As asembleas de traballadores/as dos centros que a compañía Liteyca ten en Galiza rexeitaron por unanimidade a proposta de regulación de emprego temporal presentada pola dirección. Mediante este ERE, a empresa, que realiza tarefas de mantemento e instalación de liñas para Telefónica, pretende suspender temporalmente os contratos de maneira que un total de 35 traballadores/as, dos 152 operarios/as que a compañía ten na Coruña, Lugo e Pontevedra, estarían por quendas no desemprego ao longo de un ano.

Os traballadores/as de Telefónica en Galiza estaban chamados hoxe a participar no paro de media xornada convocado a nivel estatal para rexeitar os despedimentos previstos pola compañía e reclamar un convenio digno. Empregados/as da empresa da provincia de Pontevedra realizaron unha concentración na sede central do Calvario, en Vigo.

Empregados/as de Telefónica concentráronse diante da sede central de Movistar na rúa Colón de Vigo para reclamar a readmisión de dous compañeiros/as despedidos en Barcelona e Madrid e para denunciar o proceso de negoción do convenio colectivo. Dende a sección sindical da CIG da provincia de Pontevedra acusan á empresa de pretender rematar coas relacións laborais coa complicidade de CCOO e UGT.

Varios centos de traballadores e traballadoras de telefónica da provincia de Pontevedra percorreron hoxe en manifestación as rúas de Vigo para esixir a readmisión de dous compañeiros/as despedidos en Madrid e Barcelona. As protestas, convocadas a nivel estatal para denunciar a actitude represiva da empresa, incluíron un paro de media xornada e concentracións ás portas da compañía. As mobilizacións, que se repetirán o vindeiro 7 de abril, tamén tiveron eco en Lugo, Ourense e A Coruña.

Representantes da CIG en Telefónica compareceron en rolda de prensa para anunciar a convocatoria de mobilizacións nas catro provincias galegas contra a decisión da empresa de despedir a dous traballadores/as. As protestas .que a nivel estatal están secundadas polos sindicatos ELA, LAB, AST, Cobas, ESK, EC, CGT e UTS, ademais dos comités provinciais de Barcelona, Madrid e País Vasco- consisten nun paro de media xornada os vindeiros días 17 de marzo e 7 de abril e en distintas manifestacións. En Viga está prevista unha concentración fronte ao edificio da Central do Calvario (Urzáiz 131) ás 12.00 horas. A continuación celebrarase unha manifestación na mesma rúa.

Traballadores e traballadoras de Telefónica concentráronse novamente diante da Central do Castro, na Gran Vía de Vigo, sede da súa oficina de Recursos Humanos na provincia de Pontevedra. Ao remate fixeron entrega dun prego de sinaturas subscrito polos/as traballadores/as onde se lle reclama á empresa o peche da Mesa de Negociación Permanente , na que se negocia a prórroga do actual Convenio, ao tempo que reivindicaron a apertura da negociación dun novo convenio.

Os/as traballadores/as do centro Vigo-Calvario de Telefónica concentráronse hoxe ás 11:00 da mañá á porta do seu centro de traballo contra a deturpación do Convenio Colectivo nas mesas de negociación permanente, e reclamando a negociación dun novo Convenio a partir do remate do actual o vindeiro 31 de decembro.