A Secretaría da Muller da CIG informa da apertura do prazo para apuntarse ás estadías de tempo libre para as mulleres soas con responsabilidades familiares non compartidas. O prazo para presentar as solicitudes remata o vindeiro 30 de maio.

Baixo o acaído lema “FARTAS!”, a CIG realizou este venres xornada de loita nacional -con concentracións en todo o País- con motivo do 8 de Marzo; unha data na que a Secretaría da Muller da CIG denuncia que "non hai nada que celebrar" e a través da quere resaltar a loita diaria que todas as mulleres levan a cabo na defensa dos seus dereitos, fronte ás “celebracións e conmemoracións hipócritas por parte das mesmas administracións e poderes que recortan os nosos dereitos”.

Miles de persoas percorreron este domingo Compostela para denunciar a corrupción e a destrución social e cultural que sofre Galiza e baixo o lema “Polo dereito ao traballo, á igualdade, aos servizos públicos e á plena soberanía nacional galega. Por un proceso constituínte e de ruptura democrática”. A manifestación, que rematou nunha ateigada Praza de Praterías, foi convocada por organizacións políticas, sindicais e estudiantís, nomeadamente polo BNG, o CCPI, a CIG, COG, FRUGA, MPB, Nós-UP, AGIR, AMI, BRIGA, os Comités, Galiza Nova, ISCA! e a Liga Estudantil Galega.

O vindeiro domingo día 3 de marzo, ás 12:00 horas, sairá da Alameda compostelá unha manifestación convocada polo BNG, o CCPI, a CIG, COG, FRUGA, MPB, Nós-UP, AGIR, AMI, BRIGA, os Comités, Galiza Nova, ISCA! e a Liga Estudantil Galega para denunciar a corrupción e a destrución social e cultural que padece Galiza, baixo o lema “Polo dereito ao traballo, á igualdade, aos servizos públicos e á plena soberanía nacionalgalega. Por un proceso constituínte e de ruptura democrática”.

A Secretaría da Muller da CIG denuncia ante a conmemoración do Día Internacional da Igualdade Salarial entre homes e mulleres, que se celebra o día 22 de febreiro, que seguen a ser moitos os días e as horas que as mulleres galegas traballan de balde, a pesares do imperativo legal de “a igual traballo, igual salario”. Porque non debemos esquecer que as mulleres teñen unha dobre brecha: teñen un salario medio por hora inferior ao dos homes e son máis traballando a tempo parcial, factores que sumados dá un salario medio anual inferior ao dos homes.

O Tribunal Superior de Xustiza da Unión Europea ven de recoñecer que a lexislación española en materia de pensións de xubilación contributivas das traballadoras e traballadores a tempo parcial é discriminatoria, ao exixir un período de cotización proporcionalmente máis elevado para este persoal, que na súa meirande parte son mulleres, o cal supón unha diferenza de trato.

A Secretaría de Muller da CIG vén de publicar unha Guía sobre Conciliación, que pretende servir de ferramenta para dar unha resposta rápida e eficaz as dúbidas das traballadoras e traballadores en materia de prestacións e dereitos relacionados coa conciliación da vida familiar e laboral, e outras medidas de igualdade de oportunidades no traballo. A Guía inclúe tamén modelos de solicitudes para entregar nas empresas.