O persoal da concesionaria de limpeza da USC ocupaba, na mañá deste venres, a Casa da Balconada, para denunciar o recorte, en 1 millón de euros, do orzamento da contrata, as repercusións que isto terá nas condicións laborais e salariais –Clece ten a intención de aplicar un ERE de redución de xornada e soldo- e as consecuencias no propio servizo de limpeza da Universidade.

Un cento de delegados/as da limpeza da CIG-Servizos e do sindicato vasco ELA realizaron onte unha concentración de protesta en Madrid coincidindo coa reunión da comisión negociadora do convenio estatal. Dende a central nacionalista denuncian que a patronal pretende limitar as negociacións de ámbito inferior, como os convenios de empresa e os acordos de equiparación.

Unha representación dos traballadores e traballadoras da Torre de Hércules trasladouse esta mañá a Compostela para levar ás súas reivindicacións ante os grupos parlamentares. O persoal pediu dos/as responsábeis políticos que entremedien neste conflito de cara a conseguir unha xuntanza co Concello da Coruña, xa que até o momento o Goberno municipal continúa sen atender as súas peticións.

A Federación de Servizos da CIG de Ferrol ten convocada unha concentración o vindeiro martes, día 7 de febreiro, ás 12:15 horas, coincidindo coa celebración do xuízo, adiado dende o pasado mes de novembro, contra Prosegur Seguridad por acoso a un traballador que se presento una candidatura da CIG ás eleccións sindicais. Coa protesta, a central quere trasladar o seu apoio ao compañeiro e rexeitar o comportamento da empresa.

O xulgado do contencioso-administrativo 1 da Coruña vén de dar á razón ás traballadoras/es do servizo de limpeza do Hospital Virxe da Xunqueira de Cee ao anular o decreto de servizos mínimos impostos pola Consellaría de Sanidade para os paros parciais convocados o pasado mes de novembro, por consideralo contrario ao exercicio do dereito á folga. Pola súa banda, o persoal continúa adiante co calendario de mobilizacións semanais con concentracións diante das portas do hospital cada mércores.

Os traballadores e traballadoras da Torre iniciaron un peche no mediodía deste mércores nas oficinas do Consorcio de Turismo como medida para forzar unha reunión co Concello, logo de que nin a concelleira nin o alcalde atendesen a petición de xuntanza cursada polo persoal hai máis de un mes. O persoal tiña intención de permanecer nas oficinas até seren recibidos polo goberno local, mais pasada a media tarde acordaron levantar a medida de presión tras sufrir unha indisposición un dos compañeiros, que tivo que ser trasladado en ambulancia ao CHUAC, e así poder acompañalo até o hospital.

Os traballadores e traballadoras da Torre de Hércules continúan adiante coas mobilizacións en defensa dos seus empregos. Nesta ocasión, o persoal realizou un acto simbólico que consistiu en perfilar con candeas a silueta do faro romano en plena Praza de María Pita e acender un refacho de luz para ensinar ao goberno local o camiño que leva á solución do conflito.