A CIG-Ensino esixiu a Consellaría de Educación, en rolda de prensa, que retire o borrador de Decreto de Plurilingüismo, despois de que do ditame do Consello Consultivo o declara ilegal ao afirmar “ que resulta contrario ao ordenamento xurídico” e que contravén a legalidade vixente, nomeadamente a Lei de Normalización Lingüística, o Estatuto de Autonomía, a Carta Europea das Linguas Minorizadas e a propia LOE. Este ditame ven a sumarse ao rexeitamento de diferentes institucións, organizacións e entidades que están reclamando que se retire este proxecto.

A CIG-Ensino xunto con outras organizacións sindicais que representan, no seu conxunto, o 89% do profesorado abandonaron esta mañá a Mesa Sectorial Docente diante da negativa da Consellaría a negociar a súa proposta de Decreto. Anxo Louzao, secretario nacional de CIG-Ensino, manifestou, na rolda de prensa conxunta posterior á Mesa, que a consellaría deu mostras de que non tiña intención de negociar e que a Mesa Sectorial convocada era unha “absoluta farsa”. A CIG-Ensino adiantou ademais que non desbota a posibilidade de volver convocar unha folga no Ensino.

A CIG-Ensino vén de solicitar unha entrevista co Conselleiro de Educación para “coñecer de primeira man as primeiras medidas que ten pensado levar a cabo a consellaría e exporlle as nosas propostas”. Dende a Federación sinalaron que aproveitarán a ocasión para trasladarlle a necesidade de que se convoque “urxentemente a mesa sectorial para tratar a OPE 2009, e que para a CIG-Ensino sería inaceptábel que se produciran medidas involucionistas en materia de normalización lingüística”, nomeadamente coa intención de derrogar o decreto do galego no ensino.

A CIG-Ensino vén de emitir un comunicado diante da actitude belixerante contra o galego, manifestada polo secretario xeral do PP e próximo presidente da Xunta de Galiza “que chegou a anunciar a futura derrogación do Decreto 124/07 de uso e promoción da lingua galega no ensino”. A executiva da CIG-Ensino manifestou que “o futuro presidente ten a obriga de desistir das súas intencións, por seren estas impropias de quen di que quere ser o presidente de todos os galegos e galegas, do contrario a CIG-Ensino reactivaría accións e iniciativas no ámbito do ensino para impedir esta agresión ao noso idioma”.

Máis dun 75% por cento do alumnado de segundo ciclo da ESO, ciclos formativos e Bacharelato secundou o paro estudantil convocado o 26 de novemebro pola Mocidade pola Normalización Lingüística e apoiado por Galiza Nova e Comités baixo o lema “Paremos as agresións contra o galego”. Por etapas, o seguimento foi maior no bacharelato e FP, en practicamente todos os casos superando o oitenta por cento do alumnado.

A Mocidade pola Normalización Lingüística, Galiza Nova e Comités fixeron un chamamento ao Valedor do Pobo, Benigno López, para que actúe ante o flagrante incumprimento do decreto 124/2007, polo que se regula o uso e a promoción do galego no sistema educativo. O responsábel nacional da Mocidade pola Normalización, Fran Rei, recordoulle a Benigno López que “o Valedor está para velar polo cumprimento das leis que xa existen e non para dar abeiro a hipotéticas reclamacións dos que non queren que se cumpran”.

Cento noventa equipos de normalización lingüística dos centros de ensino galegos presentarán a súa dimisión se non hai un cambio de rumbo na Consellaría de Educación para aplicar o actual decreto de promoción do noso idioma no ensino non universitario.