por 1 euro), así se entende a gravísima situación que está atravesando a antiga Caixa de Aforros dende que o goberno central e o Banco de España tomaron o control do Consello de Administración a través do FROB.

Dende o punto de vista laboral a Dirección anuncia permanentemente medidas contraditorias que xeran incerteza entre o cadro de persoal, a última un Expediente de Regulación de Emprego para 650 persoas acompañado da redución dos SSCC en Galiza e do peche de 110 oficinas deficitarias fora de Galiza.

A absorción de Novagalicia Bnco por unha gran entidade (Santander, BBVA ou Caixabank), levaría a un novo “excedente de persoal”: serían eliminados os SSCC en Galiza (en trono a 1.000 postos de traballo); afectando ás empresas auxiliares que empregan en torno a 600 persoas; e habería novas duplicidades na rede comercial que afectaría en maior grado dependendo da entidade absorbente e a súa presenza en Galiza. O cadro do persoal do Santander ten 682 persoas, o BBVA ten no entorno de 1.100 persoas; Caixabank 700.

Ademais a negociación laboral para desfacerse de 650 traballadores e traballadoras dáse nun marco de crecente desconfianza entre a clientela pola mala comercialización de produtos financeiros complexos no tramo minorista, ao pequeno aforrador/a. Ao mesmo tempo escóitanse as primeiras voces de diferentes colectivos contra o que cualifican, de xeito atinado, de privatización da Obra Social.

Con todo un dos efectos mais grave desta operación é a falta de financiamento aos sectores produtivos que está levando ao peche masivo de empresas en Galiza, onde a Caixa tiña o 42% do mercado financeiro, o que está agravando as consecuencias da crise e polo tanto os despedimentos colectivos e o medre do desemprego.

O PSOE pretendeu solventar os problemas do sector financeiro cargando nos pequenos clientes a falta de recursos propios a través da comercialización de produtos complexos; a través da privatización das Caixas de Aforros; a través da inxección en entidades privadas de inxentes recursos público procedentes os impostos que paga a cidadanía e impulsando a concentración do sector mediante fusións. Unha liña de actuación errada na que pretende insistir o goberno do Partido Popular.

Para a CIG non se pode seguir insistindo en vías fracasadas, a única saída é a constitución dunha banca pública galega que pode constituírse a través da toma de control de Novagalicia Banco, entidade que xa está nacionalizada. Xa hai unha segregación da entidade entre Novagalicia Banco, que actúa en Galiza e que é rendible e NCG banco que actúa fora do país (rede deficitaria) e que permitiría avanzar nesta liña.

O país precisa unha banca pública para saír da crise, é necesaria, é posible e factible, como mellor garantía para Galiza, a clientela, os traballadores e traballadoras e a sociedade en xeral. É unha cuestión de vontade política.

Os traballadores do naval da ría de Ferrol retoman as mobilizacións para pedir carga de traballo ocupando a Casa do Concello

begonha.carballo — Tue, 31 Jan 2012 18:15:33 +0100

Miles de operarios/as dos estaleiros da ría de Ferrol retomaron este martes o calendario de mobilizacións en demanda de carga de traballo e a construción do dique flotante cunha multitudinaria manifestación que percorreu as rúas da cidade dende o Esteiro até a Praza de Armas. Alí, os Comités de ambos estaleiros e das empresas auxiliares mantiñan un nova xuntanza co alcalde de Ferrol para trasladarlle as súas demandas e urxir medidas que rematen coa profunda crise que vive o sector naval por mor da falta de carga de traballo.

Unha vez chegados/as á Praza de Armas, ao berro de “queremos traballar e non emigrar” ou “ese dique onde está?”, os/as manifestantes irromperon no interior da Casa do Concello para amosar o seu descontento polo abandono no que as administracións galega e estatal teñen deixado a un sector do que dependen 17.000 empregos na comarca. Ás portas do salón da alcaldía producíronse momentos de tensión entre os manifestantes e a policía, que non dubidou en recorrer ao uso de gas pementa para reprimir a protesta e expulsar aos traballadores/as fóra do edificio municipal.

Accións urxentes

A acción de protesta coincidiu cunha reunión entre o Comité dos estaleiros de Fene e Ferrol e o alcalde da cidade, quen, unha vez máis, reiterou a súa dispoñibilidade aos traballadores/as e a predisposición do goberno de Madrid a atender as demandas do naval, pero pediu tempo para que novo executivo “se asente”. A este respecto, Manel Grandal, voceiro da CIG de Ferrol e membro da Sección Sindical de Navantia, subliñou que o sector non precisa máis de boas palabras nin promesas, senón que é tempo de tomar medidas urxentes, e que agora con gobernos “amigos” na Xunta e Madrid xa non hai escusas para adiar a asignación de partidas orzamentarias que permitan a construción do dique flotante, entre outras accións.

A este respecto, dende a CIG de Ferrol, lembraron que nos próximos meses se fará entrega da última fragata e do buque australiano, polo que a actividade do cadro de persoal da empresa principal quedará moi reducida, coas conseguintes consecuencias para o emprego nas industrias auxiliares. Segundo os cálculos da Sección Sindical da CIG nos estaleiros públicos tan só no primeiro semestre deste 2012 poderían destruírse máis de 1.000 empregos no sector.

Marcha a pé á Coruña

Os traballadores/as de Navantia e das industrias auxiliares continuarán a vindeira semana co calendario de mobilizacións cunha marcha a pé que os levará dende Ferrol até as portas da Delegación do Goberno en Galiza, situada na Coruña. Un grupo de traballadores/as partirá de Ferrol e Fene á primeira hora do martes 7 de febreiro e ten previsto chegar ás aforas da cidade herculina o xoves 9. Alí reuniranse co resto dos traballadores e traballadoras para marchar xuntos e levar as súas demandas até o edificio da Delegación do Goberno.

Traballadores/as dos Puntos de Atención Continuada péchanse en protesta polo incumprimento dos acordos co Sergas

ivan — Tue, 31 Jan 2012 14:43:19 +0100

No decurso da mañá deste martes 31 de xaneiro celebráronse concentracións ante as xerencias Integradas de Atención Primaria e xerencias de área de Pontevedra, Vigo, A Coruña e Compostela, entre outras, para reclamar o cumprimento dos acordos asinados polo Sergas coas organizacións sindicais. CIG-Saúde considera prioritaria a defensa do emprego público, que se respecten os dereitos do persoal e que se fagan as contratacións a través das listas.

A CIG-Saúde demanda a inmediata convocatoria da Comisión de Seguimento dos Acordos de Primaria. María Xosé Abuín, secretaria nacional da federación, reclama da administración “unha actitude negociadora para desbloquear esta situación e que non aconteza como na xuntanza anterior, á que chegaron coa negativa absoluta a abordar ningún dos problemas expostos”.

Abuín fai este chamamento ao SERGAS, logo de ter fracaso a anterior xuntanza coa administración, convocada a instancias da CIG e avalada coa sinatura de máis de 400 profesionais.

Con estas concentracións CIG-Saúde segue a reclamar:

1.- Cómputo de xornada. Reclamamos unha interpretación correcta dos termos do acordo e a súa translación ao aplicativo informático, para rematar coa situación actual na que se penaliza aos traballadores cando teñan unha IT ou collen un permiso retribuído.

2.- Confección de calendarios. Reclamamos calendarios anuais elaborados coa participación das e dos traballadores e construídos con criterios de equidade. Neses calendarios, a xornada ordinaria e a complementaria deben estar claramente diferenciadas, e deben recoller necesariamente a xornada ordinaria do persoal de PAC e tódolos seus permisos.

3.- Cumprimento da Acta do 16 de xuño. Na súa aplicación en cada área reclamamos que, de quedar horas suficientes (1623 horas/anuais), se proceda á creación dun vinculo estable (obra e servizo) contratando persoal das listas de contratacións antes de ofertalas á voluntariedade.

4.- Contratación de persoal das listas. Reclamamos que se cumpran os apartados do acordo que establecen que diante dunha ausencia, o primeiro é contratar persoal das listas de contratacións. Lembran que na área de Vigo, por exemplo, hai máis de 70 médicos nas listas.

Finalmente, advirten que esta situación está a provocar a precarización das condicións de traballo do persoal dos PAC's, “o que repercute moi negativamente no servizo prestado aos cidadáns”.

Moitos equipos de normalización aínda non percibiron o 75% das axudas aprobadas para o curso pasado (2010-2011)

paula.castro — Tue, 31 Jan 2012 14:14:20 +0100

Hai uns días, a CIG-Ensino denunciaba a drástica redución dos orzamentos destinados a proxectos de normalización da nosa lingua. Un 69% menos ca nos cursos 2009-2010 e 2010-2011, en que a partida orzamentaria soamente acadaba os 800.000€, despois de ter sufrido unha redución do 20%. Denunciaba tamén que a esta redución se sumaba á prohibición, vía orzamentaria, para realizar actividades nos catros primeiros meses do curso, de setembro a decembro de 2011, pois a convocatoria non admite a xustificación de gasto nese período.

Na Mesa Sectorial celebrada este martes, a CIG-Ensino volveu exixir unha explicación ao feito de que moitos centros públicos aínda non percibisen o 75% das axudas concedidas e que se aboen de inmediato. Máis cando os centros tiveron que xustificar con antelación ao 30 de xuño de 2011 os gastos realizados neses seis meses e que debían ser o 75% da cantidade concedida. Polo tanto, os centros realizaron o gasto, adiantando diñeiro, antes do 30 de xuño, e, sete meses despois, a Consellaría aínda non lles pagou nin lles confirma cando o fará, pois estas cantidades que corresponden ao orzamento de 2011 e que con cargo a el ían ser aboadas, non o foron e os centros soamente saben que agora terán que serlles retribuídas con cargo ao exercicio orzamentario de 2012.

“Estamos falando de cantidades importantes para os centros que tiveron que adiantalas. Se o importe medio das axudas concedidas era de 853€, significa que moitos centros non cobraron aínda 640€. Mais son moitos os centros de Secundaria aos que lles foi concedida unha axuda de 2000€ para a realización de actividades, estes centros aínda non cobraron 1500€ xa gastados”, explican desde a CIG-Ensino.

Estes atrasos e os recortes nas axudas deste ano “acaban por afogar os centros e impedironlles realizar actividades de normalización” denuncian, manifestando os eu rexeitamento a esta falta de planificación da Consellaría e esta agresión ao noso idioma.