Susana López Abella anunciou onte na Comisión de Sanidade do Parlamento, na que compareceu para respostar a unha pregunta do Grupo Parlamentario Popular, que “as crianzas non nacidas” contarán como membros da unidade familiar á hora de pedir axudas á Xunta, co fin de determinar o tipo e contido das prestacións públicas que lles corresponden. A medida está encadrada no Plan integral de apoio á muller embarazada 2012-2014, aprobado o pasado mes de xaneiro polo Consello da Xunta.

O sector de Correos da CIG-Administración vén de dar a coñecer unha sentenza pola que se condena á empresa postal estatal á repor a totalidade do salario a unha traballadora á que, como consecuencia dun aborto, se lle aplicaron descontos en determinados complementos retributivos. Correos, explican dende o sector da CIG, non vinculaba o aborto coa maternidade e dáballe unicamente un trato de enfermidade común.

Delegadas e delegados da CIG concentráronse este xoves, con motivo da conmemoración do 8 de Marzo, Día da Muller Traballadora, diante de edificios da administracións, centros de traballo e mutuas para denunciar os ataques e recortes dos dereitos da clase traballadora, que afectan de xeito especial ás mulleres. Estas mobilizacións enmárcanse no calendario de actos programados pola CIG como preparatoria da Folga Xeral do 29 de Marzo, e por iso, a campaña deste ano estase a desenvolver baixo o lema “As mulleres coa Folga Xeral. Xuntas podemos!”

A CIG reitera o seu absoluto rexeitamento ao proxecto de Lei de Apoio á Familia e á Convivencia de Galiza da Xunta do PP, que este martes, 24 de maio, a partir das 10:00 horas se debate no Parlamento Galego. A central nacionalista subliña o carácter retrógrado e a profunda carga ideolóxica que soporta o proxecto e entende que con esta normativa afóndase no grave recorte de dereitos que están sufrindo as mulleres, asúmese que son un colectivo que se debe protexer e dirixir, recupérase a retórica da familia heterosexual e a da maternidade como papel e función vital das mulleres. Cuestións que, en definitiva, supoñen asumir o control da vida sexual das mulleres.

A Secretaría de Muller da CIG vén de informar que acaban de saír publicadas no DOG as axudas aos traballadores homes e familias monoparentais que, entre o 1 de setembro de 2010 e o 30 de abril de 2011, se acolleran a unha redución da súa xornada laboral para dedicarse ao coidado dos seus fillos ou fillas menores de 3 anos.

A CIG rexeita o proxecto de Lei de Apoio á Familia e á Convivencia de Galiza que vén de aprobar o goberno da Xunta do PP polo seu carácter retrógrado e a profunda carga ideolóxica que soporta. A central nacionalista entende que con esta normativa afóndase no grave recorte de dereitos que están sufrindo as mulleres, asúmese que son un colectivo que se debe protexer e dirixir, recupérase a retórica da familia heterosexual e a da maternidade como papel e función vital das mulleres, o que, en definitiva, supón asumir o control da vida sexual das mulleres.

Se nestes momentos se aplicara a totalidade da reforma das pensións recollida no pacto social, só o 23% das mulleres traballadoras que se xubilan en Galiza aos 65 anos terían dereito a percibir o 100% da prestación, fronte ao 71% dos homes que a esa idade conseguiron cotizar 38.5 anos. Así o revela o informe sobre a situación sociolaboral da muller na Galiza que a CIG vén de presentar con motivo da celebración do 8 de Marzo, Día da Muller Traballadora. Ademais, as Unións Comarcais de Pontevedra, Lugo, Compostela, A Coruña e Ferrol realizaron concentracións para denunciar os recortes aplicados polos gobernos, que prexudican de xeito especial ás mulleres traballadoras.