protección de datos

CIG denuncia a Ambulancias Xuvias e ao CHUAC por neglixencia no tratamento dos datos dos/as usuarios/as do transporte sanitario

begonha.carballo — Fri, 11 May 2012 12:57:42 +0200

Segundo explica o responsábel de Seguridade e Saúde da FGAMT-CIG, Ernesto López Rei, logo de rexistrar a denuncia na Delegación do Goberno, os condutores das ambulancias están obrigados a levar os historiais clínicos dos/as doentes/as cando os/as trasladan, a pesar de non ter a formación axeitada nin a obriga legal de realizar esta tarefa. Neste senso, a FGAMT-CIG aclara que o persoal ten que asumir a custodia e protección dos historiais clínicos, tipificados pola Lei Orgánica de Protección de Datos como información de “nivel alto” e polo tanto que requiren dunha protección especial, dun xeito que non garante nin a confidencialidade nin a trazabilidade dos mesmos.

Así, puntualiza, o transporte dos historiais dun centro sanitario a outro realízase sen cumprir ningún dos preceptos legais estabelecidos: os documentos son entregados aos condutores nun sobre aberto e con todos os datos do/a doente; non é posíbel estabelecer unha por unha as persoas que formaron parte da custodia dos datos, nin existe un rexistro de entrada/saída da documentación; non hai ningún traballador da empresa autorizado no manexo de expedientes; non está estabelecido ningún “Documento de Seguridade” como esixe a lei; e tampouco se fai a auditoría bianual preceptiva.

Esta situación deixa nunha desprotección absoluta tanto ao/á usuario que utiliza o transporte sanitario (que non ten garantida a confidencialidade do seu expediente), como ao traballador/a (que asume unha responsabilidade para a que non foi preparado, pero que pode ter consecuencias legais).

Fronte a este cúmulo de irregularidades, os traballadores/as de Ambulancias Xuvias negáronse diante da empresa e o centro hospitalario a transportar os historiais dos usuarios/as se non se garantían unhas condicións adecuadas. A resposta da empresa e a xerencia, en lugar de corrixir estas graves deficiencias, consistiu en obrigar ao persoal, baixo ameaza de despedimento, a realizar o servizo, xa que entenden que os historiais forman parte dos medios técnicos e materiais que acompañan ao/á enfermo/a.

“É dicir, critica López Rei, para a empresa e o hospital uns datos de máxima protección, como o historial clínico, teñen un carácter semellante ao dunha sonda, un respirador ou unha agulla. Non lles merecen máis protección nin máis control que o resto do mobiliario dunha ambulancia”. O sindicalista instou á Axencia de Protección de Datos a investigar estas irregularidades, sancionar á empresa e ao centro hospitalario por vulneración da lexislación vixente e obrigar a corrixir todas estas deficiencias.

A Sección Sindical da CIG en Atento presenta denuncia na Axencia de Protección de Datos por posíbel cesión ilegal de información

begonha.carballo — Tue, 03 May 2011 17:50:20 +0200

Ademais, segundo a Lei de Protección de Datos vixente, a empresa do telemárketing terá que contar co consentimento expreso do persoal e dos/as usuarios/as para ceder ditos datos, consentimento que até o de agora non solicitou.

A principios do mes de abril, explican dende a Sección Sindical da CIG, Atento Servicios España (que na plataforma da Coruña só traballa para Telefónica-Movistar) comunicou aos/ás traballadores/as, mediante un escrito, que ía proceder a gravar as chamadas telefónicas que se produzan no eido dos servizos que esta empresa presta aos seus clientes. Gravacións nas que interveñen tanto os e as traballadoras de Atento como as persoas que chaman para seren atendidas.

Así mesmo, a empresa de telemárketing informou no escrito que cederá as devanditas gravacións a cada un dos clientes que o requiran coa única finalidade de que estes controlen a calidade e xestionen o servizo que lles presta Atento.

Para as delegadas e delegados da CIG, esta actuación constitúe un arma de dobre fío. Así, matizan, dende o comezo da actividade de Atento a calidade de cada servizo xa se controla a través de escoitas e monitorizacións a cada traballador/a. E, até o de agora, non foi necesaria a cesión dos datos persoais e de identificación do persoal ás empresas clientes para as que traballa Atento, coa finalidade de avaliar o servizo demandado por estas.

Máis grave se cadra, sinalan, resulta que Atento tamén inclúe nestas gravacións ás persoas que chaman sen informarlles de que as conversas privadas serán gravadas e que os seus datos poderán ser cedidos a segundas empresas como verificación de calidade e control do traballo dos teleoperadores/as. Así, denuncian, a decisión de Atento afecta non só aos traballadores/as senón tamén aos/ás milleiros de clientes atendidos/as a diario.

Dende a Sección Sindical da CIG na empresa remitiron denuncia á AEPD, ao entender que esta actuación non se adecúa á Lei de Protección de Datos. Na denuncia, os/as traballadores/as sinalan que Atento nin solicitou o consentimento (ou a oposición) dos usuarios/as para a gravación das conversas, nin tampouco solicitou expresamente o consentimento do persoal para incluír os seus datos persoais e identificativos nun ficheiro que cederá a todos os/as clientes que así o soliciten.

O escrito entregado por Atento, explícase na denuncia, resulta ambiguo, por canto non determina que tipo de datos identificativos se incluirán no ficheiro nin se aclara que entende a compañía polo termo “cliente”; xa que Atento A Coruña presta servizo para un único cliente, que é Telefónica, pero á súa vez atende aos clientes de Telefónica (que son os clientes do servizo prestado, mais non son clientes de Atento).

“Facemos público este abuso que Atento Teleservicios España comete de maneira unilateral, para que a opinión pública, os clientes de Telefónica e todo o persoal da empresa, estean informados/as das medidas da compañía e saiban que loitaremos até o final porque entendemos e consideramos esta decisión ilegal”, advertiron.

A Axencia de Protección de Datos sanciona a Correos cunha multa de 6.000 euros

begonha.carballo — Wed, 10 Nov 2010 16:59:14 +0100

A central sindical, explican dende CIG-Correos, viuse na obriga de presentar esta denuncia xa que a filtración contiña datos de carácter persoal dos traballadores e traballadoras, como o nome e apelidos, enderezo postal, documento de identidade, teléfono particular e incluso o número do móbil. “Todos estes datos nada tiñan que ver coa fin para o que esta empresa foi contratada”, aseveran. “Correos, unha vez máis, conculca o dereito dos/as traballadores/as facilitando datos que afectan a súa intimidade”.

Dende a CIG-Correos esíxese tamén ao Director de Zona que depure as responsabilidades a que deran lugar estes feitos “que este sindicato considera de extrema gravidade”, coa mesma celeridade que pon “á hora de sancionar ao persoal por feitos que nin deberían ser obxecto de expedientes e que teñen por fin amedrentar os traballadores e traballadoras”.

O Ministerio de Xustiza autoriza a deslocalización de Vodafone poñendo en perigo 700 postos de traballo en Vigo e A Coruña

paula.castro — Fri, 05 Feb 2010 14:08:08 +0100

Para que unha empresa dentro do estado transfira datos a outra requírese o consentemento previo dos clientes. Porén, o organismo dependente do Ministerio de Xustiza, estima que cando a cesión é internacional, concretamente a paises de América Latina non é preciso. Un absurdo que permite ás empresas de telecomunicacións deslocalizar todos os servizos de atención aos clientes fóra do Estado.

Este é o caso actual de Vodafone, que solicitou 6 autorizacións a AEPD para transferir todos os datos dos seus clientes a Colombia, Perú ou Chile, coa única garantía dun contrato privado entre empresas e con total descoñecemento da clientela. Os datos dos clientes de Vodafone (persoais, económicos, etc) estarán espallados por medio mundo e incluso en países considerados perigosos polo Ministerio de Exteriores.

A transferencias dos datos da clientela é o primeiro paso para que se deslocalicen todos os servizos de atención á clientela que actualmente se realiza entre outras empresas nas plataformas de telemárketing de Sykes na Coruña e en Vigo nas plataformas Unísono e Bosch. En toda mais de 700 postos de traballo en Galiza aos que hai que sumar os despedimentos do persoal de Sykes que traballan na campaña do “1004” de telefónica, tamén deslocalizada por telefónica con anterioridade.

Complicidade do goberno central

Neste senso os despedimentos e recortes na Coruña e Vigo son froito dunha decisión empresarial coa complicidade do goberno central. Dende a Confederación Intersindical Galega queremos denunciar que non estamos ante os efectos da crise, estamos ante unha deslocalización pura e dura por parte de Vodafone e Telefónica coa complicidade do goberno do PSOE.

Ante a visita do Ministro de Xustiza a Galiza este fin de semana, queremos solicitar unha rectificación da autorización concedida por un organismo do seu Ministerio, que beneficia claramente a unha multinacional “Vodafone”, poñendo en perigo os postos de traballo de 700 persoas na Galiza.

En todo caso, dende a CIG, xa temos convocado mobilizacións, paros e folgas nas distintas empresas afectadas, sen que descartemos medidas sectoriais fronte a un novo proceso de deslocalización no sector dos centros de chamadas. En Bosch, os traballadores e traballadoras irán á folga o vindeiro día 15 de febreiro e por esas datas tamén están previstas mobilizacións en Sykes.

O Regulamento que desenvolve a Lei Orgánica de Protección de Dados recolle achegas da CIG

sxxi — Wed, 09 Jan 2008 13:34:41 +0100

En primeiro lugar a CIG expuxo ante a AEPD a situación do sector de Telemárketing e o proceso de deslocalización facilitado polas autorizacións internacionais de dados a países considerados non seguros, nomeadamente a Marrocos e América Latina. Representantes da central nacionalista destacaron daquela a sensibilidade do director da Axencia ante a situación laboral provocada pola deslocalizacion no sector de Telemárketing.

No transcurso da reunión, a CIG expuxo a indefensión dos traballadores e traballadoras xa que nas autorizacións o anterior equipo directivo da AEPD non os consideraba como parte afectada, polo que non podían presentar alegacións.

Daquela a AEPD puxo en marcha un sistema provisional de comunicación aos sindicatos que permitiu á CIG presentar un contencioso administrativo contra a autorización de transferencia internacional de datos dos clientes de Telefónica Móviles a Perú, pois se dá a circunstancia de que Parte do servizo de atención aos clientes de Telefónica Móviles préstase na empresa Eurocen de A Coruña que emprega a 1.000 persoas.

A CIG expuxo tamén na xuntanza de abril que non había posibilidade de presentar alegacións contra as transferencias xa autorizadas que están a facilitar a deslocalizacion no caso de Atento-Telefónica. Neste senso, o novo Regulamento aprobado polo Goberno prevé a revogación ou suspensión das autorizacións xa concedidas.

Aínda que haberá que agardar á publicación no BOE deste Regulamento para coñecer o seu alcance real, a CIG considera que supón un paso adíante na loita contra a deslocalización no sector de Telemárketing e que recolle parte das achegas realizadas polo sindicato na reunión do 11 de abril de 2007, a primeira que mantivo un sindicato con este organismo ante a deslocalizacion do sector de Telemárketing.