Os datos da EPA revelan o grave deterioro do mercado laboral. Por vez primeira descende no III Trimestre a ocupación, cando se trata dun período que colle os meses de verán, onde sempre se constatou un aumento do número de ocupados/as. Tal é así, que con respecto ao mesmo trimestre do ano 2008, que foi cando comezou a sentirse a crise en Galiza, o número de ocupados descendeu en 127.000 persoas, pasando de 1.214.500 a 1.087.000. O número de ocupados diminuíu tamén respecto do II Trimestre deste ano, en 4.400 persoas.

Na tarde de onte produciuse a primeira xuntanza preparatoria da manifestación conxunta convocada en Vigo para o domingo 6 de novembro polos sindicatos CIG, CCOO e UGT en defensa do emprego na comarca. Os tres secretarios comarcais participaron na reunión na que se trazaron as primeiras liñas da campaña.

A Fundación para a Orientación Profesional, a Investigación e o Desenvolvemento Tecnolóxico, o Emprego e a Formación en Galiza (forGA) e a Secretaría Confederal de Formación da CIG organizan este venres 21 de outubro en Vigo a I Xornada “A formación para o emprego” na que hai inscritas 230 persoas de toda Galiza.

Os secretarios comarcais da CIG, CCOO e UGT de Vigo compareceron hoxe en rolda de pensa para anunciar a convocatoria conxunta dunha gran manifestación en defensa do emprego que terá lugar o vindeiro domingo 6 de novembro a partir das 12.00 horas. Os representantes sindicais consideran que a perda de postos de traballo na comarca chegou a unha situación insostíbel e reclaman das administracións central e autonómica a posta en marcha de medidas que estimulen a creación de emprego.

Máis de 30 delegados/as da CIG en Novacaixagalicia realizaron hoxe unha concentración de protesta diante da sede central de Vigo para reclamar o mantemento de todos os postos de traballo e das condicións laborais na entidade crediticia. Os representantes sindicais rexeitan os plans privatizadores do Goberno español, que pasan por unha baixada salarial baixo a ameaza de eliminar máis empregos despois dos 900 despedimentos que xa se produciron nas oficinas do país dende a fusión.

A Confederación Intersindical Galega vén de poñer en marcha unha nova páxina web con toda a información referente á convocatoria de folga xeral do 27 de xaneiro, ademais de incluír un repaso ás mobilizacións máis importantes organizadas pola central no contexto da crise económica. Nela, o sindicato nacionalista pon a disposición das persoas interesadas o material necesario para entender a actual ofensiva do capital contra a clase obreira e desmontar os falsos argumentos que están detrás da perda de dereitos laborais e sociais.

A Confederación Intersindical Galega de Vigo celebra o vindeiro 6 de outubro a II Xornada Divulgativa “Imos Traballar” no Centro Cultural Caixanova (rúa Policarpo Sanz, 13). Dirixida a persoal técnico de emprego, persoas desempregadas e empresas vinculadas á atención aos maiores e aos servizos á comunidade co obxectivo de apostar pola formación como vía de inserción laboral. O prazo para inscribirse de maneira gratuíta nesta xornada está aberto até o día 5 de outubro ás 14.00 horas e pode facerse a través de correo electrónico (imostraballar.cig@gmail.com) ou no teléfono 986 433 770 entre as 10.00 e as 14.00 horas de luns a venres. As prazas son limitadas e entregarase certificado de asistencia.