A FGAMT-CIG cualificou de “éxito” a xornada de folga no sector das ambulancias, convocada para este xoves 8 de setembro en contra dos recortes no servizo de transporte sanitario urxente decretados pola Xunta. E iso a pesar dos abusivos servizos mínimos estabelecidos pola Consellaría de Sanidade, que marcou a actividade do 100% na atención urxente do 061 e no servizo de diálise e oncolóxico e dun 50% nos traslados inter e intrahospitalarios. O paro, que se desenvolve sen incidentes, está secundado pola práctica totalidade dos traballadores/as non destinados a servizos mínimos.

Arredor de mil persoas, entre bombeiros chegados de toda Galiza e delegados/as sindicais, participaron na manifestación convocada este venres en A Coruña, en contra da privatización dos servizos de emerxencia. A protesta, que transcorreu entre os ruídos das sirenas e os petardos, rematou diante do edificio da Deputación provincial, onde se produciu unha carga policial na que varios bombeiros resultaron feridos feridos, e onde tampouco foron recibidos os representantes dos traballadores/as polo presidente do organismo, Salvador Fernández Moreda.

Ás once e media da mañá ducias de bombeiros chegados de boa parte do país presentaban diante do Rexistro da Deputación un escrito no que se resumían todas as súas demandas, expresando deste xeito a súa desconformidade coa precariedade existente nas emerxencias, que son un servizo esencial para a comunidade e cuxa xestión está en mans de empresas privadas. Despois de presentar este escrito ocupaban estas instalacións até que foron atendidos polo presidente da Deputación de Pontevedra, Rafael Louzán.

Ás 11 da mañá congregábanse, ás portas do Parlamento de Galiza, traballadoras e traballadores dos servizos de emerxencia para participar na manifestación en demanda da creación dun servizo público galego de prevención, extinción de incendios e salvamento e contra a súa privatización. A marcha non pasou desapercibida polas rúas de Compostela e os petardos e os botes de fume foron os protagonistas. A manifestación rematou en San Caetano coa lectura do manifesto conxunto asinado pola CIG, CCOO e UGT.

Arredor duns 80 bombeiros procedentes de todo o País participaron nunha concentración diante da Dirección Xeral de Protección Civil para demandar un servizo público galego de Prevención, Extinción de Incendios e Salvamento que garanta un servizo de cualidade para toda a cidadanía e remate coa precarización laboral neste ámbito.

Tras a situación caótica vivida unha vez máis no CAE 112 de Galicia durante o temporal dos días pasados, os membros do Comité de Empresa denunciaron a falla de previsión por parte da Axencia Galega de Emerxencias e anunciaron o inicio dunha compaña para dar a coñecer os verdadeiros responsábeis do caos vivido a pasada fin de semana.

Un numeroso grupo de traballadores e traballadoras do servizo de emerxencias 112 de Galiza acudía o 9 de setembro a unha nova marcha para reclamar que se escoiten as súas demandas, así como para facer entrega no edificio administrativo da Xunta das máis de 4.000 sinaturas de apoio que teñen recollido ao longo dos últimos meses.