A consellaría de Educación anunciaba, na mesa sectorial celebrada onte, que non vai a haber oferta de emprego público para o ensino, no ano 2012. Ante esta decisión, a CIG-Ensino convocaba, esta mañá, unha concentración en San Caetano. Segundo o seu secretario nacional, Anxo Louzao, esta medida responde á decisión do PP, a nivel de estado, de recortar o ensino público e, en consecuencia, diminuír o profesorado. Louzao denunciou ademais a “desleixo absoluto da consellaría, das súas competencias plenas nesta materia” e alertou do que suporá canto á perda de calidade do ensino público.

A CIG-Ensino esixirá, na Mesa Sectorial do vindeiro 31 de xaneiro, a convocatoria da oferta de emprego público, unha convocatoria absolutamente necesaria para manter a atención educativa nos centros e para crear emprego. A conxelación da oferta significaría que non se cubrirían as xubilacións que se están a producir neste curso, sumadas ás que xa se produciron o ano pasado e que non foron cubertas, o que se traduciu nun déficit de máis de mil docentes no mesmo inicio do curso.

A CIG Ensino denuncia que continúa o ciclón privatizador. Despois de denunciar o inicio da privatización das escolas infantís, a primeira vez que se pon en mans privadas a xestión dun servizo educativo público o que supón un feito dunha enorme gravidade, hoxe, 19 de febreiro temos que denunciar que se pon en mans privadas, nada menos que a atención ao profesorado que lle corresponde á Consellaría.

Mentres as políticas de recortes en persoal e recursos, impostas pola Consellaría de Educación, son o día a día do Ensino público, a privada concertada ve incrementados os seus recursos cunha asignación extraordinaria que este ano se incrementa en máis dun 37% respecto da do ano pasado. Para a CIG-Ensino,  o feito de que a Consellaría de Educación convoque este tipo de subvencións, que veñen incrementar os fondos destinados ao ensino privado, é unha provocación e un escándalo ante os continuos recortes que está a sufrir o ensino público.

A CIG-Ensino denuncia os recortes reiterados que a Consellaría de Educación practica no Ensino público, desta volta atrasando intencionadamente a cobertura das baixas do profesorado. Este luns, chegaron a ser 287 as baixas sen cubrir. Un número que continuou en aumento con novas peticións de centros. 107 desas 287 baixas estaban comunicadas antes de finalizar o ano 2011 (20 delas xa estaban comunicadas no momento de iniciarse o período non lectivo de Nadal). Outras 31 foron comunicadas entre os días 2 e 4 de xaneiro. Porén a Consellaría, no afán de recortar recursos ao ensino público, non tiña cubertas ningunha desas 138 prazas, malia coñecer a súa existencia, que foi comunicada polos centros con antelación suficiente para que estivesen cubertas no momento de se reiniciar as aulas.

Tras acordar, o pasado 30 de novembro, continuar coas mobilizacións en defensa do ensino público, as organizacións sindicais, entre elas a CIG-Ensino, veñen de presentar as súas novas propostas, entre as que se inclúe a convocatoria de concentracións en todos os centros o vindeiro día 15 de decembro e aprobar nas Xuntas de Persoal unha proposta de resolución esixindo a retirada da orde.

Os datos manexados a primeira hora desta tarde pola CIG-Ensino indicaban que a participación do profesorado no referendo vai ser maioritaria e que se pode aproximar ao 80%. A falta do resultado do escrutinio, que comezará a partir das 20:00 horas, a Federación do Ensino da CIG valoraba positivamente a receptividade que tivo a iniciativa entre o profesorado que expresa deste xeito o seu rexeitamento ás políticas da Consellaría de Educación.