Queremos Galego impulsará un calendario de mobilizacións cando se fan dous anos de goberno de Alberto Núñez Feijoo na presidencia da Xunta. Así o vén de anunciar a plataforma cidadá, formada por máis de 700 entidades de diferentes ámbitos sociais, que ten previsto organizar un grande acto nacional de carácter lúdico-reivindicativo en Santiago de Compostela o sábado 30 de abril e mobilizacións simultáneas en distintas localidades do País para o vindeiro 17 de maio.

A CIG-Ensino vén de denunciar que a Xefatura Territorial de Educación de Pontevedra enviou ao colexio de Randufe en Tui material só en español para a nova aula de infantil. O Xefe Territorial xustificou o envío do devandito material, unha ducia de libros e varios xogos para adquisición da lectoescritura, botando man dos resultados da enquisa realizada aos pais e nais sobre a lingua materna dos nenos e das nenas.

A Plataforma Cidadá Queremos Galego chama ao conxunto da sociedade a continuar “coa loita cívica polo dereito a poder vivir en galego na nosa propia terra” logo de que o pleno do Parlamento de Galiza rexeitase este mediodía, cos votos en contra do Partido Popular, a toma en consideración da Proposición de Lei sobre o uso do galego polas Administracións de Galiza e no ámbito do ensino impulsada ao longo dos últimos meses pola plataforma mediante o procedemento de iniciativa lexislativa popular (ILP).

O pleno do Parlamento de Galiza debaterá hoxe, 14 de decembro, a toma en consideración da proposición de lei impulsada no seu día pola Plataforma Cidadá Queremos Galego para “a garantía e protección dos dereitos lingüísticos no ensino e no ámbito das administracións públicas” a través do procedemento de Iniciativa Lexislativa Popular (ILP).

Representantes de diversas organizacións e colectivos integrados na plataforma cidadá Queremos Galego -entre os que se atopaban o secretario xeral da CIG, Suso Seixo ou o secretario nacional de CIG-Ensino, Anxo Louzao- presentaron no rexistro do Parlamento de Galiza preto de 30.000 sinaturas recollidas en apoio á Iniciativa Lexislativa Popular en defensa dos dereitos lingüísticos. A plataforma escolleu esta emblemática data por coincidir co día no que se celebrou, en 2009, a máis grande manifestación cívica a prol do galego.

A CIG-Ensino denuncia que o cuestionario enviado esta semana pola Consellaría de Educación aos centros para a súa distribución entre os pais e nais vai dar lugar ao incumprimento dos dereitos lingüísticos do alumnado, pois pode dar como resultado a falta de contacto coa súa lingua propia, incumprindo así a Declaración Universal dos Dereitos Lingüísticos e procura a desaparición do galego como lingua vehicular na educación infantil.

O Comité Provincial de Telefónica de Pontevedra acordou en pleno ordinario apoiar a manifestación convocada por Queremos Galego o vindeiro 17 de Maio en Compostela. O acordo adoptouse a proposta presentada pola Sección Sindical da CIG na empresa, que ademais, remitiu un comunicado a todo o persoal animándoo a participar nesta xornada reivindicativa. Dende a CIG-Telefónica levan anos reclamando á multinacional a inclusión do idioma galego entre os criterios de selección de persoal e que se elabore unha norma de calidade que garanta que os clientes van ser atendidos na súa lingua.