O Comité de Empresa do Grupo Antolín-PGA do Porriño denuncian que despois dun ERE do 20 de febreiro ao 5 de marzo que afectou ao 90% do persoal, a empresa contratou a 25 persoas por ETT, realizáronse horas extras na fin de semana e contratáronse transportes especiais porque non había stock para servir ao cliente. Mentres, os traballadores tiveron problemas co cobro da prima de produción e calidade. Se a empresa non resolve esta situación, desde o Comité de Empresa convocarán folgas parciais a partir do 20 de abril e irán intensificando as medidas de presión até convocar folga indefinida.

O venres 13 de febreiro tivo lugar unha rolda de prensa no local sindical da CIG, convocada polo Comité de Empresa de Viza, do que forman parte CIG, CCOO e UGT, para anunciar a convocatoria de tres xornadas de paro para a próxima semana, para demandar que remate a cesión ilegal de carretilleros de Alymosa, que substituiron aos carretilleros de Viza, e que están a realizar o que era até o de agora o seu traballo por 400 euros menos. A convocatoria deste primeiro paro parcial lévarase adiante os próximos 17, 18 e 20 de marzo, parando dúas horas en media nas quendas de mañá, tarde e noite. Esta protesta ampliarase a indefinida a partir do 23 de marzo, se non hai un cambio na situación actual.

Ás once da mañá máis de 300 delegados e delegadas do sector da automoción das Federacións do Metal, Químicas e Téxtil saian en manifestación polas rúas de Vigo, para mobilizarse na defensa do emprego no sector. Asi, encamiñaban a súa marcha até o cruce de Colón, onde se encontran catro das principais sedes bancarias da cidade, fronte ás que se concentraron durante case unha hora, para denunciar "a responsabilidade que ten a banca nesta crise, que ademais foi das primeiras beneficiadas das axudas da Administración, con 30.000 millóns de euros, que agora non quere utilizar para revitalizar a economia do país". Neste cruce soltaron 450 globos, que simbolizan os máis de 4.500 empregos eventuais que se perderon no sector do automóbil desde o mes de setembro do pasado ano.

O segundo exemplar do Boletín Informativo da CIG Metal de Vigo, o Novas do Metal vén de sair e está a ser difundido nos centros de traballo do sector da comarca. Neste número os temas principais son o chamamento á convocatoria de manifestación do 10 de marzo na cidade de Vigo, a situación do automóbil e outras novas de interese. A boa acollida do primeiro número, asi como a vontade de mellorar a comunicación entre os traballadores, para que se coñeza o que está a pasar no sector, foron algunhas das consecuencias positivas que trouxo este voceiro.

Pasadas as oito e media da tarde comezaba a marcha en defensa do emprego na automoción, convocada pola CIG. Traballadores e traballadoras de empresas do téxtil, do transporte, do metal e de químicas afectados pola crise no sector da automoción estiveron presentes nesta mobilización, para demandar medidas globais para facer fronte ao actual contexto de crise no automóbil, e non actuacións individuais e negativas para a clase traballadora como os expedientes de regulación de emprego.

Acompañados de perto de cincuenta delegados, delegadas, presidentes e secretarios dos Comités de Empresa das Federacións do Metal, Químicas e do Téxtil e Transporte, tivo lugar o mércores 29 de outubro a rolda de prensa de presentación da manifestación que a CIG convocou para o próximo 3 de novembro na cidade de Vigo, e que sairá ás oito da tarde de Vía Norte. Baixo o lema “En defensa do emprego na automoción”, a CIG pretende denunciar a situación que está a vivir o sector, así como chamar á atención das Administracións neste contexto, porque “non poden pagar de novo os traballadores e traballadoras esta crise”.