Traballadores e traballadoras de SEAGA participaron esta mañá nunha asamblea aberta, na praza da Quintana, para avaliar o resultado das demandas presentadas, valorar a situación derivada das sentenzas xa ditadas e debater sobre as medidas de presión a adoptar para regularizar a súa situación. O persoal de Seaga no seu conxunto, acordou exixir o inicio da precampaña a través desta empresa pública no mes de marzo, tendo en conta as especialmente adversas condicións climatolóxicas que se veñen dando este ano. Ao remate da asemblea, saíron en manifestación e remataron en San Caetano, ante a consellaría de Mar e Medio Rural.

O Tribunal Supremo ditaminou, en dúas sentenzas, que toda a contratación que realice SEAGA ten que se facer a través da modalidade de fixos descontinuos e que a actual forma de contratación baixo a modalidade “por obra” é ilegal. Xunto a estas, outra sentenza tamén do Supremo, determina que o traballo que se realiza en Seaga é cesión ilegal e que, polo tanto, o traballador demandante ten que ser readmitido no Pladiga, é dicir, nos medios propios da Xunta de Galiza. Esta sentenza abre a porta a que os 2.000 traballadores de SEAGA reclamen por cesión ilegal e pasen a formar parte do Pladiga.

A sala do social do Tribunal Supremo vén de publicar a súa Sentenza de 22 de Setembro de 2011, pola que se estima o Recurso de Casación interposto polos servizos xurídicos da CIG de Verín. O Supremo anula unha sentenza previa do Tribunal Superior de Xustiza de Galiza e recoñece a improcedencia do despedimento dun traballador temporal da empresa pública Servizos Agrarios Galegos, S.A. (SEAGA). Declara que existe fraude de lei, dada a condición de indefinido-descontinuo do citado traballador, por ter sufrido un encadeamento irregular de contratos, subscritos, en determinados ciclos temporais, para a actividade normal e permanente da citada patronal pública.

O 12 de agosto cúmprese un ano da morte de Xulio e de Rodrigo, os dous brigadistas de Seaga falecidos no incendio de Fornelos. Os traballadores de Seaga non o esquecen e por este motivo, mañá venres día 12 todas as brigadas de Seaga procederán a colocar un cartaz recordatorio en todos os vehículos así como crespóns negros tanto nos vehículos e nas fundas de traballo.

Representantes de comités de empresa de Seaga, acompañados polo secretario nacional de CIG-Servizos, comparecían esta mañá en rolda de prensa para reclamar que todos os servizos de prevención e extinción de incendios sexan públicos e estean unificados no Pladiga, rematando así coa “economía do lume” fomentada desde a consellaría de Medio Rural. Denunciaron que o operativo de extinción non estará funcionando ao completo cando menos até o 25 de xullo, malia a situación de risco extremo na que se atopa Galiza, e anunciaron mobilizacións e mesmo a convocatoria de folga, durante este verán.

Traballadores de SEAGA e representantes da CIG compareceron esta mañá en rolda de prensa, diante da porta de entrada da Dirección xeral de Montes, para denunciar a falta de persoal e de medios cos que a Xunta de Galiza está a afrontar a precampaña de incendios. Como exemplo puxeron a queima controlada que acabou provocando esta fin de semana un incendio dunhas 500 ha en Bande (Ourense) e que obrigou a recorrer a medios estatais para sofocalo. Un incendio do que Paulo Rubido, secretario nacional de CIG-Servizos responsabiliza directamente ao conselleiro de Medio Rural, por non ter montado aínda o operativo para a precampaña de extinción de incendios.

Axentes antidisturbios da Policía Autonómica desaloxaron os traballadores/as das brigadas helitransportadas de Seaga que ocuparan a base de Toén, en Ourense, para denunciar que a empresa aínda non os chamou para iniciar a campaña de prevención de incendios. Dende a CIG-Servizos denuncian que a Xunta pretende desmantelar un operativo que debera estar en funcionamento dende o mes de marzo e anunciaron que as mobilizacións continuarán até lograr que os empregados da empresa pública acaden unha mínima estabilidade laboral e unhas condicións de traballo dignas.