A CIG-Construción de Lugo solicou á dirección de Ingemarga a retirada do expediente de regulación de emprego que afectaría a máis 40% do persoal da fábrica de Guitiriz, logo de que máis de 55 traballadores/as se acollesen ás baixas voluntarias incetivadas propostas pola empresa. Aínda que dende a CIG-Construción de Lugo reiteran que o ERE “non está xustificado”, pedirán na próxima reunión coa dirección de Ingemarga o arquivo do mesmo, xa que dos 64 traballadores afectados, só quedan 4 interesados en manter o seu posto.

Os traballadores/as de Ingermarga aproveitaron o paro de cinco horas convocado na fábrica de Guitiriz para sumarse a caravana de automóbiles que percorreu á estrada que une este Concello con Lugo, nun novo acto de protesta contra o ERE que a empresa pretende levar adiante. O persoal secundou de xeito masivo o paro ao tempo que lamentou a falta de disposición da empresa na negociación do expediente.

Traballadores/as de Ingemarga concentráronse na mañá do 27 de maio diante dos edificios da Xunta en Lugo en contra do ERE presentado pola empresa e que suporá o despedimento de case a metade do persoal da fábrica que o grupo vasco ten en Guitiriz. Practicamente a totalidade do cadro de persoal, acompañado de representantes sindicais, secundaron a protesta a través da que pretenden amosar o seu total rexeitamento ao expediente de regulación na empresa e reiteraron que non van negociar “nin un só despedimento”.

Os traballadores e as traballadoras de Ingemarga concentraranse o vindeiro mércores 27 de maio ás 12:00 horas diante do edificio administrativo da Xunta en Lugo como medida de protesta contra o ERE presentado pola empresa e que afectará a máis do 40% do cadro de persoal da planta de Guitiriz. A medida enmárcase dentro do calendario de mobilizacións establecido polos traballadores/as que tamén secundarán paros parciais na fábrica e teñen previsto desenvolver unha manifestación o vindeiro 13 de xuño.

A dirección de Ingemarga presentou aos representantes dos traballadores un expediente de extinción de emprego par 64 dos seus 160 obreiros, alegando causas de produción, técnicas e organizativas. Pola súa banda, o responsábel da CIG-Construción en Lugo, Antonio Niño, sinalou que non atopan xustificación ao ERE, especialmente porque “unha empresa desta envergadura non ten futuro con tan pouco persoal”.

Os traballadores e traballadoras de Ingemarga desenvolveron o 14 de maio a xornada de folga de 24 horas convocada en contra do despedimento de 16 obreiros da fábrica situada en Guitiriz. O paro estivo marcado polo anuncio da dirección da empresa de que vai presentar un expediente de regulación de empresa, aínda que non se concretaron os termos do mesmo nin a canto persoal afectará. O responsábel da CIG-Construción na comarca de Lugo, Antonio Niño, explicou que o vindeiro martes 19 a empresa convocou ao Comité a unha xuntanza na que entregará toda a documentación.

O persoal de Ingemarga acordou secundar unha xornada de folga de 24 horas o vindeiro xoves 14 de maio como resposta ao despedimento de 16 traballadores na empresa de Guitiriz, aos que hai que engadirlle outros seis empregados dunha canteira do grupo e outras dúas persoas destinadas aos almacéns. Así mesmo, a asemblea de traballadores/as decidiu acudir á paros parciais se Ingemarga non readmite aos despedidos.