A Secretaría da Muller da CIG vén de conceder o premio do Día da Muller Traballadora, na súa III Edición, á presidenta do Comité de Empresa de Lorenzo Froiz, Lucía Freire, vítima de represión sindical e quen se tivo que enfrontar a unha querela criminal presentada pola empresa, acusándoa de falsa testemuña ao declarar a favor dunha compañeira que fora sancionada. O premio foi entregado pola secretaria de Muller, María do Carme López Santamariña, nun acto no que tamén recibiron unha especial mención pola súa loita e valentía o conxunto das traballadoras da antiga Valeo e da Conserveira Pérez Lafuente. Vídeo no interior da nova. 

A presión dos traballadores e traballadoras e a negociación posterior volveron dar os seus froitos ao conseguirse a retirada da querela interposta por un dos socios de Lorenzo Froiz, do Grupo Froiz, contra a presidenta do Comité. Esta querela foi entendida polo cadro de persoal como unha sanción encuberta e un aviso para que ninguén fora declarar a favor de compañeiros en casos similares.

A CIG valora moi positivamente o seguimento da folga convocada para este luns día 3 de novembro en Lorenzo Froiz, do Grupo Froiz. Con esta mobilización as traballadoras manifestaron a súa intención de responder con contundencia a todas as agresións e abusos que se produzan por parte da empresa. Nesta ocasión a sanción encuberta á presidenta do Comité Lucía Freire foi interpretada como unha agresión a todas as traballadoras e traballadores o que posibilitou unha participación tan masiva na xornada de folga.

O venres 24 de outubro celebrouse unha concentración na que participaron máis de 70 delegados e delegadas para denunciar a sanción encuberta á nosa compañeira Lucía Freire, presidenta do Comité de Empresa de Lorenzo Froiz, pertencente ao Grupo Froiz. A empresa ven de presentar querela criminal contra a presidenta do Comité acusándoa de falsa testemuña ao declarar a favor dunha compañeira que fora sancionada.