A CIG vén de editar un novo boletín, dirixido a delegados e delegadas da CIG, para explicar a posición da central sindical respecto das medidas que se están a barallar polo goberno para afrontar a crise económica e para presentar as súas alternativas. Infórmase tamén das convocatorias da mobilizacións do 10 de marzo en cada comarca, que desta volta celébranse baixo o lema: O emprego, os salarios e as pensións deféndense loitando!

No decurso de 2009 rexistráronse 638.131 contratos nas Oficinas do Servizo Público de Emprego Estatal, un 14% menos que durante 2008; en termos relativos descenderon máis os inscritos baixo algunha modalidade de duración indefinida, concretamente un 19,3%. Este descenso foi maior no caso das conversións a indefinidos, un  29% menos que en 2008. Estes son algúns dos datos máis salientábeis do estudo sobre “Contratos de Traballo 2009”, realizado polo Gabinete de Economía da CIG.

Delegados e delegadas da CIG de Compostela, reuníanse en asemblea na mañá deste venres día 12 de febreiro, para analizar as consecuencias que a crise está a ter para a clase traballadora, tanto pola situación económica na que se atopan as familias, como polas medidas que se están a adoptar –reforma do sistema de pensións, conxelación salarial e proposta de reforma laboral- desde o goberno central. Ao remate da xuntanza celebrouse unha concentración na Praza de Galiza baixo o lema “Ningún recorte aos nosos dereitos. Traballo e pensións dignas. A crise que a pague o capital”

Analizar a actual situación de crise económica e as causas que nos levaron a ela, as repercusións que está a ter na economía galega e na súa clase traballadora e pór en común as medidas políticas e sindicais que cada organización entende que se deberían aplicar, fronte ás que está a adoptar o goberno central e a inacción do goberno galego, foron os temas abordados na xuntanza que mantiveron na mañá de onte as executivas da CIG e do BNG.

Na súa xuntanza de 9 de febreiro de 2010, o Secretariado Confederal da CIG acordou pór en marcha unha campaña de mobilizacións que ten como obxectivo amosar a oposición da central sindical á reforma da Seguridade Social, á anunciada reforma laboral e o acordo estatal de negociación colectiva asinado entre CCOO, UGT e a patronal. Ás asembleas celebradas en Vigo e Pontevedra o pasado día 4 de febreiro seguirán, mañá día 10 de febreiro, asembleas e concentracións na Coruña e Ourense; o venres día 12 en Ferrol e Santiago e o próximo xoves 18 de febreiro en Lugo. Estas mobilizacións culminarán con manifestacións en todas as comarcas o próximo día 10 de marzo.

Desde as dez da mañá no Salón de Actos dos Capuchinos na cidade de Vigo tiña lugar a primeira asemblea de delegados e delegadas da Unión Comarcal da CIG de Vigo do ano 2010. Neste encontro analizouse a situación da comarca no actual contexto da crise, asi como se tratou a problemática da fusión das caixas, a tentativa de privatización do novo hospital de Vigo, as accións da asemblea de parados do naval, o conflito do Alcampo polos despedimentos de todos o persoal da limpeza, e a loita de Alfageme polo mantemento dos seus postos de traballo. Ademais Suso Seixo, secretario xeral da CIG, presentou o Documento Confederal de Alternativas para facer fronte á crise.