Moaña

Máis de medio milleiro de persoas marchan entre Moaña e Cangas en defensa dos postos de traballo no sector naval

ivan — Thu, 19 Jan 2012 18:28:24 +0100

Máis dun cento de traballadores/as e membros de comités de empresas afectadas chegaron a Moaña no barco de Vigo pouco antes das 11.00 horas. Aproveitaron o traxecto para despregar unha faixa na parte dianteira do catamarán na que se podía ler “Salvemos o sector naval”. En terra agardábaos outro importante grupo de compañeiros/as, ás que posteriormente se lles foron sumando veciños e veciñas da vila, até superar as 500 persoas.

Dende a estación marítima partiron cara ao veciño concello de Cangas ocupando un dos carrís da estrada. O traxecto estivo rodeado dun ambiente reivindicativo e festivo. Berráronse consignas reclamando unha solución para a grave crise que padece o sector e tamén se escoitou música tradicional galega.

A mobilización rematou dúas horas despois na Alameda Vella de Cangas coa intervención do responsábel do Naval da CIG e a interpretación do Himno Galego. César Rodríguez insistiu na necesidade de seguir coas mobilizacións como único xeito de salvar unha industria fundamental para a economía de Vigo e das comarcas próximas. “No Morrazo hai máis dun milleiro de traballadores/as do naval que están no paro e botamos de menos a implicación dos alcaldes, que non están a facer nada para buscar solucións”, censurou.

Tamén lles volveu reclamar ao Goberno español e á Xunta de Galiza a aprobación dunha lei que modifique o imposto de sociedades, o que permitiría establecer un novo sistema para incentivos na construción de barcos. Lembrou que isto foi precisamente o que fixo o Estado francés cando a Unión Europea suspendeu o seu sistema de contratación. “Por que o noso sector se atopa así e máis de 10.000 traballadores/as non teñen emprego?”. A resposta a esta pregunta, na súa opinión, é moi sinxela: “por falta de vontade política”.

Manifestación en Vigo

Diante disto, reiteran as nefastas consecuencias que tería para a economía de Vigo e das comarcas próximas a desaparición do sector. “A perda de 10.000 empregos directos afectará tamén ao comercio, á hostalaría, ao transporte, a todos e todas nós”. Finalmente, lanzan outra pregunta a modo de advertencia: “Que futuro de emprego terán as vindeiras xeracións?”.

Finalmente, animou a todos/as os presentes a participar na manifestación convocada pola CIG en defensa do sector o vindeiro xoves 26 de xaneiro en Vigo. A marcha partirá de Vía Norte a partir das 20.00 horas.

Preme para visualizar a galería de imaxes da mobilización.

Rodman Polyships creará unha bolsa de emprego para recuperar no futuro o persoal afectado polo ERE extintivo

ivan — Tue, 10 May 2011 20:00:43 +0200

Dende o comité de empresa sinalan que o acordo con Rodman establece tamén unha serie de cláusulas de exclusión mediante as que se favorece aos colectivos con máis dificultade para incorporarse ao mercado laboral. Deste xeito, quedan fóra do Expediente de Regulación de Emprego as persoas maiores de 55 anos e as mulleres. “O caso das mulleres é moi importante para nós porque se trata dun sector moi masculinizado é non podiamos permitir que se reducise aínda máis a súa presenza, que é só dun 7% na empresa”, sinala o presidente do comité, Moisés Currás, da CIG.

O representante sindical tamén explica que se conseguiu reducir nun 40% o impacto da proposta inicial da empresa grazas a unha serie de medidas como as prexubilacións e os traspasos e cesións a outras empresas do grupo. “O 60% restante incorpórase a unha bolsa de emprego que contén cláusulas garantistas de regreso unha vez se recupere a compañía”, indica. En canto ás indemnizacións, explicou que se logrou que recompensasen os esforzos realizados polos traballadores/as máis castigados durante os dous EREs rotativos presentados pola empresa con anterioridade.

Currás sostén que o acordo foi posíbel pola unidade que demostrou o cadro de persoal e que quedou patente na asemblea na que se ratificou por unanimidade. “Somos conscientes de que non se trata dunha boa saída, pero é a mellor posíbel nestes momentos porque se vincula ao futuro da empresa, no que todos/as temos confianza”, recoñeceu. Neste senso, lembrou que dos milleiros de EREs presentados en Galiza e no Estado español nos últimos anos “hai moi poucos que establezan unhas garantías coma estas”.

Crise económica e do sector

O presidente do comité detallou que os problemas na compañía comezaron no ano 2008 de xeito paralelo á crise económica que afectou ao sector, o que motivou a presentación dun ERE rotativo ao ano seguinte. “Ao mesmo tempo adoptáronse unha serie de medidas para salvar o emprego en Meira como a eliminación das horas extras, a absorción dos labores subcontratados e o peche das factorías que o grupo tiña noutras zonas”, enumera. Lembra tamén que foi precisamente a política de persoal negociada polo comité de empresa a que permitiu que o emprego medrase dende o 2000, pasando de 110 traballadores/as aos 367 do ano 2010.

Finalmente, amósase convencido de que o acordo supón un “sacrificio temporal” para o conxunto dos empregados da empresa e confía en recuperar canto antes “o que agora se perde”.

A CIG proporá unha serie de medidas alternativas ao ERE extintivo presentado pola empresa Rodman Polyships

ivan — Thu, 31 Mar 2011 17:42:41 +0200

Entre as medidas que se barallan para paliar os efectos do ERE extintivo atópase a creación dunha bolsa de emprego voluntaria da que se botaría man unha vez o sector dos barcos de recreo recupere a dinámica negativa na que entrou a consecuencia da crise económica mundial. Neste senso, o presidente do comité de empresa explica que os problemas na compañía comezaron xa no ano 2008 e motivou a presentación dun ERE rotativo ao ano seguinte. “Ao mesmo tempo adoptáronse unha serie de medidas como a eliminación das horas extras, a desaparición dos subcontratas e o peche das factorías que o grupo tiña noutras zonas”, enumera Moisés Currás.

Neste senso, lembra que a situación empeorou aínda máis coa crecente inestabilidade no chamado “mundo árabe”, unha vez que o plan de viabilidade de 2010 estaba vinculado a unha serie de contratos nalgúns dos países que o integran. “A partir de agora vai ser clave a actitude da empresa tendo en conta a magnífica resposta dos traballadores/as, que acudiron en masa á asemblea na que se presentou a proposta da dirección”, indica Currás.

Na xuntanza apostouse por crear unha plataforma conxunta que integre aos catro sindicatos con representación en Rodman (CIG, seis delegados/as; UGT, con tres; CGT, con dous; e CCOO, con outros dous) co fin de poder dar unha resposta común á problemática derivada da presentación do ERE.

A CIG apoia a concentración pola defensa do Transporte de Ría e contra o desmantelamento da liña Moaña-Vigo

paula.castro — Fri, 27 Mar 2009 15:10:48 +0100

A CIG de Vigo fixo un chamamento a toda a cidadanía para que participe na concentración deste sábado na estación marítima de Moaña, así como en todas as mobilizacións que a Plataforma en defensa do transporte público e da ría de Vigo convoque no futuro.

“Dende a CIG entendemos que o transporte de ría cumpre unha función social importantísima na unión das dúas mares da nosa ría, e serve a milleiros de cidadáns e cidadás para acudiren diariamente aos seus postos de traballo, centros de estudo, hospitais, etc.”, afirmou o secretario comarcal da CIG de Vigo, Xerardo Abraldes.

Así mesmo, dende a central quíxose denunciar, en cualidade de sindicato con presenza no comité de empresa que xestiona este servizo, a destrución de postos de traballo que pode xerar a supresión de liñas, no caso de levarse adiante.

A CIG de Vigo tamén exixiu ás administracións implicadas, principalmente a Consellaría de Transporte, o cumprimento íntegro dos compromisos adquiridos, “e instámolas a que fagan realidade o convenio para regular o transporte de ría”.

Os 49 despedidos da empresa do naval Celso Román concéntranse á porta do estaleiro pola recolocación e o pago dos salarios

zelia.garcia — Wed, 15 Oct 2008 19:17:55 +0200

Celso Román Electricidad, adicada á montaxe de instalacións eléctricas nos barcos, débelle aos seus ex-empregados a nómina do mes de setembro e os primeiros trece días de outubro. Esta firma, que tiña como único cliente a Polyships, chegou a contar con 65 traballadores, pero a malísima xestión do empresario Celso Román levou a esta situación de "creba técnica" na que se encontra a compañía.

O estaleiro de Rodman rescindiu o contrato que tiña con esta auxiliar o mércores 8 de outubro, despois de que os traballadores realizaran unha serie de paros para reclamar o pagamento dos seus salarios.

Pola recolocación de todo o persoal

As centrais sindicais con representación neste conflito, CIG e UGT, demandan que Rodman se faga cargo dos salarios que se lles deben a estes traballadores, asi como asuma a recolocación destes traballadores. Polo de agora, Rodman recolocaría só a 24 destes traballadores, e só lles pagaría o salario de setembro a estes 24.

Tamén se están a realizar contactos con Instalectra, a asociación de empresas de electricidade, para a recolocación destes traballadores.

Presentadas demandas

Polo de agora, estes 49 despedidos presentaron dúas demandas, unha na que reclaman o pago dos salarios e outra polo despedimento, na que demandan como responsábel a Celso Román, as empresas piratas coas que conta este empresario, así como a Rodman, por responsabilidade subsidiaria.

Mobilizacións ás portas do estaleiro

Diante desta situación, os traballadores despedidos decidiron concentrarse de sete a tres da mañá todos os días até que consigan a recolocación das cuarenta e nove persoas despedidas, asi como o pago dos salarios que se lles deben.