Delegados e delegadas da CIG analizaron, na asemblea nacional convocada pola central sindical este xoves en Compostela, as consecuencias desta reforma laboral, o retroceso nos dereitos da clase traballadora que se foron introducindo coas sucesivas reformas, desde 1980, e as medidas a adoptar para frear os ataques do neoliberalismo. A asemblea acordou reproducir estes debates en todas as empresas e centros de traballo, que a folga xeral e a mobilización é a única ferramenta que ten a clase traballadora para presionar e obrigar ao goberno á retirada desta e das outras reformas previstas –das pensións, da negociación colectiva...- e que a CIG, como proxecto sindical diferenciado, debe convocar as mobilizacións, o 29 de setembro, por separado de CCOO e UGT.

Desde as dez da mañá e até pasada a unha da tarde, máis de cincocentos delegados e delegadas sindicais da CIG de Vigo participaron nunha importante asemblea comarcal de formación sobre a crise económica, na que participou o economista Xavier Vence. Ademais aproveitouse este encontro para artellar o reparto do material propagandístico da manifestación da CIG contra a crise, convocada para o 13 de novembro, e que sairá ás 20 da tarde de Vía Norte.